ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ 2023 ވަނަ އަހަރުގެ ހިއްސާގެ ފައިދާގެ ގޮތުގައި ހިއްސާއަކަށް 80 ރުފިޔާ ބަހަން ފާސްކޮށްފި އެވެ.

މިގޮތަށް ފާސްކުރީ ހުކުރު ދުވަހުގެ ރޭ ބޭއްވި އެކުންފުނީގެ 2023 ވަނަ އަހަރުގެ އަހަރީ އާންމު ޖަލްސާގައެވެ. މި ޖަލްސާގައި ހިއްސާއަކަށް 80 ރުފިޔާ ބެހުމަށް ފާސްވީ ޖަލްސާގައި ބައިވެރިވި ހިއްސާދާރުންގެ 99 އިންސައްތަ ވޯޓުންނެވެ.

189 ހިއްސާދާރަކު ބައިވެރިވި މި ޖަލްސާގައި މިއީ ފާއިތުވި 10 އަހަރުގެ ތެރޭގައި ވެސް އެ ކުންފުނިން ހިއްސާއަކަށް ބަހަން ނިންމި އެންމެ ބޮޑު އަދަދެވެ.

މިދިޔަ އަހަރު އެ ކުންފުނިން ހިއްސާއަކަށް ބަހާފައި ވަނީ 77 ރުފިޔާއެވެ.

މިދިޔަ އަހަރު އެސްޓީއޯއަށް އާމްދަނީގެ ގޮތުގައި 16.4 ބިލިއަން ރުފިޔާ ލިބުނު ނަމަވެސް، އެއީ 2022 ވަނަ އަހަރު އެ ކުންފުންޏަށް ލިބުނު 18.2 ބިލިއަން ރުފިޔާގެ ޢާމްދަނީއަށް ވުރެ، ގާތްގަޑަކަށް 1.8 ބިލިއަން ރުފިޔާ މަދު އަދަދެކެވެ. އެސްޓީއޯ އިން އާންމު ކުރި އެކުންފުނީގެ މާލީ ތަފާސް ހިސާބުތަކުން ދައްކާ ގޮތުން، މިދިޔަ އަހަރު އެ ކުންފުންޏަށް އާމްދަނީގެ ގޮތުގައި 16.4 ބިލިއަން ރުފިޔާ ލިބުނު ނަމަވެސް، އެއީ 2022 ވަނަ އަހަރު އެ ކުންފުންޏަށް ލިބުނު 18.2 ބިލިއަން ރުފިޔާގެ ޢާމްދަނީއަށް ވުރެ، ގާތްގަޑަކަށް 1.8 ބިލިއަން ރުފިޔާ މަދު އަދަދެކެވެ.

އެގޮތުން އެ ކުންފުންޏަށް މިދިޔަ އަހަރުގެ ތިންވަނަ ކުއާޓަރުގައި ޢާމްދަނީގެ ގޮތުގައި 4.13 ބިލިއަން ރުފިޔާ ލިބުނު އިރު، އާމްދަނީ 3 އިންސައްތައަށް ވެއްޓި، މިދިޔަ އަހަރުގެ އެންމެ ފަހު ކުއާޓަރުގައި އެ ކުންފުންޏަށް ލިބުނީ 4.01 ބިލިއަން ރުފިޔާއެވެ. އެގޮތުން އާމްދަނީ ދަށްވި މައިގަނޑު ސަބަބެއްކަމުގައި އެ ކުންފުނިން ބުނީ، ދުނިޔޭގެ ބާޒާރުގައި ތެލުގެ އަގަށް އައިބަދަލާއިއެކު ކުންފުނިން ވިއްކަމުން ދިޔަ ތެލުގެ އަގު ދަށްކުރުމާއިއެކު، ތެލުގެ ވިޔަފާރިން ލިބުނު އާމްދަނީ ދަށްވުމެވެ. އެހެން ނަމަވެސް، އެ ކުންފުނިން ވިކުނު ތެލުގެ އަދަދު އިތުރުވުމާއި ކުންފުނިން ކުރަމުން ގެންދާ އެހެނިހެން ވިޔަފާރިތައް ކުރިއަރައި ރަނގަޅުވުމާއެކު، އެކުންފުންޏަށް މިދިޔަ އަހަރު ޖުމްލަ ފައިދާގެ ގޮތުގައި 2.7 ބިލިއަން ރުފިޔާ ލިބިފައިވެއެވެ.

އެއާއެކު، އެ ކުންފުންޏަށް މިދިޔަ އަހަރު ލިބުނު ސާފު ފައިދާ، ޓެކުހުގެ ކުރިން 995 މިލިއަން ރުފިޔާއަށް އެރިއިރު، ޓެކުހަށް ކެނޑުމަށްފަހު އެ ކުންފުންޏަށް 819 މިލިއަން ރުފިޔާގެ ސާފު ފައިދާއެއް ލިބިފައިވެއެވެ. މިއީ އޭގެ ކުރީ އަހަރާ އަޅާބަލާއިރު ގާތްގަޑަކަށް 91 މިލިއަން ރުފިޔާގެ އިތުރުވުމެކެވެ.