ރައީސް މުއިއްޒު އުޅުއްވަނީ އެމަނިކުފާނަށް ލިބޭ އާމްދަނީ ވެސް ދެކޮޅު ނުޖެއްސިގެން: ޔާމީން
މި ސަރުކާރުން އަޒުލުކުރާ ހިސާބަށް ދިޔަ ނަމަވެސް އެކަން ރައްޔިތުން މަޖިލީހުގެ ތެރެއިން ނުކުރެވޭނެ
ކުރީގެ ރައީސް އަބްދުﷲ ޔާމީނާއި، މިހާރުގެ ރައީސް ޑރ.މުހައްމަދު މުއިއްޒު
ރައީސް ޑރ.މުހައްމަދު މުއިއްޒު އުޅުއްވަނީ އެމަނިކުފާނަށް ލިބޭ އާމްދަނީ ވެސް ދެކޮޅު ނުޖެއްސިގެން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ ޕީއެންއެފް ޖަލްސާގެ އޯޑިއަންސްގައި އިންނަވައި ޔާމީން ވަނީ ޕީއެންސީގެ ރައްޔިތުންގެ މަޖިލީހުގެ މެންބަރުންނަށް 50،000 ރުފިޔާ ދޭ މައްސަލައަށް އަލިއަޅުއްލައްވައި ސުވާލު އުފައްދާފައެވެ. އަދި ޕީއެންސީގެ ޕާލިމެންޓްރީ ގުރޫޕްގެ މެންބަރުންނަށް ރައީސް މުއިއްޒު ފޮނުއްވި މެސެޖެއް ކިޔައިދެއްވާފައެވެ.
ޔާމީން ވިދާޅުވީ 50،000 ރުފިޔާ ދޭ ކަމަށް މީޑިއާތަކުގައި ރިޕޯޓުކުރުމުން ރައީސް މުއިއްޒު ޕާލިމެންޓްރީ ގުރޫޕްގެ މެންބަރުންނަށް ފޮނުއްވި މެސެޖްގައި ފައިސާ ދޭނީ ކިހިނެތްތޯ ސުވާލު ކުރެއްވި ކަމަށެވެ. އަދި ފައިސާ ލިބޭ މެންބަރުންގެ ތެރޭގައި ހިމެނޭ މެންބަރަކު އެ މެސެޖަށް ޖަވާބު ދެއްވި ކަމަށާއި، ފައިސާ ނުލިބޭ ކަމަށް ވިދާޅުވި ކަމަށެވެ. އަދި އެއާއެކު ރައީސް މުއިއްޒަށް ލިބޭ އެއްޗަކުން ވެސް ދެކޮޅު ނުޖެހޭ ކަމަށް އެމަނިކުފާނު އަމިއްލައަށް ވިދާޅުވެފައިވާ ކަަމަށް ޔާމީން ވިދާޅުވިއެވެ.
ސަރުކާރު އަޒުލުކުރުމާ ގުޅޭގޮތުން ޔާމީން ވިދާޅުވީ މިސަރުކާރުން އަޒުލުކުރާ ހިސާބަށް ދިޔަ ނަމަވެސް އެކަން ރައްޔިތުން މަޖިލީހުގެ ތެރެއިން ނުކުރެވޭނެ ކަމަށެވެ.
ރައީސް ޑރ.މުހައްމަދު މުއިއްޒު އުޅުއްވަނީ އެމަނިކުފާނަށް ލިބޭ އާމްދަނީ ވެސް ދެކޮޅު ނުޖެއްސިގެން ކަމަށް ޔާމީން ވިދާޅުވެފައިވާއިރު، ރައީސް މުއިއްޒުގެ މުސާރައަކީ 100،000 ރުފިޔާއެވެ.
ޕީއެންސީގެ މެންބަރުންނަށް ރައީސް މުއިއްޒު 50،000 ރުފިޔާދޭ ވާހަކަ ސަރުކާރުން ދޮގުކުރެއެވެ. ނަމަވެސް އަދަދު ނޫހަށް ޕީއެންސީގެ މެންބަރުން ވަނީ ފައިސާދޭކަން ކަށަވަރުކޮށްދީފައެވެ.
ޕީއެންސީގެ މެންބަރުންނަށް ރައީސް މުއިއްޒު 50،000 ރުފިޔާދޭ މައްސަލަ އެންޓި ކޮރަޕްޝަން ކޮމިޝަން (އޭސީސީ)އިން ތަހުގީގު ކުރުމަށް އިދިކޮޅު މެންބަރުން ދަނީ ގޮވާލަމުންނެވެ. ނަމަވެސް އޭސީސީން ބުނެފައިވަނީ އެމައްސަލަ އެއްވެސް ފަރާތަކުން ރަސްމީކޮށް ހުށަހަޅާފައިނުވާ ކަމަށާއި، އެމައްސަލަ ތަހުގީގު ނުކުރާ ކަމަށެވެ.
ޕީއެންސީގެ 75 މެންބަރުން މަޖިލީހުގައި ތިއްބަވާއިރު އެ މެންބަރުންނަށް 50،000 ރުފިޔާ ދޭން މަހެއްގެ މައްޗަށް 3.75 މިލިއަން ރުފިޔާ ހޭދަވާނެ އެވެ. އެ މެންބަރުންނަށް ފައިސާ ދޭ ގޮތް ނޭނގޭއިރު، ރާއްޖޭގެ އިގްތިސާދު ވަނީ ވަރަށް ބޮޑު އަދަވަޅަކަށް ވެއްޓިފައި ކަމަށް ސަރުކާރުން ބުނެއެވެ.
