ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲ މ. މުރައިދޫގެ އަށް ދިރިއުޅުއްވުން ބަދަލުކުރައްވައިފިއެވެ.
ރާއްޖެއެމްވީ އަށް އެނގިފައިވާ ގޮތުން އެ މަނިކުފާނު އެ ގެކޮޅަށް ބަދަލުވެވަޑައިގެންނެވީ ހުކުރު ދުވަހުގެ ވަގުތެއްގައެވެ.
އަދި އެ ގެއަށް ބަދަލުވެވަޑައިގަތީ މުރައިދޫ ގޭގައި ބައެއް މަރާމާތުގެ މަސައްކަތްތައް ކުރުމަށް ފަހުގައި ކަމަށް ވަނީ އެނގިފައެވެ.
އަބްދުއްރަހީމް ވަނީ މުރައިދޫގޭގެ ބައެއް މަޤާމުތަކަށް ބަދަލުގެންނެވުމަށް ހުށަހަޅުއްވާފައެވެ. އޭގެ ތެރޭގައި ބައެއް މަޤާމުތައް އުވާލުމާއި، މަޤާމުގެ ނަމަށް ބައެއް ބަދަލުތައް ގެނައުން ހިމެނެއެވެ.
އެ ކަމާއި ގުޅޭ ހުއްދަތައް ނިމިދިޔަ ހަފްތާގެ ތެރޭގައި މަޖިލީހުގެ އާއްމު ކޮމިޓީން ވަނީ ދީފައެވެ.
މީގެ ކުރިން އަބްދުއްރަހީމް ދިރިއުޅުއްވަމުންގެންދެވީ އޭނާގެ އަމިއްލަ ގެކޮޅުގައެވެ.
ނިމިދިޔަ އެމްޑީޕީ ވެރިކަމުގެ ފުރަތަމަ ކޮޅު އެ ގެ ވަނީ ހުސްކޮށްފައެވެ. ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދު ވަނީ 6 މެއި 2021 ގައި އެ މަނިކުފާނަށް އަމާޒުކޮށްދިން ބޮމުގެ ހަމަލާ އަށް ފަހު މުރައިދޫގޭގައި ދިރިއުޅުއްވާފައެވެ.
ހިތަދޫ އުތުރު ދާއިރާގެ މެންބަރު މުހައްމަދު އަސްލަމު މަޖިލީހުގެ ރައީސްކަމުގައި ހުރި އިރު މުރައިދޫގެ ކޮންމެވެސް ވަރަކަށް މަރާމާތުކުރިއެވެ. ނަމަވެސް އަސްލަމް އެގޭގައި ދިރިއުޅުއްވާފައެއް ނުވެއެވެ.
