އޮމާންގެ މިސްކިތެއްގައި ހިނގި ބަޑިޖެހުމުގެ ހާދިސާ އެއްގައި އެތައް ބަޔަކު މަރުވެއްޖެ
16 ޖުލައި 2024 | އަންގާރަ 16:14މި ހާދިސާގައި އެކި ގައުމުތަކަށް ނިސްބަތްވާ އެތައް ބަޔަކު ޒަޚަމްވެފައިވާ ކަމަށް އޮމާންގެ ފުލުހުން ވަނީ ބުނެފައެވެ.
ރޮއިޓާސް ނިއުސް އެޖެންސީއަށް ލިބިފައިވާ އަދި ވެރިފައި ކުރެވިފައިވާ ވީޑިއޯއަކުން ފެންނަ ގޮތުގައި އޮމާންގެ އިމާމް ބަރްގާހް އަލީ ބިން އަބޫ ތާލިބް މިސްކިތުގައި ބަޑިޖެހި ވަގުތު މީހުން ދުވަމުން ދިޔަތަން
އޮމާންގެ މިސްކިތެއްގައި ބަޑިޖެހުމުގެ ހާދިސާ އެއް ހިނގާ އެތައް ބަޔަކު މަރުވެ، އިތުރު އެތައް ބަޔަކު ޒަޚަމްވެއްޖެއެވެ.
ހޯމަ ދުވަހުގެ ރޭ މިކަން ހިނގީ ޝިއާއީ މުސްލިމުން އާޝޫރާ ދުވަސް ފާހަގަ ކުރުމަށް މިސްކިތަކަށް ޖަމާވެފައި ވަނިކޮށް ތިން މީހަކު އައިސް މިސްކިތުގައި ތިބި މީހުންނަށް އަމާޒް ކޮށް ބަޑި ޖެހުމުގެ ސަބަބުން ކަމަށް މީޑިއާ ރިޕޯތްތައް ބުނެއެވެ.
ޚަބަރުތައް ބުނާ ގޮތުގައި ބަޑިޖެހި މީހުންނާ ދިމާލަށް އޮމާންގެ ފުލުހުންވެސް ވަނީ ބަޑިޖަހާފައެވެ.
ވެރިރަށް މަސްކަތު ގެ ވާދީ ކަބީރު ގައި ހިނގި މިހާދިސާ އާ ބެހޭ ގޮތުން އޮމާންގެ ފުލުހުން ހާމަ ކޮށްފައިވާ ގޮތުގައި ބަޑިޖެހުމުގެ ހާދިސާގައި މަރުވި މީހުންގެ ތެރޭގައި އާންމުންގެ ތިން މީހުންނާއި، ފުލުހަކާއި، އަދި ބަޑި ޖެހުމުގައި ބައިވެރިވި ތިން މީހުން ހިމެނެއެވެ.
މަރުވި މީހުންގެ ތެރޭގައި ޕާކިސްތާނުގެ ދެ ރައްޔިތުން ހިމެނޭ ކަމަށް ޚަބަރުތައް ބުނެއެވެ.
އަދި އެކި ގައުމުތަކަށް ނިސްބަތްވާ 28 މީހުން މި ޙާދިސާގައި ޒަޚަމްވެފައިވާ ކަމަށް ވެސް އޮމާންގެ ފުލުހުން ބުނެފައިވެއެވެ.
