ޙައްޖަށް މީހުން ގެންދިއުމުގެ ހުއްދަ ހަތަރު ގްރޫޕަކަށް
ހުއްދަ ދީފައިވަނީ ޙައްޖު ކޯޕަރޭޝަންގެ އިތުރުން 3 ގްރޫޕަކަށް
ޙައްޖަށް ދިއުމަށް ބަޔަކު ފުރަން ތައްޔާރުވެގެން
ކުރިއަށް މިދާ 1438 ވަނަ އަހަރު ޙައްޖުގެ މަތިވެރި އަލުކަން އަދާކުރުމަށް ދިވެހި ޙައްޖާޖީން މައްކާއަށް ގެންދިއުމުގެ ހުއްދަ 4 ގްރޫޕަކަށް ދިނުމަށް ސަރުކާރުން ނިންމާއިފިއެވެ.
މިނިސްޓްރީ އޮފް އިސްލާމިކް އެފެއާޒުން ބުދަ ދުވަހު ނެރުނު އިޢުލާނެއްގައި ބުނެފައިވަނީ، މި އަހަރު ޙައްޖަށް މީހުން ގެންދިއުމުގެ ހުއްދަ 4 ގްރޫޕަކަށް ދީފައިވާ ކަމަށާ، އެ ގްރޫޕްތަކަކީ، މޯލްޑިވްސް ޙައްޖު ކޯޕަރޭޝަން ލިމިޓެޑާއި، އަލްޙަރަމައިން ޙައްޖު އެންޑް ޢުމްރާ ކޮމްޕެނީ މޯލްޑިވްސް ޕްރައިވެޓް ލިމިޓެޑާއި، ސިސިލްފަރު ޙައްޖު އެންޑް ޢުމްރާ ގްރޫޕް ޕްރައިވެޓް ލިމިޓެޑްގެ އިތުރުން ޒަޢީ ޙައްޖު ގްރޫޕް ޕްރައިވެޓް ލިމިޓެޑް ކަމަށެވެ.
މިނިސްޓްރީގެ އިއުލާނުގައި ބުނެފައިވަނީ، އެ މިނިސްޓްރީން ކުރިން ކޮށްފައިވާ "1438 ވަނަ އަހަރު ދިވެހިރާއްޖެއިން ޙައްޖަށް މީހުން ގެންދިއުމުގެ ހުއްދަ ދިނުމާއި ބެހޭ" އިޢުލާނު ބާޠިލްކޮށް، އަލުން އެ ހުއްދަ ދިނުމަށް ސަރުކާރުން ނިންމާފައިވާ ކަމަށެވެ.
އެގޮތުން، ޙައްޖަށް މީހުން ގެންދިއުމަށްޓަކައި، ގްރޫޕްތަކުން ހަމަޖައްސަންޖެހޭ އިންތިޒާމްތައް ހަމަޖެއްސުމަށް ވަގުތު ކުޑަތަންވެފައިވުމާއި، ޙައްޖާޖީންގެ ދަތުރުތައް ހަމަޖެއްސުމުގައި އެއާލައިންތަކުން ކުރިމަތިވެދާނެ ދަތިތަކެއް ހުރިކަމަށް ސަރުކާރަށް ފެންނާތީ، ޙައްޖަށް މީހުންގެންދާނެ ކުންފުނިތަކެއް ކަނޑައެޅުމަކީ އެންމެ މަޞްލަޙަތު ހުރި ގޮތް ކަމަށް ސަރުކާރުން ދެކޭ ކަމަށްވެސް މި އިޢުލާނުގައި ވެއެވެ. އަދި މިއީ މިފަދަ ނާޒުކު ޙަލަތެއްގައި ދިވެހި ޙައްޖާޖީންނަށް ޙައްޖުގެ މަތިވެރި އަޅުކަން އަދާކުރުމުގައި ސަރުކާރުން ފޯރުކޮށްދޭން ޖެހޭ އެންމެހާ އެހީތެރިކަން ފޯރުކޮށްދިނުމުގެ ގޮތުން ނިންމި ނިންމުމެއް ކަމަށްވެސް އިސްލާމިކް މިނިސްޓްރީގެ އިޢުލާނުގައިވެއެވެ.
ޙައްޖަށް މީހުން ގެންދިއުމަށް ގްރޫޕްތަކަށް ހުއްދަ ދިނުމުގައި ވަރަށް ބޮޑަށް ކޮރަޕްޝަން ހިންގާކަމަށް މިނިސްޓްރީގެ އޮފިޝަލެއް ކަމަށް ބެލެވޭ މީހަކު ދައްކާފައިވާ ވާހަކަތަކެއްގެ އޯޑިއޯ މީގެ ކުރިން ވަނީ ލީކުވެފައެވެ. އަދި އެ އޯޑިއޯ އާއި ގުޅިގެން ޙައްޖަށް މީހުންގެންދާ ބައެއް ގްރޫޕްތަކުން ވަނީ މި މައްސަލަ ކަމާބެހޭ ފަރާތްތަކަށްވެސް ހުށަހަޅާފައެވެ.
