ނުސީރަތު ރެފިއުޖީ ކޭމްޕަށް ހުކުރު ދުވަހުގެ ރޭ ޔަހޫދީ ސިފައިން ހަމަލާ ދީ ފަލަސްތީނުގެ ހަ މީހުން މަރާލައިފި

ގާޒާގެ މެދުތެރޭގައި ހުންނަ ނުސީރަތު ރެފިއުޖީ ކޭމްޕަށް ހުކުރު ދުވަހުގެ ރޭ ޔަހޫދީ ސިފައިން ހަމަލާ ދީ ފަލަސްތީނުގެ ހަ މީހުން މަރާލައިފި ކަމަށް ވަފާ ނިއުސް އޭޖެންސީ ބުނެފިއެވެ.

ހުކުރު ދުވަހު ނުސީރަތު ކޭމްޕަށް ދެ ފަހަރެއްގެ މަތިން ހަމަލާ ދީފައިވެއެވެ. ފުރަތަމަ ހަމަލާގައި ފަލަސްތީނުގެ 9 މީހުން މަރުވެފައިވެއެވެ.

އަނެއް ކޮޅުން، ހުކުރު ދުވަހު އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ) އިން ހުކުރު ދުވަހު އިޒްރޭލާ ދެކޮޅަށް އިއްވި ނިންމުމުގައި ބުނެފައިވާ ގޮތައް އިޒްރޭލުން ހިފާފައިވާ ފަލަސްތީނުގެ ބިންތަކުގައި އިޒްރޭލުން ތިބީ ބައިނަލް އަގްވާމީ ގާނޫނާ ޚިލާފަށް ކަމަށް ވުމާއެކު އެ ބިންތަކުން ވަގުތުން ފޭބުމަށް ދުނިޔޭގެ ގައުމުތަކުން އިޒްރޭލަށް ގޮވާލާ ދަނީ އިތުރަށް ޕްރެޝަރ ކުރަމުންނެވެ.

ދުނިޔޭގެ ގައުމުތަކުގެ އިތުރުން އިންސާނީ ހައްގުތަކަށް މަސައްކަތް ކުރާ އެމްނެސްޓީ އިންޓަރނޭޝަލް އާއި އޮކްސްފާމް ފަދަ އެތައް ބައިނަލް އަގްވާމީ ޖަމްއިއްޔާ އަކުން ވެސް އައިސީޖޭގެ ނިންމުމަށް މަރުހަބާ ކިޔުމާއެކު އިޒްރޭލުން ފަލަސްތީނުގެ ބިންތަކުން ފޭބުމަށް ވަނީ ގޮވާލައިފައެވެ. އަދި ބައިނަލް އަގްވާމީ މުޖްތަމައުން އެ ބިންތަކުން އިޒްރޭލު ބޭލުމަށް ބާރު އެޅުމަށް ވެސް ވަނީ ގޮވާލައިފައެވެ.

އައިސީޖޭ ގެ ނިންމުމަށް ބޯލެނބުމަށް ބައިނަލް އަގްވާމީ މުޖްތަމައުން އިޒްރޭލަށް ގޮވާލަމުން ދާއިރު، އިޒްރޭލުގެ ބޮޑު ވަޒީރު ބެންޖަމިން ނަތަންޔާހޫ އާއި އޭނާގެ ސަރުކާރުގައި ހިމެނޭ އިސްވެރިން ވަނީ އައިސީޖޭގެ ނިންމުން ގަބޫލު ނުކުރާނެ ކަމަށް ފާޅުގައި ބުނެފައެވެ. އެއާއެކު ހުޅަނގު އައްސޭރީގައި ގަދަކަމުން ވަޒަންވެރިވެގެން ތިބި ޔަހޫދީން ވަނީ އެ ތަނުގައި ދިރިއުޅޭ ފަލަސްތީނު ރައްޔިތުންނަށާއި، ފަލަސްތީން މީހުންގެ ގޯތި ގެދޮރަށާއި މުދަލަށް ހަމަލާދޭން ފަށާފައެވެ.

ހުސްވި އަހަރުގެ އޮކްޓޯބަރު 7 ގެ ފަހުން އިޒްރޭލުން ގާޒާ އަށް އަރާ ދެމުންދާ ހަމަލާ ތަކުގައި މިހާތަނަށް ފަލަސްތީނުގެ 38،848 މީހުން ވަނީ މަރުވެފައެވެ. ހަމަލާތަކުގައި ޒަޚަމްވި މީހުންގެ އަދަދު 89،459 ށް ވުރެ މައްޗަށް ވަނީ ގޮސްފައެވެ.