ގަވަރުނަރު ހާޝިމް ވަކިކުރުމާ މެދު މާދަމާ ކޮމިޓީން ގޮތެއް ނިންމަނީ
ނަމަވެސް ލިއުމުން މަޖިލީހަށް ޖަވާބުދާރީވެފައިވޭ
އެމްއެމްއޭގެ ގަވަރުނަރު އަލީ ހާޝިމް
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަލީ ހާޝިމް މަގާމުން ވަކި ކުރުމާމެދު ބުދަ ދުވަހު ގޮތެއް ނިންމުމަށް މަޖިލީހުގެ މާލިއްޔަތު ކޮމިޓީން ނިންމައިފިއެވެ.
އާލާސްކަންފުޅާ އުޅުއްވާކަމަށް ވިދާޅުވެ މާލިއްޔަތު ކޮމިޓީއަށް ގަވަރުނަރު ވަޑައިގެންފައި ނުވި ނަމަވެސް ލިއުމުން މަޖިލީހަށް ޖަވާބުދާރީވެފައިވެއެވެ. އެގޮތުން ރާއްޖެއަށް އިގްތިސާދީ ކާރިސާއެއް ކުރިމަތިވީ ސަރުކާރަށް ދިން އިރުޝާދުތަކާ އެއްގޮތަށް އަމަލުނުކުރުމުން ކަމަށާއި، އެ މައުލޫމާތުތައް ހިއްސާ ނުކޮށް އޮވެގެންނެއް ނޫންކަމަށް ގަވަރުނަރު ވިދާޅުވެފައިވެއެވެ.
މާލިއްޔަތު ކޮމިޓީން އަންގާރަ ދުވަހު ބޭއްވި ބައްދަލު ކުރެއްވުމުގައި ނިންމާފައިވަނީ ބުދަ ދުވަހުގެ ޖަލްސާއަށް ހާޝިމް ވަޑައިގެންނެވި ނަމަވެސް ނުވަތަ ވަޑައިނުގެންނެވި ނަމަވެސް އޭނާ ވަކި ކުރުމާމެދު ކޮމިޓީން ގޮތެއް ނިންމުމަށެވެ.
އަލީ ހާޝިމް މަގާމުން ވަކި ކުރުމުގެ މަސައްކަތް ކުރިއަށް ގެންދަން ސަރުކާރު ނިސްބަތްވާ ޕާޓީގެ މެމްބަރުން މަސައްކަތް ކުރަމުންދަނީ އެމްއެމްއޭގެ އެންމެ އިސްވެރިޔާގެ ހައިސިއްޔަތުން މަސްއޫލިއްޔަތުތައް އެންމެ ފުރިހަމަ އަށް އަލީ ހާޝިމް އަދާނުކުރައްވާ ކަމަށް ވިދާޅުވެއެވެ.
ގަވަރުނަރު އަލީ ހާޝިމް މަގާމުން ވަކި ކުރަން ސަރުކާރުން ދިމާ ކުރީ އެމަނިކުފާނު ނަޒާހަތްތެރި ކަމާއެކު މަގާމުގެ މަސްއޫލިއްޔަތުތައް އަދާ ކުރައްވަމުން ގެންދަވަނިކޮށް ކަމަށް މަޖިލީހުގެ އެމްޑީޕީ މެމްބަރުން ވިދާޅުވެފައިވެއެވެ.
ދައުލަތުގެ ހިންގުމުގެ ޚަރަދުތައް ބޮޑުވެފައިވާ ކަން އެމްއެމްއޭ އިން ހާމަ ކުރިއިރު، ސިޔާސީ މަގާމުތަކަށް ބޭނުމެއް ނެތް ގޮތައް މީހުން ލުމާއި، މާ މުހިންމު ބޭނުމަކާ ނުލާވެސް އޮފީސްތައް އުފެއްދުން ފަދަ އިސްރާފް ބޮޑު ކަންކަން މި ސަރުކާރުން ކުރަމުންދާ ކަން މޯލްޑިވިއަން ޑިމޮކްރަޓިކް ޕާޓީ އިން ވަނީ ފާހަގަ ކޮށްފައެވެ.
