އިޒްރޭލުން ދީފާނެ ކޮންމެ ހަމަލާ އަކަށް ޔަމަނުން އޮތީ ތައްޔާރަށް: އަންސަރުﷲ
މިހެން ބުނެފައި ވަނީ އިޒްރޭލުގެ އެއަރ ޑިފެންސް ސިސްޓަމް ފޫއަޅުވާލުމަށް ފަހު ހުކުރު ދުވަހު ޔަމަނުން ތެލް އަވީވް ގައި ހުންނަ އެމެރިކާގެ ކޮންސިއުލޭޓް އޮފީހާ 100 ވަރަކަށް މީޓަރު ކައިރީގައި ހުންނަ އިމާރަތަކަށް ދިން ޑްރޯން ހަމަލާއެއްގައި އިޒްރޭލު ރައްޔިތަކު މަރުވެ، ދިހަ މީހުންނަށް އަނިޔާ ލިބުނު ފަހުންނެވެ.
އަންސަރުﷲ ޖަމާއަތުގެ ޕޮލިޓިކަލް ބިއުރޯގެ މެމްބަރު މުހައްމަދު އަލް-ބުޚައިތީ
އިޒްރޭލުން ދީފާނެ ކޮންމެ ހަމަލާ އަކަށް ޔަމަންގެ އަސްކަރީ ފައުޖުތަކުން އޮތީ ތައްޔާރަށް ކަމަށް އަންސަރުﷲ ޖަމާއަތުން ބުނެފިއެވެ.
ހުކުރު ދުވަހު އެ ޖަމާއަތުގެ ޕޮލިޓިކަލް ބިއުރޯގެ މެމްބަރު މުހައްމަދު އަލް-ބުޚައިތީ ގަތަރުގެ އަލް-އަރަބީ ޓީވީ އަށް ދިން ބަސްދީގަތުމެއްގައި ބުނީ ޔަމަނުން އިޒްރޭލުގެ ވެރިރަށް ތެލް އަވީވް އަށް ހުކުރު ދުވަހު ދިން ހަމަލާ އާ ގުޅިގެން "އިޒްރޭލުން ދޭ ކޮންމެ ރައްދަކަށް ތިބީ ފުރިހަމަ އަށް ތައްޔާރަށް،" ކަމަށެވެ.
އިޒްރޭލުގެ އެއަރ ޑިފެންސް ސިސްޓަމް ފޫއަޅުވާލުމަށް ފަހު ހުކުރު ދުވަހު ޔަމަނުން ދިން ޑްރޯން ހަމަލާ އަމާޒުވީ ތެލް އަވީވް ގައި ހުންނަ އެމެރިކާގެ ކޮންސިއުލޭޓް އޮފީހާ 100 ވަރަކަށް މީޓަރު ކައިރީގައި ހުންނަ އިމާރަތަކަށެވެ.
މި ހަމަލާގައި އިޒްރޭލު ރައްޔިތަކު މަރުވެ، ދިހަ މީހުންނަށް އަނިޔާ ލިބިފައިވާ ކަމަށް އިޒްރޭލުގެ އަސްކަރިއްޔާ އިން ހަމަލާ އާ ބެހޭ ގޮތުން ނެރުނު ބަޔާނުގައި ބުނެފައިވެއެވެ.
ޔަމަންގެ އަސްކަރިއްޔާ އިން ގެންދަނީ އޮކްޓޯބަރު 7 ގައި އިޒްރޭލުން ގާޒާ އަށް އަރާ ހިންގަމުންދާ އަނިޔާވެރި ހަނގުރާމަ އާ ދެކޮޅު ހެދުމުގެ ގޮތުން ދޭތެރެ ދޭތެރެއިން އިޒްރޭލުގެ އަސްކަރިއްޔާ އާ ދެކޮޅަށް ހަމަލާ ދެމުންނެވެ.
ޔަމަނުން ބުނެފައިވަނީ ތެލް އަވީވަށް ހަމަލާ ދިނުމަށް ބޭނުން ކުރީ ރާޑަރަށް ނާރާ ޓެކްނޮލޮޖީ ބޭނުން ކޮށްފައިވާ 'ޔަފާ" ޑްރޯން ކަމަށެވެ.
ޔަމަނުން ގެންދަނީ އިޒްރޭލާ އެމެރިކާ އާ ގުޅުން ހުރި ކަނޑުބޯޓު ފަހަރަށް ވެސް ހަމަލާ ދެމުންނެވެ.
