ސަމޯއާ އެގްރީމެންޓްގައި ލާދީނީ އެތައް ކަމެއް އެބަ ހުރި، މިއީ އެމްޑީއެންއަށް ވުރެ ބޮޑު މައްސަލަ އެއް - ކުރީގެ ރައީސް ޔާމީން
މީގެ ކުރިން ވެސް މަހުގެ ޑިއުޓީ ކުޑަކުރުމަށް މަސައްކަތް ކުރުމުން، އެއްޖިންސުން ގުޅުން ހިންގުން ފަދަ ލާދީނީ ކަންކަމަށް އެއްބަސް ނުވާތީ އެ މަޝްވަރާތައް ކާމިޔާބު ނުވާކަމަށް އެ މަނިކުފާނު ވިދާޅުވި
ކުރީގެ ރައީސް އަބްދުﷲ ޔާމީން
އޯގަނައިޒޭޝަން އޮފް އެފްރިކަން، ކެރީބިއަން އެންޑް ޕެސިފިކް ސްޓޭޓްސް (އޯއޭސީޕީއެސް) އާއި ޔޫރަޕިއަން ޔޫނިއަން (އީޔޫ) އާ ދެމެދު ގާއިމުކޮށްފައިވާ "ސަމޯއާ އެގްރީމަންޓް" ގައި ރާއްޖެއިން ސޮއިކުރި އިރު ސަމޯއާ އެގްރީމެންޓްގައި ލާދީނީ އެތައް ކަމެއް އެބަ ހުރިކަމަށާއި މިއީ އިސްލާމްދީނަށް ފުރައްސާރަވާފަދަ ގޮތަަކަށް ރިޕޯޓު ނެރެފައިވާ މޯލްޑީވްސް ޑިމޮކްރަސީ ނެޓްވޯކް (އެމްޑީއެން) އަށް ވުރެ ބޮޑު މައްސަލަ އެއް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ޕީއެންއެފްގެ ބުރާސްފަތި ދުވަހުގެ ރޭގެ ޖަލްސާގައި ވާހަކަދައްކަވަމުން އެމަނިކުފާނު ވަނީ ސަމޯއާ އެގްރީމެންޓާއި މެދުގައި ގިނަ ކަންބޮޑުވުންތަކެއް ހުރިކަން ހާމަކުރައްވާފައެވެ. އަދިވެސް ސަމޯއާ އެގްރިމެންޓުގެ މައްސަލައިގައި ސަރުކާރުން ފުރިހަމައަށް ޖަވާބުދާރީވެފައި ނުވާ ކަމަށް އެ މަނިކުފާނު ވިދާޅުވިއެވެ. އެހެންކަމުން އެ މައްސަލަ މަޖިލީހުން ބަލާ، އޭގައި ހުރި ކަންކަން މަޖިލީހުން އާއްމުންނަށް ތިލަވާ މިންވަރަށް ކިޔާދޭން ޖެހޭ ކަމަށް އެ މަނިކުފާނު ވިދާޅުވިއެވެ. ދިވެހިން ޤަބޫލު ނުކުރާނެ އެތައް ކަމެއް އެ މުއާހަދާގައި ހުރި ކަމަށް ކުރީގެ ރައީސް ޔާމީން ވަނީ ވިދާޅުވެފައެވެ. އެ އެއްބަސްވުމުގައި ރާއްޖެއިން ސޮއިކުރީ ލާދީނީ އަދި ގާނޫނުއަސާސީއާ ފުށުއަރާ މާއްދާތަކަށް ރިޒަވޭޝަން ހުށަހެޅުމަށްފަހު ކަމަށް ސަރުކާރުން ބުނި ނަމަވެސް އެ ވާހަކަތައް ސާފު ނުވާ ކަމަށް އެ މަނިކުފާނު ވިދާޅުވިއެވެ.
ސަމޯއާ އެގްރިމެންޓަކީ އޭޝިއާ، ކެރިބިއަން، ޕެސިފިކް ގައުމުތަކުގެ މެދުގައި ސޮއިކޮށްފައިވާ އެއްބަސްވުމެއް ކަަމަށާއި އެއީ އާ އެއްބަސްވުމެއް ނޫން ކަމަށް އެ މަނިކުފާނު ވިދާޅުވިއެވެ. އެއީ ކުރިން ކޮލޮނައިޒްކޮށްފައި އޮތް ގައުމުތަކަށް ޚާއްސަވެގެން އުފެދުނު އެއްބަސްވުމެއް ކަމަށާއި ސަމޯއާ އެގްރިމެންޓް އައީ އޭގެ ސަކްސެސަރ އެއް ގޮތަށް ކަމަށް އެ މަނިކުފާނު ވިދާޅުވިއެވެ. މިއީ ޔޫރަޕުން އޭރު އިސްތިއުމާރުކޮށްފައި ހުރި ގައުމުތަކަށް ވަކި ހިއްޕާފައި އޮންނަ އޮތުން ނިމުމަކަށް އަޔަ ނުދިނުމަށް ކުރި ކަމެއް ކަމަށް އެ މަނިކުފާނު ވިދާޅުވިއެވެ. މީގެ ކުރިން ވެސް މަހުގެ ޑިއުޓީ ކުޑަކުރުމަށް މަސައްކަތް ކުރުމުން، އެއްޖިންސުން ގުޅުން ހިންގުން ފަދަ ލާދީނީ ކަންކަމަށް އެއްބަސް ނުވާތީ އެ މަޝްވަރާތައް ކާމިޔާބު ނުވާކަމަށް އެ މަނިކުފާނު ވިދާޅުވިއެވެ. ޔޫރަޕްގެ ޓްރޭޑިން ކޮމިޝަނަަރ އާއި އެ މަނިކުފާނުގެ ވެރިކަމުގައި ވާހަކަދެއްކެވި ކަމަށާއި އޭރު ވެސް ޔޫރަޕަށް އެކްސްޕޯޓް ކުރާ މަހުގެ ޑިއުޓީ ކުޑަ ނުވީ އެފަދަ ކަންކަމަށް ރާއްޖެއިން އެއްބަސް ނުވުމުން ކަމަށް ކުރީގެ ރައީސް ޔާމީން ވިދާޅުވިއެވެ.
