އަނިޔާގެ ސަބަބުން ކުޅުމާ ދުރުގައި ހުރި ނަމަވެސް، ފްރާންސްގެ ކެޕްޓަން ކީލިއަން އެމްބާޕޭ ނައިޓް ކުލަބަކަށް ދިޔަ މައްސަލައިގައި ދެކެވެމުން އަންނަ ވާހަކަ ތަކުގައި އެ ޓީމުގެ ކޯޗު ޑިޑިއޭ ޑެޝޯމްޕްސް އެމްބާޕޭގެ ދިފާއުގައި ވާހަކަ ދައްކައިފި އެވެ.
ސްޕެނިޝް ލީގުގައި ރެއާލް މެޑްރިޑުން އަލަވޭސްއާ ދެކޮޅަށް ކުޅުނު މެޗުގައި އެމްބާޕޭ އަށް ވަނީ ކޮންމެ ވެސް ވަރެއްގެ އަނިޔާއެއް ލިބިފަ އެވެ. ނަމަވެސް އޭގެ ފަހުން ވިޔަރެއާލާ ދެކޮޅަށް ކުޅުނު މެޗުގައި ވެސް އެމްބާޕޭ ވަނީ ކުޅެފަ އެވެ. ނަމަވެސް، ޔުއެފާ ނޭޝަންސް ލީގަށް ފްރާންސް އިން އެކުލަވާލި ސްކޮޑުގައި އޭނާ ނުހިމަނަ އެވެ. އެހެންވެ ނޭޝަންސް ލީގުގައި ފްރާންސް އިން އިޒްރޭލާ ދެކޮޅަށް ކުޅުނު މެޗުގައި ވެސް އެމްބާޕޭ ނުކުޅެ އެވެ.
ފްރާންސް އިން އިޒްރޭލާ ދެކޮޅަށް ކުޅުނު ރޭގައި ސްވިޑެންގެ ނައިޓް ކްލަބަކުން އެމްބާޕޭ ފެނުނު ކަމަށް މީޑިއާ ތަކުގައި ވަނީ ބުނެފަ އެވެ. އެކަމުގެ ސަބަބުން އެމްބާޕޭ އާއި ޑެޝޯމްޕްސްއާ ދެމެދު ކޮންމެ ވެސް ވަރެއްގެ މައްސަލައެއް ޖެހި، ދެކޮޅު ވެރިކަމެއް ހިނގައި ދިޔަ ކަމަށް ފްރާންސްގެ ބައެއް މީޑިއާ ތަކުގައި ވަނީ ރިޕޯޓުކޮށްފަ އެވެ.
ނަމަވެސް ބެލްޖިއަމާ ދެކޮޅަށް ފްރާންސް އިން ކުޅޭ މެޗުގެ ކުރިން ޑެޝޯމްޕްސް ވަނީ އެ ވާހަކަތައް ދޮގު ކޮށްފަ އެވެ. ޑެޝޯމްޕްސް ބުނީ ފްރާންސް ސްކޮޑުގައި ނުހިމެނޭ ކުޅުންތެރިންނާ ގުޅޭ ޚަބަރުތައް އޭނާ ނުބަލާނެ ކަމަށާއި، ބަލަން ބޭނުން ވެސް ނުވާ ކަމަށެވެ. އެކަން ފާހަގަކޮށް ޑެޝޯމްޕްސް ބުނީ އެމްބާޕޭ ގެންދަނީ ރެއާލާ އެކު އަނިޔާ އިން ރަނގަޅުވުމުގެ ކަންކަން ކުރިއަށް ގެންދަމުން ކަމަށާއި، އެމްބާޕޭ ހުރި ތަނެއް އޭނާ އަށް ނޭނގޭނެ ކަމަށެވެ. ޑެޝޯމްޕްސް ފާހަގަ ކުރި ގޮތުގައި އެއްވެސް ކުޅުންތެރިޔަކަށް އޮފް ދުވަހެއް، ނުވަތަ ޓީމުގައި ނެތް ދުވަހަކާ ދިމާވެއްޖެ ނަމަ، އެ ކުޅުންތެރިޔަކު ބޭނުން ކަމެއް ކުރެވޭނެ އެވެ.
އެހެންކަމުން އޭނާ އާއި އެމްބާޕޭއާ ދެމެދު އެއްވެސް ނުތަނަވަސްކަމެއް ނެތް ކަމަށް ޑެޝޯމްޕްސް ވަނީ ބުނެފަ އެވެ. ބައިނަލްއަޤުވާމީ ބްރޭކަށް ކުލަބު ފުޓުބޯޅައިގެ މެޗުތައް މެދު ކަނޑާލާފައިވާއިރު، އެމްބާޕޭ އަންނަނީ އޭނާގެ ރިކަވަރީގެ ކަންކަން ކުރިއަށް ގެންދަމުން ކަމަށް މީޑިއާ ރިޕޯޓުތައް ބުނެ އެވެ. އަދި ބްރޭކަށްފަހު، ސްޕެނިޝް ލީގުގައި ރެއާލުން ކުޅޭ ފުރަތަމަ މެޗުގައި އެމްބާޕޭ އަށް ކުޅެވޭނެ ކަމުގެ ފުރުސަތު ބޮޑު ކަމަށް ވެސް ބުނެފައިވެ އެވެ.
