މި ހިސާބަށް އާދެވިދާނެ ކަމަށް ކުރިން ޤަބޫލެއް ނުކުރަން، ކުޅުންތެރިންނާމެދު ފަޚުރުވެރިވަން: ސްކަލޯނީ

އާޖެންޓީނާ ޤައުމީ ޓީމުގެ ކުޅުންތެރިންނާމެދު ފަޚުރުވެރިވާ ކަމަށް އެ ޓީމުގެ ކޯޗު ލިއޮނަލް ސްކަލޯނީ ބުނެފި އެވެ.

އޭނާ މިހެން ބުނީ، އެމެރިކާގައި ނިމުނު ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގެ ފައިނަލް މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. ފައިނަލް މެޗުގައި އާޖެންޓީނާ އިން ވަނީ ކޮލަމްބިއާގެ މައްޗަށް ކުރި ހޯދައި، މުބާރާތުގެ ތަށި ޖެހި ޖެހިގެން ދެ ވަނަ ފަހަރަށް ކާމިޔާބު ކޮށްފަ އެވެ.

ސްކަލޯނީ ބުނީ، މެޗުގެ ދެ ވަނަ ހާފުގައި އާޖެންޓީނާގެ ކުޅުންތެރިން ވަރަށް ބޮޑަށް ކުޅުން ރަނގަޅު ކޮށްފައިވާ ކަމަށާއި، އެ މެޗުން މޮޅުވުން އާޖެންޓީނާ އަށް ޙައްޤު ކަމަށެވެ. މެޗުގެ 90 މިނެޓުގެ ކުޅުން ހަމަވެ، އިތުރަށް ކުޅުނު 15 މިނެޓުގެ ދެ ހާފުގައި އާޖެންޓީނާގެ ކުޅުންތެރިންގެ ފަރާތުން އިތުރު ހިތްވަރެއް ފެނުނު ކަމަށް ވެސް އޭނާ ބުންޏެވެ. އެއީ އެ ކުޅުންތެރިންގެ ފަރާތުން އަބަދު ވެސް ފެންނަމުން އަންނަ ސިފައެއް ކަމަށް ސްކަލޯނީ ފާހަގަ ވެސް ކުރި އެވެ.

މީގެ އިތުރުން ސްކަލޯނީ ބުނީ އާޖެންޓީނާ އަށްޓަކައި ކުޅުންތެރިން ކުރަމުން އަންނަ މަސައްކަތާއި، އެ މީހުން ދައްކަމުން އަންނަ ހިތްވަރަށް އަބަދު ވެސް އޭނާ ފަޚުރުވެރިވާ ކަމަށެވެ. އާޖެންޓީނާގެ ރައްޔިތުންނާއި، އެ ޤައުމުގެ ސަޕޯޓަރުން އުފާ ވުމަކީ އޭނާ އަށް ލިބޭ ހަމަޖެހުމެއް ކަމަށް ވެސް ސްކަލޯނީ ބުންޏެވެ. އަދި އާޖެންޓީނާ އިން މުބަރާތްތަކާ ކުރިމަތިލަނީ ވެސް އެ ޢަޒުމުގައި ކަމަށް ސްކަލޯނީ ވަނީ ބުނެފަ އެވެ.

އާޖެންޓީނާ ޤައުމީ ޓީމު މިހާރު އޮތް ހިސާބަށް އިޝާރާތް ކުރަމުން ސްކަލޯނީ ބުނީ، އެ ޓީމު މިހާރު އޮތް ހިސާބަށް އާދެވޭނެ ކަމަށް މީގެ ކުރިން އުންމީދު ވެސް ނުކުރާ ކަމަށެވެ. މިއަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތުގެ ފައިނަލް އިން އާޖެންޓީނާ މޮޅު ނުވެ މުބާރާތް ނިންމާލަން ޖެހުނު ނަމަ، އާޖެންޓީނާ އިން ދެން ވެސް ކުރިއަށް ދާނެކަން އޭނާ ފާހަގަ ކުރި އެވެ. އެއީ އަބަދު ވެސް ވިސްނަން ޖެހޭނީ ބަލިވެއްޖެ ނަމަ، އަނެއްކާ ވެސް ހިތްވަރާއެކު ތެދުވެ ކުރިއަށް ދާން ކަމަށް އޭނާ ބުންޏެވެ.

އާޖެންޓީނާގެ ކޯޗުކަމާ 2018 ވަނަ އަހަރު ސްކަލޯނީ ހަވާލުވީ ފަހުން އެ ޓީމުން ވަނީ ގިނަ ކާމިޔާބީތަކެއް ހޯދައިފަ އެވެ. 2021 ވަނަ އަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް ކާމިޔާބުކޮށް، ދެން އާޖެންޓީނާ އިން ކުރިމަތިލީ ބައްރުތަކުގެ ޗެމްޕިއަނުންގެ މެދުގައި ކުޅޭ ފައިނަލިސިމާއާ އެވެ. އެ މެޗުގައި އާޖެންޓީނާ އިން ވަނީ ޔޫރަޕުގެ ޗެމްޕިއަން އިޓަލީ ބަލިކޮށް، ފައިނަލިސިމާ ކާމިޔާބު ކޮށްފަ އެވެ.

އޭގެ ފަހުން 2022 ވަނަ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕާ ކުރިމަތިލައި، އާޖެންޓީނާ އިން އެ މުބާރާތް ވެސް ކާމިޔާބު ކުރި އެވެ. އެއީ 36 އަހަރު ފަހުން، އާޖެންޓީނާ އަށް ވޯލްޑް ކަޕް ކާމިޔާބު ކުރެވުނު ފުރަތަމަ ފަހަރެވެ. އޭގެ ފަހުން ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އާންމު ކުރާ ދުނިޔޭގެ ރޭންކިންގެ އެއް ވަނަ އަށް އާޖެންޓީނާ ޖެހިލި އެވެ. އެއް ވަނައިގައި އޮވެ އާޖެންޓީނާ އިން ވަނީ މިއަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް ވެސް ކާމިޔާބު ކޮށްފަ އެވެ.