އޮކްޓޯބަރު 7 ވަނަ ދުވަހުން ފެށިގެން ޔަހޫދީ ސިފައިން ދެމުންދާ ހަމަލާތަކުގައި ގާޒާ އިން މަރުވި ކުޑަކުދިންގެ އަދަދު 16،000ށް ވުރެ މައްޗަށް ހިނގައްޖެ ކަމަށް ގާޒާގެ މީޑިއާ އޮފީހުން ހާމަ ކޮށްފިއެވެ.

އަންގާރަ ދުވަހު މީޑިއާ އޮފީހުން ނެރުނު ބަޔާނެއްގައި ބުނެފައިވާ ގޮތުން، ޔަހޫދީ ސިފައިން ގާޒާ އިން މި މުއްދަތުގެ ތެރޭގައި 39،000ށް ވުރެ ގިނަ މީހުން ފަލަސްތީނުން ވަނީ ޝަހީދު ކޮށްލާފައެވެ.

މީގެ އިތުރުން 90،000 ފަލަސްތީން މީހުން ޒަޚަމްވެފައިވާ ކަމަށާއި، 10،000 މީހުން ވީ ނުވީ އެއް ނޭގި ގެއްލިފައިވާ ކަމަށް ވެސް ބަޔާނުގައި ބުނެފައިވެއެވެ.

މީޑިއާ އޮފީހުގެ ރެކޯޑްތަކުން ހާމަވާ ގޮތުގައި މިހާތަނަށް ބަނޑުހައިހޫނު ކަމުގައި މަރުވެފައިވާ ކުދިންގެ އަދަދު 34ށް އަރާފައިވާ އިރު، 17،000ށް ވުރެ ގިނަ ކުޑަކުދިންގެ މަންމަ ނުވަތަ ބައްޕަ ނުވަތަ މައިންބަފައިން އެކުގައި ހަނގުރާމައިގައި ވަނީ މަރުވެފައެވެ.

ދާދި ފަހުން އިނގިރޭސިވިލާތުގެ މަޝްހޫރު މެޑިކަލް ޖާނަލް ލެންސެޓް ގައި ޝާއިއު ކުރި ރިޕޯޓެއްގައި ވާ ގޮތުން، އިޒްރޭލުގެ ހަމަލާތަކުގައި ފަލަސްތީނުން މަރުވި މީހުންގެ އަދަދު 186،000ށް ވުރެ މައްޗަށް ދާނެ ކަމަށް ވަނީ އަންދާޒާ ކޮށްފައެވެ. އެއީ ގާޒާގެ ޖުމްލަ އާބާދީގެ 7.9 އިންސައްތަ އެވެ.

ގާޒާ ގައި އިޒްރޭލުން ހިންގަމުންދާ އުދުވާނަކީ މުޅި އެ ސިޓީ ފުނޑުފުނޑު ކޮށްލުމުގެ އިތުރުން ނަސްލެއް ނައްތާލުމަށް ހިންގާ އަނިޔާވެރި ޖަރީމާއެއްގެ ގޮތުގައި ސިފަކުރެވޭ ކަމަށް އެތައް ރިޕޯޓްތަކެއްގައި ވަނީ ބުނެފައެވެ.