ގާޒާ ގެ އުތުރަށާއި މެދުތެރޭ ސަރަހައްދު ތަކަށާއި ދެކުނަށް ޔަހޫދީ ސިފައިން ބޮން އަޅާ ބޮޑެތި ގެއްލުން ތަކެއް ބުރާސްފަތި ދުވަހު ދީފިއެވެ.

ޔަހޫދީ ސިފައިން ހަނގުރާމަމަތީ ބޯޓު ފަހަރުގައި ބޮން އެޅި ތަންތަނުގެ ތެރޭގައި ގާޒާ ސްޓްރިޕް ގެ ޚާން ޔޫނިސް އާއި ބުރެއިޖް ރެފިއުޖީ ކޭމްޕް އާއި ގާޒާ ސިޓީ ހިމެނޭ ކަމަށް އަލް ޖަޒީރާގެ ނޫސްވެރިން ބުނެފައިވެއެވެ.

ގާޒާ ސިޓީގެ ދެކުނު ސަރަހައްދަށް އެއްގަމު މަގުން ޔަހޫދީ ސިފައިން އަލުން އަރާ ދެމުންދާ ހަމަލާތަކުގައި މިދިޔަ ދެ ދުވަހު އެކަނި 129 މީހުން މަރުވެފައިވާ ކަމަށް ޚަބަރުތައް ބުނެއެވެ.

ޚާން ޔޫނިސް ހިސޯރު ކޮށްގެން ތިބި ޔަހޫދީ ސިފައިން ގެންދަނީ އާންމު ރައްޔިތުންގެ ގަޔަށް ބަޑި ޖަހާ މަރަމުންނެވެ. ފަލަސްތީނުގެ ރެޑް ކްރެސެންޓުން ބުނެފައިވާ ގޮތުގައި ބުރާސްފަތި ޔަހޫދީ ސިފައިން ބަޑި ޖެހުމުގެ ސަބަބުން މަދުވެގެން 25 މީހުން ވަނީ މަރުވެފައެވެ. އެތަނުގައި ގާއިމްވެ ތިބި ޔަހޫދީ ސިފައިން ގެންދަނީ ފެންނަ ކޮންމެ މީހެއްގެ ގަޔަށް ބަޑި ޖަހަމުން ކަމަށް މަންޒަރު ދުށް މީހުންނާ ހަވާލާދީ މީޑިއާ ރިޕޯޓްތައް ބުނެއެވެ. ޒަޚަމްވާ މީހުން ގެންނަމުންދާ ނާސިރު ހޮސްޕިޓަލުން ބުނެފައިވަނީ ޒަޚަމްވެފައިވާ މީހުންތައް ހުއްޓުމެއް ނެތި ގެންނަމުންދާ ކަމަށާއި، ހޮސްޕިޓަލަށް ގެނައި އެތައް ބައެއްގެ ހާލު ސީރިއަސް ކަމުގައެވެ. ޚާން ޔޫނިސްގައި ޔަހޫދީ ސިފައިންގެ ހަމަލާ އެއްގައި ޒަޚަމްވީ ފަލަސްތީން މީހަކު ހޮސްޕިޓަލަށް ގެންދިޔަ އެމްބިއުލާންސަށް ބަޑިޖަހާ ހަމަލާދީފައިވާ ކަމަށް ރިޕޯޓްތައް ބުނެއެވެ.

އަލް-މަވާސީ ރެފިއުޖީ ކޭމްޕަށް، ޚާން ޔޫނިސް އިން ގަދަކަމުން ނެރެ ފޮނުވާލާ އެތައް ހާސް ފަލަސްތީން މީހުން އައިސް ޖަމާވުމުގެ ސަބަބުން އެ ތަނުގައި އިތުރަށް އެންމެ ޓެންޓެއް ވެސް އިތުރަށް ޖަހާނެ ޖާގަ ނެތް ކަމަށް ފަލަސްތީނުގެ ރެޑްކްރެސެންޓުން ވަނީ ބުނެފައެވެ.

އިޒްރޭލުގެ ޖަލުތަކުގައި ހައްޔަރުކޮށްގެން ގެންގުޅޭ ފަލަސްތީނު މީހުންގެ ތެރެއިން އެގާރަ މީހަކު ބުރާސްފަތި ދުވަހު ވަނީ ދޫކޮށްލާފައެވެ. އޭގެ ތެރޭގައި ހިމެނޭ 17 އަހަރުގެ ކުއްޖަކު ނޫސްވެރިންނަށް ކިޔައިދިން ގޮތުގައި ހަމާސް އާ ބެހޭ މައުލޫމާތާއި ހަމާސް އިން ރަހީނު ކޮށްފައިވާ އިޒްރޭލު މީހުންނާ ބެހޭ މައުލޫމާތު ހޯދުމަށް އޭނާ އަށް ޔަހޫދީ ސިފައިން ވަނީ ބޮޑެތި އަނިޔާ ކޮށްފައެވެ.

ހުސްވި އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ގާޒާ ގައި އިޒްރޭލުން ހިންގަމުންދާ ހަނގުރާމައިގައި މިހާތަނަށް 39،175 ފަލަސްތީން މީހުން ވަނީ ޝަހީދު ކޮށްލާފައެވެ. އިޒްރޭލުގެ ހަމަލާތަކުގައި ޒަޚަމްވީ މީހުންގެ އަދަދު 90،403 ށް ވަނީ އަރާފައެވެ.