ޓްރަމްޕަށް ދިން ޙަމަލާ ރައީސް މުއިއްޒު ކުށްވެރި ކުރައްވައިފި

އެމެރިކާގެ ކުރިއަށް އޮތް ރިޔާސީ އިންތިޚާބުގައި ވާދަ ކުރައްވާ އެ ޤައުމުގެ ކުރީގެ ރައީސް ޑޮނަލްޑް ޓްރަމްޕް އަވަހާރަކޮށްލުމަށް ދިން ޙަމަލާ ރާއްޖޭގެ ރައީސުލްޖުމްހޫރިއްޔާ ޑރ މުޙައްމަދު މުއިއްޒު ކުށްވެރި ކުރައްވައިފިއެވެ.

ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ސިޔާސީ ކަންކަމުގައި އަނިޔާވެރިކަމަށް އެއްވެސް ޖާގައެއް ނެތް ކަމަށާއި، ހުރިހާ ތަނެއްގައި ހިނގާ އެފަދަ އަނިޔާވެރި އަމަލުތައް ކުށްވެރި ކުރައްވާ ކަމަށެވެ.

ރައީސް މުއިއްޒު ވަނީ އެ ޙަމަލާ ކުށްވެރި ކުރައްވައި، ޓްރަމްޕާއި، މި ޙަމަލާގައި އަނިޔާވި މީހުންނަށް ރަނގަޅު ގޮތް ވުމަށް އެދިވަަޑައިގަންނަވާކަމަށް ވިދާޅުވެފައެވެ.

އެތައްހާސް ސަޕޯޓަރުން ޖަމާވެފައިވާ ކެމްޕޭން ރެލީއެއްގައި ވާހަކަފުޅު ދައްކަވަން ހުންނަވަނިކޮށް ޓްރަމްޕަށް އަމާޒުކޮށް ބަޑީގެ ޙަމަލާއެއް ދީފައިވާއިރު، މިއީ ޓްރަމްޕް އަވަހާރަ ކޮށްލުމަށް ދިން ޙަމަލާއެއްގެ ގޮތުގައި މި މައްސަލަ މިހާރު އެ ޤައުމުގެ ކަމާބެހޭ ފަރާތްތަކުން ދަނީ ތަހުގީގު ކުރަމުންނެވެ.

މި ޙަަމަލާގައި ޓްރަމްޕްގެ ކަންފަތަށް އަނިޔާ ވެފައިވެއެވެ. ނަމަވެސް ޖުމުލަކޮށް ޓްރަމްޕްގެ ޙާލު ރަނގަޅުކަމަށް ރިޕޯޓުތައް ބުނެއެވެ.

ސިޔާސީ ކަންކަމުގައި އަނިޔާވެރިކަމަށް އެއްވެސް ޖާގައެއް ނެތް ކަމަށް ރައީސް މުއިއްޒު ވިދާޅުވެފައިވާއިރު، އެމެރިކާގެ އެކުވެރި އިޒްރޭލުން ފަލަސްތީނަށް ނުހަނު ގިނަ އަނިޔާދެމުންދާއިރުވެސް އިޒްރޭލުގެ ޕާސްޕޯޓު ބޭން ކުރުމުގެ މަސައްކަތުގައި ސަރުކާރުން ފަހަތު ފަޔަށް ބުރަވާކަމަށް ބުނެ އެތައް ބައެއްގެ ފާޑުކިޔުން ސަރުކާރަށް އަމާޒުވެފައިވެއެވެ.