މިދިޔަ ސީޒަނަށްވުރެ ގިނަ ގޯލު ޖަހާނަން: ލެވޮންޑޯސްކީ
ހުސްވި ސީޒަނުގައި ލެވޮންޑޯސްކީ ޖަހާފައިވަނީ 26 ގޯލު، އޭގެ ކުރީ ސީޒަނުގައި 33 ގޯލެވެ.
ބާސާގެ ދެވަނަ ލަނޑު ޖެހުމަށްފަހު ލެވާންޑޯސްކީ
ހުސްވި ސީޒަނަށްވުރެ ގިނަ ގޯލު ކުރިއަށް އޮތް ސީޒަނުގައި ޖަހާނެ ކަމަށް ބާސެލޯނާގެ ފޯވަޑް ރޮބަޓް ލެވޮންޑޯސްކީ ބުނެފި އެވެ.
އެމެރިކާގައި ޓީމާއެކު މިވަގުތު ޕްރީ ސީޒަން ޓްރޭނިންގައި ހުރި ޕޮލެންޑްގެ ކެޕްޓަން ބުނީ އާ ކޯޗަކާއެކު ބާސެލޯނާ އޮތީ ބަދަލުތަކެއްގެ ތެރޭގައި ކަމަށެވެ.
ހުސްވި ސީޒަނުގައި ލެވޮންޑޯސްކީ ޖަހާފައިވަނީ 26 ގޯލެވެ. އޭގެ ކުރީ ސީޒަނުގައި 33 ގޯލެވެ. ނަމަވެސް އުމުރުން 35 އަހަރުގެ ފޯވަޑް ބުނީ އާ ސީޒަނަށް އޭނާ ވަރަށް ރަނގަޅަށް ތައްޔާރުވަމުން އަންނަ ކަމަށެވެ.
ލެވޮންޑޯސްކީ ވަނީ ބުންޑަސްލީގާގެ އެންމެ ގިނަ ގޯލު ޖެހި ކުޅުންތެރިޔާގެ މަގާމު ހަތަރު ފަހަރު ހޯދައިފަ އެވެ. ކެރިއަރުގައި މިހާތަނަށް 601 ގޯލު ޖަހާފައިވާ ލެވޮންޑޯސްކީ އަށް މި ފަހަރު ބާސެލޯނާގައި ކޯޗުކޮށްދޭނީ ޖަރުމަނުގެ ގައުމީ ޓީމާއި ބަޔާންގެ ކުރީގެ ކޯޗު ހަންސީ ފްލިކެވެ.
ބާސެލޯނާއަށް ލެވޮންޑޯސްކީ ބަދަލުވީ ތިން އަހަރަށެވެ. މިއީ އޭނާގެ ފަހު ސީޒަނަށް ވިޔަސް ރަނގަޅު ކުޅުމެއް ދައްކައިފިނަމަ އޭނާ އަށް އިތުރު ސީޒަނެއްގައި މަޑުކުރުމުގެ އިހްތިޔާރު ލިބިދެ އެވެ.
ބާސެލޯނާއިން ވަނީ މި ސީޒަނަށް ޓީމުގެ އެޓޭކް ވަރުގަދަ ކުރުމަށް މަސައްކަތް ފަށައިފަ އެވެ. މި ގޮތުން ޓީމަށް ގެންނަން މަސައްކަތް ކުރަނީ ސްޕޭނުގެ ނިކޯ ވިލިއަމްސް އާއި ޑެނީ އޮލްމޯ އެވެ.
