މެންޗެސްޓަރ ޔުނައިޓެޑުން ކުރަން ޖެހެނީ ބުރަ އަދި ބޮޑު މަސައްކަތެއް ކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.
އޭނާ މިހެން ބުނީ ޔުުނައިޓެޑާ އެކު ސޮއި ކޮށްފައިވާ އެއްބަސްވުމުގެ މުއްދަތު އިތުރު ކުރުމަށް، އައު އެއްބަސްވުމުގައި ސޮއި ކުރުމަށްފަހު ވާހަކަ ދައްކަމުންނެވެ. ޔުނައިޓެޑާ އެކު ޓެން ހާގް ސޮއި ކޮށްފައިވާ އެއްބަސްވުމަށް އެކުލަބުން ވަނީ އިތުރު އެއް އަހަރު އިތުރުކޮށްފަ އެވެ.
އެއްބަސްވުމުގައި ސޮއި ކުރުމަށްފަހު ވާހަކަ ދައްކަމުން ޓެން ހާގް ބުނީ، ޔުނައިޓެޑުގައި ކުރަމުން އައި މަސައްކަތުގައި ދެމި ހުރުމުގެ ގޮތުން ކުލަބާއެކު އައު އެއްބަސްވުމުގައި ސޮއި ކުރެވުމުން ވަރަށް އުފާވާ ކަމަށެވެ. ޓެން ހާގް ބުނީ ފާއިތުވި ދެ އަހަރު ދުވަހު ކުރެވުނު މަސައްކަތަށް ބަލާއިރު، ކުރިއަށް އޮތް ތަނުގައި ޔުނައިޓެޑަށް އިތުރު ކާމިޔާބީތައް ހޯދޭނެކަން ޔަގީންވާ ކަމަށެވެ. ޚާއްސަކޮށް އޭނާ ހަވާލުވީއިރު ޔުނައިޓެޑު އޮތް ހިސާބާއި، މިހާރު އެ ޓީމު އޮތް ހިސާބު ވަޒަންކޮށްލުން މުހިންމު ކަމަށް ވެސް ޓެން ހާގް ބުންޏެވެ.
މީގެ އިތުރުން ޓެން ހާގް ބުނީ ކުރިއަށް ދާން ޔުނައިޓެޑުން ކުރަމުން އަންނަ މަސައްކަތުގައި އަދި ވެސް ބައިވަރު ކަންކަން ކުރަން ހުރި ކަމަށެވެ. އެއީ ބުރަ އަދި ބޮޑު މަސައްކަތެއްކަން ފާހަގަކޮށް ޓެން ހާގް ބުނީ، ކުލަބުން ދާން ބޭނުންވާ އަމާޒަށް ވާސިލުވެވޭނީ އެކަންކަން ކޮށްގެން ކަމަށެވެ. ޚާއްސަކޮށް އިނގިރޭސި ތަށިތަކަށް ވާދަކުރަން ބަލާއިރު، އެ މަސައްކަތް ދެގުނަ އަށް ކުރަން ޖެހޭ ކަމުގައި ޓެން ހާގް ވަނީ ބުނެފަ އެވެ.
އިތުރަށް ޓެން ހާގް ބުނީ، ޔުނައިޓެޑުގެ އިސްވެރިންނާއެކު ކުރިއަށް ގެންދިޔަ މަޝްވަރާތަކަށް ފަހު، މަސައްކަތް ކުރާނެ ގޮތުގެ ވިސްނުންތަކެއް އެކުލަވާލެވިފައިވާނެ ކަމަށެވެ. ޚާއްސަކޮށް ކުލަބުން ޙާސިލު ކުރަން ބޭނުންވާ ކަންކަމަށް މަޝްވަރާކޮށް، އެކަންކަން ޙާސިލު ކުރަން ކުރާނެ މަސައްކަތާ ގުޅޭ ގޮތުން ވާހަކަ ދައްކައި، މަޝްވަރާ ކޮށްފައިވާނެ ކަމަށް ޓެން ހާގް ބުންޏެވެ. އެކަންކަން ޙާސިލު ކުރުމުގައި ޔުނައިޓެޑުގެ އެންމެން ވެސް ތިބޭނީ ވަރަށް ބަދަހި ކަމާއެކު ކަމަށް ވެސް ޓެން ހާގް ވަނީ ބުނެފަ އެވެ.
އޭނާ ބުނީ އަންނަ ސީޒަނަށް ޓީމު ތައްޔާރު ވާނީ އެންމެ ފުރިހަމަ އަށް ކަމަށާއި، އެކަމާ ގުޅުން ހުރި މަސައްކަތްތައް މިހާރު ވެސް ކުރެވެމުން އަންނަ ކަމަށެވެ.
