ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލާ، މެމްބަރުންގެ އަދަދު މަދުކުރުމަށް ޤާނޫނަށް ގެންނަން ޖެހޭ އިސްލާހުތައް ގެންނަވާނެ ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ އާދިއްތަ ދުވަހުގެ ރޭ ބޭއްވި ޕީއެންސީގެ ޖަގަހަ ޖަލްސާގައި ވާހަކަދައްކަވަމުންނެވެ.
އެމަނިކުފާނު ވިދާޅުވީ ރާއްޖެ އަކީ ކުޑަ މުޖުތަމައު އެއް ކަމަށާއި ރާއްޖޭގެ ކަންކަން ބައްޓަންކުރަންވާނީ ރާއްޖެ އަށް ހެޔޮވަރު ގޮތަކަށް ކަމަށެވެ. އެކި ރަށްތަކަކަށް ބެހިފައި އޮތް ނަމަވެސް ރާއްޖޭގެ ނިޒާމް ބައްޓަންކުރަންވާނީ ޚަރަދުގެ ގޮތުން ކަތާނެ ގޮތަކަށް ބަލައިގެން ކަަމަށް ވެސް ރައީސް މުއިއްޒު ވިދާޅުވިއެވެ. ރާއްޖޭގެ ސިޔާސީ ދުސްތޫރީ ނިޒާމް ރޭވިފައި އޮތީ ވަރަށް ގިނަ އިންތިޚާބުތައް ބާއްވާ ގޮތަށް ކަމަށާއި އެކަން ކުރަން ޖެހޭނީ ޚަރަދު ދެކޮޅު ޖެހޭ ގޮތަކަކަށް ކަމަށް އެމަނިކުފާނު ވިދާޅުވިއެވެ. ދައުލަތް ހިންގުމުގައި ޚަރަދުކުރަންވާނީ ޒިންމާދާރު ގޮތަކަށް ކަމަށް ވެސް އެމަނިކުފާނު ވަނީ ވިދާޅުވެފައެވެ.
އެމަނިކުފާނު ވަނީ ނިމިދިޔަ މަޖިލިސް އިންތިޚާބާއި ރިޔާސީ އިންތިޚާބުގެ ޚަރަދުތަކަށް އަލިއަޅުވާލައްވާފައެވެ. މަޖިލިސް އިންތިޚާބަށް 120 މިލިއަނަށް ވުރެ ގިނައިން ޚަރަދުވި ކަމަށް އެމަނިކުފާނު ފާހަގަކުރެއްވިއެވެ. އަދި މިދިޔަ ރިޔާސީ އިންތިޚާބަށް 180 މިލިއަނަށް ވުރެ ގިނަ ރުފިޔާ ޚަރަދުވިކަމަށް އެމަނިކުފާނު ވިދާޅުވިއެވެ. އެ ދެ އިންތިޚާބުގެ ދެމެދުގައި 8 މަސްދުވަސް ވެސް ނެތްކަން ފާހަގަކުރައްވާ އެމަނިކުފާނު ވިދާޅުވީ ރައްޔިތުންނަށް އެންމެ ފައިދާ ހުރި ގޮތަކީ އެ ދެ އިންތިޚާބު އެއްކޮށްލުން ކަމަށް ޤަބޫލުކުރައްވާ ކަމަށެވެ. އެކަން އެގޮތަށް ކުރެވޭނީ ރައްޔިތުންގެ ފެންނަ ނުފެންނަ ވޯޓަކުން ކަމަށާއި އެކަމުގައި ރައްޔިތުންގެ އެއްބާރުލުން ލިބިވަޑައިގަންނަވާނެ ކަމުގެ ޔަޤީންކަން އޮތް ކަމަށް ރައީސް މުއިއްޒު ވިދާޅުވިއެވެ. މިހިނގާ ދައުރުގެ ތެރޭގައި ނުވަތަ ކުރިއަށް އޮތް ދައުރުގެ ތެރޭގައި އެ ދެ އިންތިޚާބު އެއްކޮށްލުމަށް ޤާނޫނު އަސާސީ އަށް އިސްލާހު ހުށަހަޅުއްވާނެ ކަމަށް ވެސް އެމަނިކުފާނު ވަނީ ވިދާޅުވެފައެވެ. އަދި 77 އަށް ވުރެ އިތުރު ނުވާނެ ގޮތަކަށް މަޖިލީސް މެމްބަރުންގެ އަދަދު ހިފެހެއްޓިފައި އޮންނަން ޖެހޭ ކަމަށް ވެސް އެމަނިކުފާނު ވަނީ ވިދާޅުވެފައެވެ. އެހެންކަމުން އެކަމަށް ބޭނުންވާ ޤާނޫނީ ބަދަލުތައް ގެންނަވާނެ ކަަމަށް ރައީސް ޑރ.މުއިއްޒު ވިދާޅުވިއެވެ.
މަޖިލީހުގެ ސައިޒުވެސް އެބަ ޖެހޭ ހަމަޔަކަށް އަޅުވަން. މަޖިލިސް މެމްބަރުން ގަރާރެއް ހުށަހަޅުއްވައިގެން ބަހުސްވެސް ކުރައްވައިފި. މިހާރު މިދާގޮތަށް ދަންޏާ 100 އަށް އަރައިގެން އެއަށް ވުރެ މައްޗަށް ވެސް ދާނެ. މިއަށް ވުރެ އާބާދީވެސް އިތުރުވާނެ. އެއީ އެއް މާނައެއް ހުރި ކަމެއް ނޫން. އެންމެ ކުޑަ ކުރަން ވިސްނާ އިރު މާ ކުޑަ ކޮށްލީމަ ވެސް ރަނގަޅު ގޮތަކަށް ނުވާނެ. އެންމެ ރަނގަޅު ގޮތަކަށް ވާނީ 17 ވަނަ މަޖިލީހުގައި އޮތް މިންވަރު. އެހެންވީމަ ކުރިއަށް އޮތްތަނުގައި ހޮވާ މަޖިލީހަކީ 93 އަށް ވުރެ ބޮޑުވާ މަޖިލީހަކަށް ވުމުގެ ބަދަލުގައި 77 ނުވަތަ އެހާވަރަށް ވުރެ ބޮޑު ނުވާގޮތަށް ޤާނޫނަށް ބަދަލުގެންނާނަން.ރައީސް ޑރ.މުހައްމަދު މުއިއްޒު![]()
އެ ބަދަލުގެ ސަބަބުން އެތައް 100 މިލިއަން ރުފިޔާ އެއް ދައުލަތުގެ ބަޖެޓުން ސަލާމަތްވާނެ ކަމަށް ރައީސް ވިދާޅުވިއެވެ. އަދި އެ ޚަރަދުތައް ސަލާމަތްވުމުން އެ ފައިސާއިން ދިރިއުޅުން ތަރައްޤީކޮށްދެވޭނެ އެތައްކަމެއް ކުރެވިދާނެ ކަމަށް އެމަނިކުފާނު ވަނީ ވިދާޅުވެފައެވެ.
ދާދިފަހުން ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވާފައިވާ، ރައްޔިތުންގެ މަޖިލީހުގެ މެންބަރުންގެ ޢަދަދު ކޮންމެ 5 އަހަރަކުން އިތުރުވަމުންދާ ދިއުމާމެދު 20 ވަނަ ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށްޓަކައި ގަރާރެއް މަޖިލީހަށް ހުށަހަޅުއްވާފައެވެ. އަދި އެ ގަރާރުގެ އިބްތިދާއީ ބަހުސް ވަނީ ކުރިއަށް ގެންގޮސްފައެވެ. ކޮންމެ 5 އަހަރަކުން މެމްބަރުން އިތުރުވަމުންދާ ދިއުމަކީ އެއީ ކަންބޮޑުވުމެއް ކަމަށް ބައެއް މުއައްސަސާތަކުން ވެސް ވަނީ ބުނެފައެވެ. ނަމަވެސް މިފަދަ ބަދަލެއް ގެންނަ އިރު ފުޅާ ދާއިރާ އެއްގައި މަޝްވަރާނުކޮށް އެކަން ކޮށްފި ނަމަ ފަހުން އެ ބަަދަލުތައް އިއާދަކުރަން ޖެހުމުގެ ފުރުސަތު އޮތްކަން އެ ދާއިރާގައި މަސައްކަތް ކުރައްވާ ބޭފުޅުން ފާހަގަކުރައްވައެވެ.