ދައުރު ހަމަނުވަނީސް ޕީސީބީގެ ނައިބު ރައީސް ފިރާޒު ވަކިކޮށްފި
28 ޖުލައި 2024 | އާދީއްތަ 12:35ފިރާޒް މަގާމުން ވަކިކުރެއްވީ ދައުރު ހަމަނުވަނީސް، ބާކީ 2 އަހަރު އެބައޮތް
ޕީސީބީގެ ނައިބު ރައީސް ފިރާޒު އަށް އެ އޮފީހުގެ މުވައްޒަފުން ދިން ފެއަރވެލްގެ ތެރެއިން
ދައުރު ހަމަނުވަނީސް ޕްރައިވެޓައިޒޭޝަން އެންޑް ކޯޕަރައިޓައިޒޭޝަން ބޯޑް (ޕީސީބީ)ގެ ނައިބުރައީސް މުހައްމަދު ފިރާޒު ވަކިކޮށްފިއެވެ.
ފިރާޒު މަގާމުން ވަކިކުރީ މިދިޔަ ބުރާސްފަތި ދުވަހުއެވެ. ނަމަވެސް ދައުރުގެ ބާކީ 2 އަހަރު އޮއްވާ އޭނާ މަގާމުން ވަކިކުރި ސަބަބެއް ރައީސް އޮފީހުން ހާމައެއް ނުކުރެއެވެ. އަދި ޕީސީބީން ވެސް އެކަން ހާމައެއް ނުކުރެއެވެ.
ޕީސީބީން ވަކިކުރެއްވިކަން ހާމަކުރައްވާ އެކްސްގައި ފިރާޒް ކުރެއްވި ޕޯސްޓުގައި ވިދާޅުވީ ޕީސީބީ އިން ވަކިވެވަޑައިގަންނަވާއިރު، މަސައްކަތުގެ ލަނޑުދަނޑިތައް ފުރިހަމަވެފައިވާ ކަމުގެ އިހުސާސް ކުރައްވާ ކަމަށެވެ. އަދި ރައީސް ޑރ. މުހައްމަދު މުއިއްޒުގެ ވެރިކަމުގައި ގައުމަށް ހިދުމަތް ކުރުމުގެ ފުރުސަތު ދެއްވި ކަމަށްޓަކައި ޝުކުރު އަދާކުރައްވާފައިވެއެވެ.
ފިރާޒް ވިދާޅުވީ ޕީސީބީގައި ނައިބު ރައީސްގެ މަގާމުގައި ހުންނެވި ދުވަސްވަރު، މުޅި އެސްއޯއީތަކުގެ ދާއިރާ އިސްލާހު ކުރުމަށް ނަޒާހަތްތެރިކަމާއި ތެދުވެރިކަމާއެކު، ގައުމާއި، އާންމުންނާއި ސަރުކާރާ މެދު އޭނާގެ ޒިންމާތަކާއި ވާޖިބުތައް ފުރިހަމަކޮށްފައިވަނީ އެންމެ އިތުބާރާއެކު އަދި ހަގީގީ ރޫހުގައި ކަމަށެވެ.
މީގެ އިތުރުން ޕީސީބީގެ ޓީމާއެކު އެސްއޯއީތަކަށް ހެޔޮބަދަލުތަކެއް ގެނެވުނު ކަމަށާއި، އޭނާ ލީޑް ކުރި ގިނަ ދާއިރާތަކަކީ ތަންފީޒު ކުރެވެމުންދާ ދާއިރާތަކެއް ކަަމަށާއި، ބައެއް ދާއިރާތައް ބައެއް ގޮތްގޮތުން ތަންފީޒު ކުރެވިފައިވާ އަދި މަސައްކަތް ކުރަމުންދާ ދާއިރާތައްވެސް ހިމެނޭ ކަމަށެވެ. ފިރާޒު ނައިބުރައީސްގެ މަގާމުގައި ހުންނަވައިގެން އެސްއޯއީ ދާއިރާގެ ވިސްލްބްލޯވަރ މެކޭނިޒަމް ހަރުދަނާ ކުރުމާއި، ޑިރެކްޓަރުން އައްޔަންކުރުމާއި ވަކިކުރުމުގެ ސިޔާސަތަށް ބަދަލު ގެނައުން ފަދަ ކަންކަން ހިމެނެއެވެ.
ޕީސީބީގެ މެންބަރެއްގެ ދައުރަކީ 5 އަހަރެވެ. އަދި ފިރާޒު ޕީސީގެ ނައިބުރައީސްގެ މަގާމަށް އައްޔަންކުރައްވާފައިވަނީ އެ ބޯޑުގެ ކުރީގެ ރައީސް ހަސަން ވަހީދު، އިސްތިއުފާ ދެއްވުމުން، ނައިބު ރައީސް ކަމުގައި ހުންނެވި އާސިމް މުހައްމަދު ރައީސްކަމަށް އައްޔަންކުރެއްވުމާއެކު ނައިބު ރައީސްގެ މަގާމު ހުސްވުމުންނެވެ.
މި ސަރުކާރުން ވަނީ އާސިމްވެސް ފަހުން އެ މަގާމުން ވަކިކޮށްފައެވެ. އަދި އެ މަގާމަށް އައްޔަންކުރީ ހަމްދީ އަގީލްއެވެ. އަދި އިތުރު 6 މެންބަރަކު އެ ބޯޑަށް މި ސަރުކާރުން އައްޔަންކުރިއެވެ.
