"ބާސެލޯނާގައި ހަމަލާ ދިން މީހުން ސިޓީގެ އެކި މޮނިއުމެންޓްތަކަށް ހަމަލާ ދޭން ރާވާފައިވޭ"

ސްޕެއިންގެ ބާސެލޯނާގައި އޯގަސްޓް 17 ވަނަ ދުވަހު ވޭނެއް ބޭނުންކޮށްގެން ހަމަލާ ދިނުމުގައި ބައިވެރިިވި މީހުން ބާސެލޯނާގެ އެކި ތަންތަނަށް ހަމަލާ ދޭން ރާވާފައިވާ ކަމަށް ހަމަލާ ދިނުމުގައި ތުހުމަތު ކުރެވުނު މީހަކު ޝަރީއަތުގެ މަޖިލީހުގައި ބުނެފިއެވެ.

ޝަރީއަތުގެ މަޖިލީހުގައި މުިހައްމަދު ހޫލީ ޗެމްލަލް މިހެން ބުނިއިރު އޭނާއަކީ މިހާރު ސްޕެއިންގެ ފުލުހުން މަރާނުލާ ތިބި ހަތަރު މީހުންގެ ތެރެއިން އެކަކެވެ. ޗެމްލަލް އާއި ޑްރިސް އޯކަބީރުގެ މައްޗަށް ދައުވާ ކުރެވެނީ ގަސްތުގައި މީހަކު މަރާލުމުގެ ދައުވާ އާއި ޓެރަރިސްޓް ޖަމާއަތެއްގެ މެމްބަރެއްގެ ގޮތުގައި ހަރަކާތްތެރިވާތީ އޭނާގެ މައްޗަށް ކުރެވޭ ދައުވާ އެވެ.

ހޫލީ ޗެމްލަލް ޝަރީއަތުގެ މަޖިލީހުގައި ބުނީ ހަމަލާ ދިނުމުގައި ބައިވެރިވި މީހުންނާ މެދު އޭނާއަށް އެނގިފައިވާ ގޮތުން، ހަމަލާ ދިނުމަށް މަދުވެގެން ދެ މަސް ދުވަހު އެމީހުން މަސައްކަތް ކޮށްފައިވާ ކަމަށެވެ.

ހަަމަލާ ދިން ކަމަށް ތުހުމަތު ކުރެވުނު ސަލާހް އަލް-ކާރިބު ތަހުގީގަށް ބަންދުކޮށްފައިވާއިރު މުހައްމަދު އާލްލާ ވަނީ ކަފާލާތުގެ ދަށުން ދޫކޮށްލާފައެވެ.

ބާސެލޯނާގައި ދިން ހަމަލާ ދިނުމުގައި އިސްކޮށް ހުރި މީހާ ކަމަށް ބެލެވޭ މީހާ މީގެ ދެތިން ދުވަހެސް ކުރިން ސްޕެއިން ފުލުހުން ވަނީ ބަޑި ޖަހާ މަރާލާފައެވެ. މޮރޮކޯ އަށް އުފަން ޔޫނުސް އަބޫޔައުގޫބު މަރާލީ ބާސެލޯނާގެ 40 ކިލޯމީޓަރު ދުރުން ހުޅަނގުގެ ސަރަހައްދަކުން، ސްޕެއިން ފުލުހުންނަށް ލިބުުނު މައުލޫމާތަކާ ގުޅިގެން ދިން ހަމަލާއެއްގައެވެ.

ބާސެލޯނާގެ ލަސް ރަމްބްލަސް އެވެނިއު ސަރަހައްދުގައި ދިން ހަމަލާގައި 15 މީހުން މަރުވެފައި ވެއެވެ. އަދި 100 އަށް ވުރެ ގިނަ މީހުން ޒަޚަމްވިއެވެ.

ބާސެލޯނާގައި ދިން ހަމަލާ އަށް ފަހު އޭގެ ގަނޑިއިރުތަކެއް ފަހުން ސްޕެއިންގެ ޓައުނެއް ކަމަށްވާ ކެމްބްރިލްސްގައި ވެސް ވަނީ ހަމަލާއެއް ދީފައެވެ. ފޭކް އެކްސްޕްލޮސިވް ބެލްޓްތަކެއް ބޭނުންކޮށްގެން ފަސް މީހަކު ވެގެން ކާާރެއް އާންމުންގެ ތެރެއަށް ދުއްވައި އަދި އެމީހުން ވަނީ ވަޅިން ވެސް މީހުންނަށް ހަމަލާ ދީފައެވެ. މިހަަމަލާ ދިން އެންމެން ފުލުހުން މަރާލައިފައިވާއިރު ހަމަލާ ދިން މީހުން ވަނީ އަންހެނަކު މަރާލާފައެވެ.

ބާސެލޯނާ ސިޓީގަޔާއި އަދި ލަސް ރަމްބްލަސް ޓައުންގައި ދިން ހަމަލާގެ ޒިންމާ ނަގާފައި ވަނީ އިސްލާމިކް ސްޓޭޓް (އައިއެސް) އިންނެވެ.