އަޒުމީލަށް ފަރުވާދިނުމަށް ހޮސްޕިޓަލަށް ގެންދިއުމުގެ ބަދަލުގައި ގެންދިޔައީ މާލޭ ކަސްޓޯޑިއަލް މެޑިކަލްއަށް
17 ޖުލައި 2024 | ބުދަ 13:54މާލޭ ކަސްޓޯޑިއަލް އަށް ގެންގޮސް ކަސްޓޯޑިއަލް މެޑިކަލް އޮފިސަރުން ބެލުމަށްފަހު އައިޖީއެމްއެޗްއަށް ގެންދިޔައީ 3:05 ގައި
ފުލުހުންގެ މައި އިދާރާ
ޑްރަގް ކޯޓަށް ހާޒިރުކުރުމަށް ބަލާ ދިއުމުން ފިލަން އުޅުނުކަމަށް ފުލުހުން ބުނާ މުހައްމަދު އަޒްމީލް ޖަލީލަށް ފަރުވާދިނުމަށް ހޮސްޕިޓަލަށް ގެންދިއުމުގެ ބަދަލުގައި ގެންދިޔައީ މާލޭ ކަސްޓޯޑިއަލް މެޑިކަލްއަށްކަން ހާމަވެއްޖެއެވެ.
މުހައްމަދު އަޒްމީލް ޖަލީލަށް ލިބުނު އަނިޔާތަކާއި ގުޅިގެން މިހާރު ފަރުވާދެމުންދަނީ އައިޖީއެމްއެޗްގެ އިންޓެންސިވް ކެއަރ ޔުނިޓުގެ ވެންޓިލޭޓަރުގައެވެ. މިކަމާއި ގުޅިގެން ފުލުހުން ނެރުނު ނޫސްބަޔާނުގައި ބުނެފައިވަނީ ކ. މާލެ މ. ދޯޅަބުގެ، މުހައްމަދު އަޒްމީލް ޖަލީލު (38އ) ބަންދުގައި ބަހައްޓައިގެން 16 ވަނަ ދުވަހުގެ 1:00ށް ޑްރަގް ކޯޓަށް ހާޒިރުކުރުމަށް ފުލުހުންގެ މައްޗަށް ކޮށްފައިވާ އަމުރަކާއި ގުޅިގެން އޭނާ ހައްޔަރުކުރަން ފުލުހުން ދިއުމުން ފިލަން އުޅުމުގެ ތެރޭގައި އޭނާއަށް އަނިޔާވެ އައިޖީއެމް ހޮސްޕިޓަލުގައި ދަނީ ފަރުވާ ދެމުން ކަމަށެވެ.
އަދި އޭނާއަށް އަނިޔާވެފައިވަނީ 15 ވަނަ ދުވަހުގެ މެންދުރު 2:15 ހާއިރު ފުލުހުން އޭނާ ދިރިއުޅޭ ގެއަށް ދިއުމުން، ތައްޔާރުވެގެން އައުމަށް ވަގުތުކޮޅެއް ދޭން ބުނުމަށްފަހު، އެ ގޭގެ ފުރަތަމަ ފަންގިފިލާގެ ކުޑަދޮރުން ނުކުމެ ފިލަން އުޅުމުގެ ތެރޭގައި މަގުމައްޗަށް ވެއްޓުމުން ކަމަށެވެ. އަދި މި ހާދިސާގައި އޭނާގެ ބޯ ފަޅައިގެން ގޮސް އިތުރު އަނިޔާތަކެއް ވެފައިވާ ކަމަށެވެ. އަދި އޭނާއަށް މިހާރު ފަރުވާދެމުންދަނީ އައިޖީއެމް ހޮސްޕިޓަލުގެ އިންޓެންސިވް ކެއަރ ޔުނިޓުގެ ވެންޓިލޭޓަރުގައިކަަމަށް ބުނެފައިވެއެވެ.
ފުލުހުން ބުނީ އޭނާ އައިޖީއެމް ހޮސްޕިޓަލަށް ގެންގޮސްފައިވަނީ ދިވެހި ފުލުހުންގެެ ހިދުމަތުގެ މާލޭ ކަސްޓޯޑިއަލް އަށް ގެންގޮސް ކަސްޓޯޑިއަލް މެޑިކަލް އޮފިސަރުން ބެލުމަށްފަހު 15 ވަނަ ދުވަހުގެ 3:05 ހާއިރު ކަމަށެވެ. އޭނާއަށް އަނިޔާވެގެން މެޑިކަލްއަށް ގެންގޮސް ބެލުމަށްފަހު އައިޖީއެމްއެޗްއަށް ގެންދިއުމާއި ދެތެރޭގައި ނެގީ ކިހާވަގުތެއްކަމެއް ފުލުހުން ނުބުނެއެވެ.
ފުލުހުން ބުނީ އަޒްމީލް ހައްޔަރުކުރުމުގައި ފުލުހުން އަމަލުކޮށްފައިވާ ގޮތާއިމެދު އާއިލާގެ ކަންބޮޑުވުން ހުރުމާއެކު، ހައްޔަރު ކުރުމުގައި އަމަލުކޮށްފައިވާގޮތް ބެލުމަށް، ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑް، ނެޝަނަލް އިންޓެގްރިޓީ ކޮމިޝަން އަދި ހިއުމަން ރައިޓްސް ކޮމިޝަންގައި ދިވެހި ފުލުހުންގެ ހިދުމަތުން އެދިފައިވާނެކަމަށެވެ.
