ޖަރުމަނުގައި މިހާރު ކުރިއަށްދާ ޔޫރޯ ފުޓުބޯޅަ މުބާރާތުގެ ގަދަ 16 ވަނަ ބުރުގައި ބެލްޖިއަމް އަތުން ބައި ކޮޅަށް ވަތް ލަނޑާއެކު، ފްރާންސް އިން މުބާރާތުގެ ކުއާޓާ ފައިނަލް އިން ޖާގަ ހޯދައިފި އެވެ.

ހޯމަ ދުވަހުގެ ރޭ ބެލްޖިއަމްއާ ދެކޮޅަށް ކުޅުނު މެޗު ފްރާންސް އިން ކާމިޔާބު ކުރީ 1-0 އިންނެވެ.

މެޗުގައި ދެ ޓީމުން ވެސް ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. ފްރާންސްއާ ދެކޮޅަށް ލީޑު ނަގަން ބެލްޖިއަމްގެ ކެޕްޓަން ކެވިން ޑި ބްރޭނާ އަށް ރަނގަޅު ފުރުސަތެއް ލިބުނެވެ. ފްރާންސްގެ ގޯލު އޭރިޔާ ކުރިމަތިން ޑި ބްރޭނާ ފޮނުވާލި ބާރު ހަމަލާ، ފްރާންސްގެ ގޯލު ކީޕަރު ވަނީ މަތަކޮށްފަ އެވެ.

މެޗުގައި ބެލްޖިއަމްގެ ފޯވާޑް ރޮމެލޫ ލުކާކޫ އަށް ވެސް ވަނީ ލަނޑު ޖަހާނެ ފުރުސަތު ލިބިފަ އެވެ. ނަމަވެސް އޭނާ އަށް އެ ފުރުަސަތުގެ ބޭނުން ހިފޭ ގޮތެއް ނުވި އެވެ. މިއަހަރުގެ ޔޫރޯ ގައި ލުކާކޫ ޖެހި ތިން ލަނޑެއް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ ބަލައި ނުގަންނަން ނިންމައިފަ އެވެ.

މެޗުގައި ފްރާންސް އަށް ލީޑު ލިބުނީ ވެސް އެންމެ ފަހު ވަގުތު އެވެ. މެޗުގެ 85 ވަނަ މިނެޓުގައި ފްރާންސްގެ ރަންޑަލް ކޯލޯ މުއާނީ ފޮނުވާލި ބޯޅަ، ގޯލަށް ވަނީ ބެލްޖިއަމްގެ ޑިފެންޑަރު ޔާން ވެޓޮންގަންގެޔާން ވެޓޮންގަންގެ ގައިގައި ޖެހިފަ އެވެ. އެ ބޯޅަ ދިފާއު ކުރުމަށް ބެލްޖިއަމްގެ ގޯލު ކީޕަރަށް އުނދަގޫވީ ވެސް އެހެންވެ އެވެ.

ފްރާންސް އިން ލީޑު ނެގި ފަހުން ވެސް، ބެލްޖިއަމް އިން ވަނީ ވަރަށް ބޮޑަށް ކުރިއަށް ޖެހިގެން ލަނޑު ޖެހުމަށް މަސައްކަތް ކޮށްފަ އެވެ. ބެލްޖިއަމް އިން މެޗުގެ ނަތީޖާ ހަމަހަމަ ކުރުމަށް ވެސް ފުރުސަތުތަކެއް ތަނަވަސްކުރި އެވެ.

މުބާރާތުގެ ކުއާޓާ ފައިނަލްގައި ފްރާންސް ވާދަކުރަން ޖެހޭނީ ޕޯޗުގަލް އާއި ސްލޮވޭނިއާ ބައްދަލު ކުރާ މެޗުން މޮޅުވާ ޓީމަކާ އެވެ.