މަޝްހޫރު ލަވަކިޔުންތެރިޔާ މަރިޔަމް ދީދީ ނިޔާވެއްޖެ
އޭނާގެ އަގު ވަޒަންކުރުމުގެ ގޮތުން 1982 ވަނަ އަހަރު އޭރުގެ ސަރުކާރުން ވަނީ ލަވަކިޔުމުގެ ރޮނގުން އާންމު ޚިދުމަތުގެ އިނާމު ދީފައި
މަރިޔަމް އަހުމަދު ދީދީ
"ފެންމީރުވި ރީތި ރަށޭމީ ރޫހުވަނީ ތިނަދޫގައޭ" ފަދަ ލަވަތަކުން މަޝްހޫރުވި ރަން އަޑުގެ ވެރިޔާ ގދ. ތިނަދޫ މަރިޔަމް އަހުމަދު ދީދީ (މަރިޔަންދީ) ނިޔާވެއްޖެއެވެ.
މަރިޔަންދީ ނިޔާވެފައިވަނީ އާދިއްތަ ދުވަހުގެ ރޭގެ ވަގުތެއްގައި، އޭނާ ދިރިއުޅޭ ގޭގައެވެ.
މަރިޔަންދީ ނިޔާވިއިރު އޭނާގެ އުމުރަކީ 73 އަހަރެވެ. އާދީއްތަ ދުވަހުވެސް މަރިޔަންދީ އެ ރަށުގެ ބައެއް މީހުންނާ ބައްދަލުވެ ވާހަކަދެއްކި ކަމަށާއި، ހާލު ރަނގަޅުކަމަށް މީހުން ވަނީ ބުނެފައެވެ.
އާންމުންގެ މެދުގައި މަރިޔަންދީ މަޝްހޫރުވެގެން ގޮސްފައިވަނީ "ފެންމީރުވި ރީތި ރަށޭ މީ، ރޫހުވަނީ ތިނަދޫގައޭ" އަދި "ލޯފަން ކުއްޖެއްގެ ހިތުގެ ސާބިތުކަން" ފަދަ ލަވަތަކުންނެވެ. ތިނަދޫގެ ރަން އަޑުގެ ވެރިޔާގެ ގޮތުގައި މަޝްހޫރުވެފައިވާ މަރިޔަންދީ ނިޔާވިއިރު އޭނާގެ އަންހެން ދަރިއަކު ދުނިޔޭގައި އެބަހުއްޓެވެ.
އުފަންވިއިރުވެސް ލޮލުގެ ފެނުމުން މަހުރޫމްވެފައިވާ މަރިޔަންދީ ލަވަކިޔަން ފެށީ އުމުރުން އެންމެ 7 އަހަރުގައެވެ. ލަވައިގެ އިތުރުން މަދަހަވެސް ކިޔާފައިވެއެވެ.
އޭނާގެ އަގު ވަޒަންކުރުމުގެ ގޮތުން 1982 ވަނަ އަހަރު އޭރުގެ ސަރުކާރުން ވަނީ، ލަވަކިޔުމުގެ ރޮނގުން އާންމު ހިދުމަތުގެ އިނާމު ދީފައެވެ.
