ޔޫރޯ ފުޓުބޯޅަ މުބާރާތުގެ ސެމީ ފައިނަލްގައި އިންގްލެންޑުން ނެދެލަންޑްސްއާ ދެކޮޅަށް ކުޅުނު މެޗުގެ އެންމެ ފަހު ވަގުތުގައި ލަނޑު ޖަހައި، އިންގްލެންޑު މުބާރާތުގެ ފައިނަލަށް ގެންގޮސްދިން ކުޅުންތެރިޔަކީ އޮލީ ވަޓްކިންސް އެވެ. ޖަރުމަނުގެ ޑޯޓްމަންޑުގައި ކުޅުނު ސެމީ ފައިނަލް މެޗުގައި އިންގްލެންޑުގެ ހީރޯ އަކީ ވަޓްކިންސް އެވެ. ބެންޗުގައި އިނުމަށްފަހު، އޭނާ ކުޅެން އަރައި އިންގްލެންޑަށް ހޯދައިދިނީ މުހިންމު، އަދި ތާރީޚީ މޮޅެކެވެ.

މީގެ ކުރިން މުބާރާތުގައި ވަޓްކިންސް ކުޅެފައި ވަނީ ގާތް ގަނޑަކަށް ވިއްސަކަށް މިނެޓެވެ. އެއީ މުބާރާތުގެ ގްރޫޕް ސްޓޭޖުގެ ދެ ވަނަ މެޗުގައި އިންގްލެންޑުން ޑެންމާކާ ދެކޮޅަށް ކުޅުނު މެޗުގަ އެވެ. އެ މެޗުގައި ވެސް ވަޓްކިންސް ކުޅެން ނިކުމެފައި ވަނީ ބަދަލު ކުޅުންތެރިޔެއްގެ ގޮތުގަ އެވެ. މުބާރާތުގެ ނޮކް އައުޓް ބުރުގެ ކޮންމެ މެޗެއް ވެސް އިންގްލެންޑުން ކާމިޔާބު ކޮށްފައި ވަނީ ފަހު ވަގުތު ލަނޑު ޖަހައިގެންނެވެ.

މުބާރާތުގެ ސެމީ ފައިނަލްގައި ނެދަލެންޑްސްއާ ދެކޮޅަށް ވެސް ވަޓްކިންސް ކުޅެން ނިކުތީ ބަދަލު ކުޅުންތެރިޔެއްގެ ގޮތުގަ އެވެ. މެޗުގެ 81 ވަނަ މިނެޓުގައި އޭނާ ކުޅެން ނިކުތީ ކެޕްޓަން ހެރީ ކޭންގެ ބަދަލުގަ އެވެ. އިންގްލެންޑުގެ ކޯޗު ގަރެތު ސައުތުގޭޓް އެ ގެނައި ބަދަލަކީ، ގިނަ ބަޔަކަށް ހައިރާންކަން ލިބުނު ވެސް ބަދަލެވެ. އެހެން ނަމަވެސް، އެ ހައިރާންކަން ވަޓްކިންސް ފަހަތަށް ޖައްސާލީ މެޗުގައި ލަނޑު ޖަހައިގެންނެވެ.

ބަދަލަށް ކުޅެން ނިކުތް ކޯލް ޕާމާ ޖައްސާލި ބޯޅައެއް، ނެދަލެންޑްސްގެ އޭރިޔާ ތެރޭގައި ހުރެ ވަޓްކިންސް ބޯޅަ ގޯލަށް ފޮނުވާލި ހިތްގައިމު ވެސް ގޮތަކަށެވެ. ތިރި ތިރިން ގޯލުގެ ކަނަށް އަމާޒުކޮށް އޭނާ ބޯޅަ ފޮނުވާލީ، ޑިފެންޑަރެއްގެ ކައިރިން އެއް ޓަޗު ނެގުމަށްފަހު އެވެ. އެ ލަނޑާއެކު، އިންގްލެންޑުން ވަނީ ޖެހި ޖެހިގެން ދެ ވަނަ ފަހަރަށް ޔޫރޯ މުބާރާތުގެ ފައިނަލަށް ދަތުރު ކޮށްފަ އެވެ. މިއަހަރުގެ މުބާރާތުގެ ފައިނަލްގައި އާދިއްތަ ދުވަހުގެ ރޭ އިންގްލެންޑު ނިކުންނާނީ ސްޕެއިންއާ ދެކޮޅަށެވެ.

ފުޓުބޯޅައިގެ ބައެއް ތަޖުރިބާކާރުން ބުނާ ގޮތުގައި ޖަރުމަނުގައި މިހާރު ކުރިއަށްދާ ޔޫރޯ މުބާރާތުގައި އިންގްލެންޑުން އެންމެ ރަނގަޅަށް ކުޅުނު އެއް މެޗަކީ ނެދަލެންޑްސްއާ ދެކޮޅަށް ކުޅުނު މެޗެވެ. މެޗުގެ ފުރަތަމަ ހާފުގައި ނެދަލެންޑްސް އިން ލަނޑު ޖަހައި ލީޑު ނަގާފައި ވަނިކޮށް، އިންގްލެންޑު މެޗުގެ ތެރެއަށް އައީ، ލިބުނު ޕެނަލްޓީ ކާމިޔާބު ކޮށްގެންނެވެ. އެއީ ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށްފަހު މެޗުގެ ރެފްރީ ދިން ޕެނަލްޓީ އެކެވެ.

މެޗަށްފަހު ވާހަކަ ދައްކަމުން ވަޓްކިންސް ބުނެފައި ވަނީ ބަދަލު ކުޅުންތެރިޔެއްގެ ގޮތުގައި އަރަން ޖެހުނު ނަމަވެސް، އޭނާ އަށް އަބަދު ވެސް ޔަޤީންކަން އޮތް ކަމަށެވެ. އެގޮތުން އޭނާ އާއެކު މެޗުގައި ކުޅެން އެރި ޕާމާ ގާތު ބުނެފައިވާ ވާހަކަ ވެސް ވަޓްކިންސް ވަނީ ހިއްސާކޮށްފަ އެވެ. ވަޓްކިންސް، ޕާމާ ގާތު ބުނެފައި ވަނީ މެޗުން މޮޅުވާ ލަނޑު ޖަހާނީ، ޕާމާ ދޭ ބޯޅައަކުން ކަމަށެވެ. ވަޓްކިންސް ސިފަ ކޮށްފައިވާ ގޮތުގައި މެޗުގައި ދަނޑު މަތިން ފެނުނީ ވެސް އެ ޔަގީން ކަމެވެ.