ގާޒާ ސިޓީގެ ކައިރޯ ސްކޫލަށް އިޒްރޭލުން ބޮން އަޅައިފި، މިއީ ބޮން އެޅި 9 ވަނަ ސްކޫލް
19 ޖުލައި 2024 | ހުކުރު 01:48އިޒްރޭލުން މިހާރު މުޅިންހެން ކަހަލަ ގޮތަކަށް ހަމަލާތައް ދެމުން ގެންދަނީ ގެދޮރު ގެއްލިފައިވާ ފަލަސްތީން މީހުން ދިރިއުޅޭ ރެފިއުޖީ ކޭމްޕް ތަކަށެވެ.
ގާޒާ ސްޓްރިޕްގެ މެދުތެރޭގައި ހުންނަ ދާރުލް ބަލާހް ރެފިއުޖީ ކޭމްޕަށް ބޮން އެޅުމުގެ ސަބަބުން މަރުވެފައިވާ ކުޑަކުދިންތަކެއްގެ ހަށިގަނޑު ގެންދަނީ
އިޒްރޭލުން ގާޒާ ސިޓީގެ ގެ ކައިރޯ ސްކޫލަށް ބޮން އަޅައިފިއެވެ.
މިއީ މިދިޔަ ދެތިން ދުވަސްތެރޭގައި އިޒްރޭލުން ބޮން އެޅި ނުވަ ވަނަ ސްކޫލެވެ.
މި ހަމަލާގައި 10 މީހުން މަރުވި ކަމަށާއި އޭގެ ތެރޭގައި ތިން ކުޑަކުދިން ހިމެނޭ ކަމަށް ރިޕޯޓްތައް ބުނެއެވެ.
މަރުވީ، ސްކޫލް އިމާރާތުގެ ތެރޭގައި ވަގުތީ ހިޔާވަހިކަން ހޯދަމުންދާ މީހުންގެ ތެރޭގައި ހިމެނޭ މީހުން ކަމަށް ޚަބަރުތައް ބުނެއެވެ.
މީގެ އިތުރުން ގާޒާ ސްޓްރިޕްގެ މެދުތެރޭގައި ހުންނަ ބުރެއިޖް ރެފިއުޖީ ކޭމްޕުގެ ގެއަކަށް ހަމަލާ ދިނުމުގެ ސަބަބުން މަދުވެގެން ފަސް މީހުން މަރުވެފައިވާ ކަމަށް އަލްޖަޒީރާ އިން ބުނެފައިވެއެވެ.
އަލް-އަގްސާ މާޓިއާރސް ހޮސްޕިޓަލުގެ ތަޅުންގަނޑުގެ މަތީގައި އިޒްރޭލުގެ ހަމަލާތަކުގައި މަރުވެފައިވާ މީހުންގެ ހަށިތައް ހުންނަ މަންޒަރުތައް ވަނީ އާންމު ވެފައެވެ. އޭގެ ތެރޭގައި މަރުވެފައި ތިބި ތުއްތު ކުދިންގެ މަންޒަރުތައް ވެސް ހިމެނެއެވެ.
ޚާން ޔޫނިސްގައި ހުންނަ އަލް-އާމާލް ހޮސްޕިޓަލްގެ ގޯތި ތެރޭގައި ވަޅުލާފައި ވަނިކޮށް ފެނުނު 12 މީހެއްގެ ހަށިގަނޑު ސިއްހީ އޮފިޝަލުން ވަނީ ނަގައިގެން ގެންގޮސް އެހެން ތަނެއްގައި ވަޅުލާފައެވެ.
އިންޓަރނޭޝަނަލް ކޮމިޓީ އޮފް ދަ ރެޑް ކްރޮސް އިން ބުރާސްފަތި ދުވަހު ހާމަ ކޮށްފައިވާ ގޮތުގައި އިޒްރޭލްގެ ހަމަލާތަކުގެ ޒަޚަމްވާ މީހުންގެ އަދަދު ގިނަކަމުން އެ ޖަމާއަތުން ހިންގާ 60 އެނދުގެ ފީލްޑް ހޮސްޕިޓަލް ގެ ފުލް ކެޕޭސިޓީ އަށް ވުރެ މައްޗަށް ފަރުވާދޭން ޖެހިފައިވާކަމަށެވެ.
ހަނގުރާމަ ހިނގަމުންދާތާ ނުވަ މަސްދުވަހަށް ވުރެ އިތުރުވެފައިވާއިރު، ޔަހޫދީ ސިފައިންނާ ކުރިމަތިލަމުންދާ ހަނގުރާމަވެރިން އަދިވެސް ގެންދަނީ ހިތްވަރު ކޮށް ދޭތެރެދޭތެރެއިން ޔަހޫދީ ސިފައިންނަށް ހަމަލާތައް ދެމުންކަން ފާހަގަ ކުރެވެއެވެ. އިސްލާމިކް ޖިހާދުން ބުނެފައިވާ ގޮތުގައި ބުރާސްފަތި ދުވަހު އެ ޖަމާއަތުން ވަނީ މިސައިލް ހަމަލާތަކެއް ޔަހޫދީ ވަޒަންވެރިންނަށް އަމާޒުކޮށް ދީފައެވެ. ހަމާސްގެ އަސްކަރީ ގޮފިން ބޮމުގެ ހަމަލާތަކެއް ރަފަހްގެ ދެކުނުގައި ތިބި އިޒްރޭލުގެ ފައުޖަކަށް ދީފައިވާ ކަމަށް އެޖަމާއަތުން ވަނީ ބުނެފައެވެ.
އިޒްރޭލުން މިހާރު މުޅިންހެން ކަހަލަ ގޮތަކަށް ހަމަލާތައް ދެމުން ގެންދަނީ ގެދޮރު ގެއްލިފައިވާ ފަލަސްތީން މީހުން ދިރިއުޅޭ ރެފިއުޖީ ކޭމްޕް ތަކަށެވެ. އިޒްރޭލުން އޭގެ ސަބަބަކަށް ދައްކަނީ އެތަންތަނަކީ ހަނގުރާމަވެރިން އުޅޭ ތަންތަން ކަމަށެވެ. އެހެން ނަމަވެސް ހަމާސް އިން ގެންދަނީ އެކަން ދޮގު ކުރަމުންނެވެ. މި މަހުގެ 13 ވަނަ ދުވަހު އަލް-މަވާސީ ކޭމްޕަށް ބޮން އެޅުމުގެ ސަބަބުން މަދުވެގެން 90 ފަލަސްތީން މީހުން ވަނީ މަރުވެފައެވެ.
ގާޒާ އަށް އިޒްރޭލުން ދެމުންދާ ހަމަލާތަކުގައި އޮކްޓޯބަރު 7 ގެ ފަހުން ފަލަސްތީނުން މަރުވި މީހުންގެ އަދަދު 38،848ށް ވުރެ މައްޗަށް ވަނީ ގޮސްފައެވެ. ޒަޚަމްވި މީހުންގެ އަދަދު 89،459ށް ވުރެ މައްޗަށް ގޮސްފައިވާ ކަމަށް ގާޒާގެ ސިއްހަތާ ބެހޭ ވުޒާރާއިން ބުނެފައިވެއެވެ.
