މަތީ ފެންވަރަށް ކިޔަވައިގެން ތިބޭ މީހުންނަށް ބޮޑު މުސާރައެއް ދިނުމަށް އަންނަ އަހަރުން ފެށިގެން 200 މިލިއަން ޚާއްސަކުރަނީ
19 ޖުލައި 2024 | ހުކުރު 07:02ގެދޮރުވެރިކަމުގެ ދާއިރާއިން، ރާއްޖޭގެ ކަންތައް އޮތީކީ މުޅިން ރަނގަޅަކަށް ނޫން
ރައީސް ދެއްވާ ޚާއްސަ ސްކޮލަރޝިޕާއި، ހައި އެޗީވަރސް ސްކޮލަރޝިޕްގެ ލިޔުން ހަވާލުކޮށްދެއްވުމުގެ ރަސްމިއްޔާތުގައި ރައީސް މުއިއްޒު ވާހަކަފުޅު ދައްކަވަނީ
މަތީ ފެންވަރަށް ކިޔަވައިގެން ތިބޭ މޮޅު މީހުންނަށް ބޮޑު މުސާރައެއް ދިވެހި ސަރުކާރުން ދިނުމަށް އަންނަ އަހަރުން ފެށިގެން 200 މިލިއަން ރުފިޔާ ދައުލަތުގެ ބަޖެޓުން ޚާއްސަ ކުރައްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ ބުރާސްފަތި ދުވަހުގެ ރޭ ހުރަވީ ސުކޫލުގައި ބޭއްވި ރައީސް ދެއްވާ ޚާއްސަ ސްކޮލަރޝިޕާއި، ހައި އެޗީވަރސް ސްކޮލަރޝިޕްގެ ލިޔުން ހަވާލުކޮށްދެއްވުމުގެ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
ރައީސް ވަނީ ކޮންމެ ކުއްޖަކުވެސް ގައުމަށް ޚިދުމަތްކުރުމަށް ބާރުއަޅުއްވާފައެވެ. އަދި މަތީ ތައުލީމު ހާސިލުކުރުމަށް ރާއްޖެއިން ބޭރަށް ދިޔަނަމަވެސް އިސްލާމްދީނުގައި ހިފަހައްޓައި މައިންބަފައިންނާއި ބެލެނިވެރިން ކުދިންނަށް ތައުލީމު ހާސިލް ކޮށްދިނުމަށްޓަކައިވާ ގުރުބާނީ ހަނދާން ބެހެއްޓުމަށްވެސް އެމަނިކުފާނު އެދިވަޑައިގެންނެވިއެވެ.
މީގެ އިތުރުން ރައީސް މުއިއްޒު ވަނީ ރާއްޖެއިން ބޭރަށް ކިޔަވަންދާ ދަރިވަރުން ކިޔަވައި ނިންމުމަށްފަހު ރާއްޖެ ނާންނަ ސަބަބުތަކަށް އަލިއަޅުއްވާލައްވާ ވާހަކަފުޅު ދައްކަވާފައެވެ.
ރައީސް މުއިއްޒު ވިދާޅުވީ ގެދޮރުވެރިކަމުގެ ދާއިރާއިން، ރާއްޖޭގެ ކަންތައް އޮތީކީ މުޅިން ރަނގަޅަކަށް ނޫން ކަމަށާއި، އެސަބަބާ ހުރެ ވެސް ވަރަށް ގިނަ ކުދިން ކިޔަވައި ނިމިގެން ރާއްޖެ ނައިސް އެބަ މަޑުކުރާ ކަމަށެވެ.
މަތީ ތައުލީމު ހާސިލުކުރާ ފަރާތްތަކަށް މިއަންނަ އަހަރުން ފެށިގެން ފަހި ފުރުސަތުތަކެއް މިސަރުކާރުން ހުޅުވައިލާނެކަން ފާހަގަކުރައްވައި ރައީސް މުއިއްޒު ވިދާޅުވީ ދިވެހީންނަށް ޚާއްސަ ވަޒީފާތައް ގިނަކޮށް، އަދާކުރާ ވަޒީފާއާ އެކަށީގެންވާ ރަނގަޅު މުސާރައެއް ދިނުމަށް ސަރުކާރުން ވަރަށް ބޮޑު އިސްކަމެއްދޭނެ ކަމަށެވެ. އަދި މިސަރުކާރުގެ ވައުދާ އެއްގޮތަށް ގައުމު ބިނާކުރަން އިސްކަން ދޭގޮތަށް މީހުން ބިނާކުރަން ދައުލަތުގެ ބަޖެޓުން ޚާއްސަ ސަމާލުކަމެއްދޭނެ ކަމަށް އެމަނިކުފާނު ވިދާޅުވިއެވެ.
އެގޮތުން މަތީ ފެންވަރަށް ކިޔަވައިގެން ތިބޭ މޮޅު މީހުންނަށް ބޮޑު މުސާރައެއް ދިވެހި ސަރުކާރުން ދިނުމަށްޓަކައި އަންނަ އަހަރުން ފެށިގެން 200 މިލިއަން ރުފިޔާ ދައުލަތުގެ ބަޖެޓުން ޚާއްސަ ކުރާނެ ކަމަށް ވެސް ރައީސް މުއިއްޒު ވިދާޅުުވިއެވެ.
ރައީސް ދެއްވާ ޚާއްސަ ސްކޮލަރޝިޕާއި، ހައި އެޗީވަރސް ސްކޮލަރޝިޕް ހާސިލުކުރި ދަރިވަރުންގެ ތެރެއިން މަތީ ސާނަވީ އިމްތިހާނުތަކުގެ 5 މާއްދާއިން އެންމެ މަތީ ގްރޭޑް ހޯދާފައިވަނީ، 136 ދަރިވަރުންނެވެ. އަދި ރައީސް ދެއްވާ ޚާއްސަ ސްކޮލަރޝިޕް 19 ދަރިވަރުން ހާސިލުކޮށްފައިވެއެވެ. އޭގެ އިތުރުން 117 ދަރިވަރަކު ވަނީ ފަސް މާއްދާއިން "އޭ" ގްރޭޑް ނުވަތަ އެއަށްވުރެ މަތީ ގްރޭޑެއް ހޯދައި ހައި އެޗީވަރސް ސްކޮލަރޝިޕް ހާސިލުކޮށްފައެވެ.
