ދުސްތޫރީ ލަފާގެ ބަދަލުގައި ބަންޑާރަ ނައިބު ދެއްވަނީ ރައީސް ޔާމީން ބޭނުންފުޅުވާ ލަފާ:ހިސާން
29 ޖޫން 2017 | ބުރާސްފަތި 18:28ބަންޑާރަ ނައިބު ޢަމަލް ކުރައްވަނީ ގާނޫނީ އިމުގެ ބޭރުން
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ހިސާން ވާހަކަ ދައްކަވަނީ
ޤާނޫނީ ކަންކަމުގައި ދުސްތޫރީ ލަފާ ދެއްވުމަށްވުރެ ބަންޑާރަ ނައިބު މުހައްމަދު އަނިލް ދެއްވާތީ ފެންނަނީ ޤާނޫނާ ޚިލާފްވިއަސް ރައީސް ޔާމީން ބޭނުންފުޅުވާހާ ލަފާ ކަމަށް މަޝްހޫރު ޤާނޫނީ ވަކީލް ހިސާން ހުސައިން ވިދާޅުވެއްޖެއެވެ.
ހިސާން މިހެން ވިދާޅުވީ ރާއްޖެ ޓީވީން ބުރާސްފަތި ދުވަހުގެ ރޭ ގެނެސްދިން ފަލަ ސުރުޚީ ޕްރޮގްރާމްގައި ވާހަކަ ދައްކަވަމުންނެވެ.
ކުރީގެ ނައިބު ރައީސް އަހުމަދު އަދީބަށް ސިއްޙީ ފަރުވާ ފޯރުކޮށް ދިނުމާ ގުޅޭ ގޮތުން ސަރުކާރުގެ ފަަރާތުން ބަންޑާރަ ނައިބު މުހައްމަދު އަނިލް ދެއްކެވި ވާހަކަފުޅު ތަކަށް އިޝާރާތް ކުރައްވާ ހިސާން ވިދާޅުވީ ޤާނޫނުއަސާސީއާއި ރާއްޖޭގެ ޤާނޫނުތައް ބުނާ ގޮތުން ކޮންމެ މީހަކަށްވެސް އިންސާނަކަށް ވީތީ ސިއްޙީ ފަރުވާއަކީ ލިބިދޭން ޖެހޭ އަސާސީ ހައްޤުތަކެއް ކަމަށާއި ޖަލުގައި ބަންދުކޮށްފައިވާ މީހަކަށްވެސް އެ ޙައްޤު ފޯރުކޮށްދޭނެ ޤާނޫނީ އިޖުރާއަތްތަކެއް ހުންނަ ކަމަށެވެ. އެހެންކަމުން އެއިޖުރާއަތުގެ ބޭރުން އެއްވެސް ފަރާތަކާމެދު އަމަލެއް ނުކުރެއްވޭނެ ކަމަށާއި އަދީބަށް ފަރުވާ ނުދެއްވުމަށް ސަރުކާރުގެ ފަރާތުން ބަންޑާރަ ނައިބު ދެއްކެވި ވާހަކަތަކަކީ ދެއްކެވޭނެ ވާހަކަ ތަކެއް ނޫން ކަމަށެވެ.
ހިސާން ވިދާޅުވީ ދައުލަތުގެ ބަންޑާރަ ނައިބުގެ ޤާނޫނީ ޒިންމާ އަދާނުކުރައްވާ ކަމަށާއި އެމަނިކުފާނު ދުސްތޫރީ ލަފާ ދެއްވުމަށްވުރެ ކުަރައްވަމުން ގެންދަވަނީ ރައީސް ޔާމީން ބޭނުންފުޅުވާހާ ގޮތަކަށް ލަފާ ދެއްވުން ކަމަށެވެ.
"ދިވެހިރާއްޖޭގެ ބަންޑާރަ ނައިބުގެ ޤާނޫނީ ދުސްތޫރީ ނިޒާމް އަދާކުރައްވާ ތަނެއް ނުފެނޭ. އޭގެ ބަދަލުގައި އަބަދުވެސް ފެންނަނީ ރައީސް ޔާމީން ބޭނުންފުޅުވާ ގޮތަށް ލަފާ ދެއްވާ މަންޒަރު. ޤާނޫނުއަސާސީއާ ޚިލާފަށް މަޖިލީހުން ޤާނޫނެއް ފާސްކުރެއްވިއަސް ޤާނޫނާ ޚިލާފަށް ސިޔާސަތެއް ރައީސް ޔާމީން ހިންގެވިކަމަށް ވިއަސް މިފެންނަނީ އާދެ މަނިކުފާނު ވަރަށް ރަނގަޅޭ ތިކަންތައް ކުރައްވާ ގޮތް. ތިކަން ތިގޮތަށް ކުރެއްވޭނެޔޭ ވިދާޅުވާ މަންޒަރު. ވަރަށް ބޮޑަށް 'ޔެސް މޭން' އޭ ވިދާޅުވާ ކަހަލަ ގޮތަކަށް" ހިސާން ވިދާޅުވިއެވެ.
ހިސާން ވިދާޅުވީ މިއަދު މިހުންނެވި ބަންޑާރަ ނައިބު މުހައްމަދު އަނިލް މަސައްކަތް ކުރައްވަނީ ޤާނޫނާ އެއްގޮތަކަށް ނޫން ކަމަށާއި އެމަނިކުފާނު ދެއްވާ ޤާނޫނީ ލަފަޔަކީ ރައީސް ޔާމީން ރުއްސަން ދެއްވާ ސިޔާސީ ލަފައެއް ކަމަށެވެ. އެމަނިކުފާނު ދެއްވާ ޤާނޫނީ ލަފަޔަކީ ރައީސް ޔާމީނަށް ދެއްވާ ޤާނޫނީ ލަފައެއް ކަމަށާއި މިނިވަން މުސްތަޤިއްލު ކޯޓެއްގައި އެލަފާ ތަކަކީ އެއާމެދު ގޮތެއް ނިންމައިފިނަމަ އެކޯޓަކުން އެލަފާ ބޭރުކޮށްލައްވާނެ ފަދަ ލަފާތަކެއް ކަމަށް ހިސާން ވިދާޅުވި އެވެ.
