ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އިންޑިއާގައި ހިނގި ބިންގަނޑު ކަނޑައިގެން ދިއުމުގެ ހާދިސާއާ ގުޅިގެން އެޤައުމުގެ ބޮޑުވަޒީރު ނަރެންދުރަ މޯދީއަށް ހަމްދަރުދީގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާގެ މެސެޖުގައި، ބިންގަނޑު ކަނޑައިގެން ދިއުމުގެ ހާދިސާގައި އެޤައުމުގެ އެތައް ސަތޭކަ ބައެއްގެ ފުރާނަ ގެއްލުނު ޚަބަރާއެކު، ފުން ހިތާމައެއް ލިބިވަޑައިގަތްކަން ހާމަކުރައްވާފައި ވެއެވެ.

އަދި އެތައް ބައެއްގެ ފުރާނައާއި ދިރިއުޅުމާއި މުދަލަށް ބޮޑެތި ގެއްލުންތަކެއް ލިބުމަކީ ހިތްޕުޅަށް ގެންނަވަންދަތި ހިތާމަވެރި ހާދިސާއެއްގެ ގޮތުގައި އެ މަނިކުފާނު ސިފަކުރެއްވިއެވެ.

ރައީސުލްޖުމްހޫރިއްޔާގެ މެސެޖުގައި، ދިވެހި ސަރުކާރާއި، ރައްޔިތުންނާއި، އެމަނިކުފާނުގެ އަމިއްލަ ނަންފުޅުގައި، އިންޑިއާގެ ސަރުކާރަށާއި ރައްޔިތުންނަށް ވަރަށް އިޚްލާޞްތެރިކަމާއިއެކު ހަމްދަރުދީ ފޮނުއްވާފައިވެއެވެ.

އަދި އެމަނިކުފާނުގެ މެސެޖުގައި މީހުން ސަލާމަތް ކުރުމުގައި އެ ސަރަޙައްދުގައި މިހާރު ކުރިއަށްދާ މަސައްކަތް ކާމިޔާބުކަމާއެކު އަވަސް ފުރުޞަތެއްގައި ނިމިގެން ދިއުމަށް އުންމީދުކުރައްވާކަމުގައި ވިދާޅުވިއެވެ.

ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ މި ހާދިސާގައި އަނިޔާވި ފަރާތްތަކަށް އަވަސް ޝިފާއެއް މިންވަރުކޮށްދެއްވުން އެދި ދުޢާ ކުރައްވައި، ފުރާނަ ގެއްލުނު ފަރާތްތަކުގެ އާއިލާތަކަށް ތަޢުޒިޔާ ރައްދުކޮށްދެއްވުން އެދިވަޑައިގަންނަވަމުންނެވެ.

އިންޑިއާގެ ބޮޑުވަޒީރަށް ރައީސް މި މެސެޖު ފޮނުއްވާފައިވާއިރު، ފަލަސްތީން ރައްޔިތުންގެ ހައްގުގައި ވަރުގަދަ ޖިހާދު ކުރަމުން ދިޔަ ހަނިއްޔާ އަވަހާރަ ކޮށްލުމާ ގުޅިގެން ރައީސް މިހާތަނަށް އެއްޗެއް ވިދާޅެއް ނުވެއެވެ. ނުވިތާކަށް ދިވެހި ސަރުކާރުންވެސް މިހާތަނަށް އެހަމަލާ ކުށްވެރިކޮށް އެއްވެސް އެއްޗެއް ބުނެފައެއް ނުވެއެވެ.

ހަމާސް ގެ ލީޑަރު ހަނިއްޔާ ތެހެރާން ގައި އަވަހާރަ ކޮށްލުމާ ގުޅިގެން ދުނިޔޭގެ އެކި ގައުމުތަކުން ގެންދަނީ އެކަން ކުށްވެރި ކުރަމުންކަން ފާހަގަ ކުރެވެއެވެ.

ވަކިން ޚާއްސަކޮށް ފަލަސްތީނު މިނިވަން ކުރުމަށްޓަކައި ހަމާސް އިން އިޒްރޭލާ ކުރަމުން އަންނަ ހަނގުރާމަ ޓެރަރިޒަމާ ގުޅުވައިގެން ނުވާނެކަމަށް ރައީސް 'ޗެނަލް ނިއުސް އޭޝިއާ'އަށް ދެއްވި އިންޓަވިއުއެއްގައި ވިދާޅުވެފައިވާއިރު، މިއަދު އެ ޖަމާއަތުގެ އެންމެ އިސް ލީޑަރު އަވަހާރަ ކޮށްލުމުންވެސް ހަނު ހުންނަވާތީ ގިނަ ބަޔަކު ދަނީ ރައީސް އޭރު ދެއްކެވި ވާހަކަފުޅުގެ އިހުލާސްތެރިކަމާމެދު ސުވާލު އުފައްދަމުންނެވެ.