މާލީ ހާލަތާ މެދު ޤާސިމް ދެއްކި ވާހަކަތަކަށް އަމީރުގެ ރައްދު - "އުޅެނީ ގިނައިން ދޮގު ހަދައިގެން އެއީ ތެދުކަމަށް ދައްކަން"
29 ޖޫން 2024 | ހޮނިހިރު 18:38އެމެރިކާގެ ކްރެޑިޓް ރޭޓިން އޭޖެންސީ, ފިޗުން ވަނީ ރާއްޖޭގެ ރޭޓިން "ސީސީސީ ޕްލަސް" އަށް ދަށްކޮށްފަ
ކުރީގެ ފިނޭންސް މިނިސްޓަރ އިބްރާހިމް އަމީރު
ރާއްޖޭގެ މާލީ ހާލަތު މިހާވަރަށް ވައްޓާލުމުގެ ޒިންމާ ނަގަންޖެހޭނީ ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން ކަމަށް ވިދާޅުވެ މަޖިލީހުގެ މާލިއްޔަތު ކޮމިޓީގެ މުގައްރިރު ގާސިމް އިބްރާހީމް ދެއްކެވި ވާހަކަތަކަށް ނިމިދިޔަ ސަރުކާރުގެ ފިނޭންސް މިނިސްޓަރ އިބްރާހިމް އަމީރު ވަރުގަދަ ރައްދެއް ދެއްވައިފިއެވެ.
އަމީރު އެފަދައިން ވިދާޅުވީ ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
ދާދިފަހުން ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަދައްކަވަމުން ޤާސިމް ވަނީ މިހާވަރަށް ރާއްޖެ ދަރަނިވެރިވުމުގެ ޒިންމާ ނަގަންޖެހޭނީ ކުރީ ސަރުކާރުން ކަމަށް ވިދާޅުވެފައެވެ. ގާސިމް ވަނީ މިހާލަތަށް ވެއްޓުނީ މިދިޔަ ފަސް އަހަރު ތެރޭގައި ކަމަށް ސިފަކުރައްވާފައެވެ. އަދި ނިމިދިޔަ ސަރުކާރުން ނެގި ލޯނުތަކާއި ދަރަނިތަކުގެ ސަބަބުން ރާއްޖެ އަށް މިހާލަތު ދިމާވި ކަމަށް ޤާސިމް ވަނީ ވިދާޅުވެފައެވެ ޤާސިމް ވަނީ 2025ން 2026 އާއި ދެމެދު ރާއްޖެ އިން ދައްކަން ޖެހޭ ދަރަނީގެ އަދަދު ބޮޑުކަމަށާއި އެކަމުގެ ޒިންމާ ނަގަން ޖެހޭނީ ނިމިދިޔަ ސަރުކާރުން ކަމަށް ވިދާޅުވެފައެވެ. ގާސިމްގެ އެ ވާހަކަތަކާއި ގުޅޭ ގޮތުން ސުވާލުކުރުމުން އަމީރު ވިދާޅުވީ ބައެއް ބޭފުޅުންނަށް ގަބޫލުކުރެވޭ ގޮތުގައި ރައްޔިތުންނަށް އެ ބޭފުޅުން ހަދާ ދޮގު ގަބޫލުކުރެވޭނީ ގިނައިން އެ ދޮގުހަދައިގެން ކަމަށް ވިދާޅުވެފައެވެ. ގާސިމްގެ ވާހަކަތަކުގައި ހަގީގަތެއް ނެތް ކަަމަށް ފާހަގަކުރައްވާ އަމީރު ވަނީ އެކަމަށް ފާޑު ވިދާޅުވެފައެވެ. އަމީރު ވަނީ ނިމިިދޔަ ސަރުކާރުގެ މާލީ ސިޔާސަތުތަކަށް ހުދު ޤާސިމް އިބްރާޙިމް ވެސް އެކި ޕްލެޓްފޯމްތަކުގައި ތައުރީފްކުރައްވާފައިވާކަން ފާހަގަކުރައްވާފައެވެ. އަދި އެ ސަރުކާރުގެ ކޯލިޝަން ޕާޓްނަރެއްގެ ގޮތުގައި ހުންނެވި އިރު އޭރުގެ މާލީ ސިޔާސަތަކަށް ފާޅުގައި ފާޑު ވިދާޅުވެފައި ނުވާކަން ފާހަގަކުރައްވާފައެވެ.
ގާސިމް ނިމިދިޔަ ސަރުކާރުގެ މާލީ ސިޔާސަތުތަކަށް ފާޑު ވިދާޅުވެފައިވާއިރު، ކުރިން އެ ސަރުކާރުގެ މާލީ ސިޔާސަތުތައް ހަރުދަނާކަމަށް ބުނެ އެކަންކަން ޤާސިމް ވަނީ ދިފާއުކުރައްވާފައެވެ. އަދި އާސަންދަ ހައްގު ފަރާތްތަކަށް ނުދެވެނީ، އަދި މަސްވެރިންނަށް ވެސް ފައިސާ ނުދެވެނީ ކުރީ ސަރުކާރުގެ ސަބަބުން ކަމަށް ޤާސިމް މިހާރު ވިދާޅުވި ނަމަވެސް ކުރިން ޤާސިމް ވަނީ އޭރު މާލިއްޔަތު މެނޭޖް ކުރި ގޮތަށް ތައުރީފްކުރައްވާފައެވެ. އަދި ވެރިކަން ނިމުމާއި ހަމައަށް ވެސް ހުންނެވީ އެ ސަރުކާރުގެ ކޯލިޝަން ޕާޓްނަރެއްގެ ގޮތުގައެވެ. އެމަނިކުފާނު ލީޑަރުކަން ކުރައްވާ ޖޭޕީގެ ބޭފުޅުން ސަރުކާރު ނިމެންދެންވެސް ތިއްބެވީ ސަރުކާރުގެ އިސް މަޤާމުތަކުގައެވެ.
އެމެރިކާގެ ކްރެޑިޓް ރޭޓިން އޭޖެންސީ, ފިޗުން ވަނީ ރާއްޖޭގެ ރޭޓިން "ސީސީސީ ޕްލަސް" އަށް ދަށްކޮށްފައެވެ. އަދި ރާއްޖެއަކީ ބަނގުރޫޓުވުމުގެ ފުރުސަތު ބޮޑު ގައުމެެއް ކަމަށް އެ އޭޖެންސީން ވަނީ ފާހަގަކޮށްފަ އެވެ.
