ފަލަސްތީނުގައި އިޒްރޭލުން ހިންގާ ގަތުލުއާންމަކީ އެމެރިކާގެ ފުރިހަމަ ސަޕޯޓާ އެކު ހިންގާ ޖަރީމާތަކެއް ކަމުގައި ސުލްހައަށް މަސައްކަތް ކުރާ ޔަހޫދީންގެ ޖަމްއިއްޔާ އަކުން ބުނެފިއެވެ.

އެމެރިކާގައި ގާއިމް ވެފައިވާ ދަ ޖުވިޝް ވޮއިސް ފޯ ޕީސް އިން ސޯޝަލް މީޑިއާގައި އަންގާރަ ދުވަހު ކޮށްފައިވާ ޕޯސްޓް ތަކެއްގައި ބުނެފައިވަނީ، "އިޒްރޭލު ސަރުކާރުން ގަތުލުއާންމުތައް ހަލުއި ކަމާއެކު ކުރިއަށް ގެންދަނީ އެމެރިކާގެ ފުރިހަމަ ސަޕޯޓް އާ އެކު،" ކަމަށެވެ.

އެ ޖަމާއަތުން ވަނީ ޖޯބައިޑްންގެ ސަރުކާރުން ފަލަސްތީން ރައްޔިތުންނާ ދެކޮޅަށް އިޒްރޭލުން ހިންގާ ގަތުލުއާންމުތަކަށް އެހީތެރިވެ ދޭ ކަމަށް ބުނެ، އިޒްރޭލާ ދެކޮޅަށް ފިޔަވަޅު އެޅުމަށް ގޮވާލާފައެވެ.

ޖޯ ބައިޑްންގެ ސަރުކާރުން ވަނީ އިޒްރޭލަށް ބަރު ހަތިޔާރު ފޯރުކޮށް ދިނުން މެދުކަނޑާލާފައި އޮތް އޮތުން ނިމުމަކަށް ގެނެސް 500 ޕައުންޑުގެ ބާރުގަދަ ބޮން އިޒްރޭލުގެ އަސްކަރިއްޔާ އަށް ފޯރުކޮށް ދިނުމުގެ މަސައްކަތް އަލުން ފަށާފައެވެ. އެމެރިކާގެ މީޑިއާ އިން ވެސް ވަނީ މިކަން ކަށަވަރު ކޮށްދީފައެވެ.

އެމެރިކާ އިން އިޒްރޭލަށް ސަޕްލައި ކޮށްދޭ 2000 ޕައުންޑާ އާއި 500 ޕައުންޑުގެ ބާރުގަދަ ބޮން ސަޕްލައި ކުރުން މަޑު ޖައްސާމީ މިދިޔަ މެއި މަހު އިޒްރޭލް ސިފައިން ގެދޮރު ގެއްލިފައިވާ 1.5 މިލިއަން ފަލަސްތީނު ރެފިއުޖީން އުޅެމުންދާ ރަފަހް އަށް އެއްގަމު މަގުން އަރަން އުޅޭ ކަމުގެ ވާހަކަތައް ފެތުރުމާއެކުގައެވެ.