ވެރިކަން ބަދަލުވިއިރު ރާއްޖޭގެ އިގްތިސާދު ދިޔައީ ބާރަށް ކުރިއަރަމުން - އަމީރު

ވެރިކަން ބަދަލުވިއިރު ރާއްޖޭގެ އިގްތިސާދު ދިޔައީ ބާރަށް ކުރިއަރަމުން ކަމަށް ކުރީގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

ރާއްޖޭގެ މާލީ ހަލާތާއި އިގްތިސާދީ ހާލަތު ދަށްވެފައިވަނީ އެމްޑީޕީގެ ސަރުކާރުން އަމަލުކުރި ގޮތުން ކަމަށް ބުނެ މި ސަރުކާރުން ދައްކަމުން އަންނަ ވާހަކަތަކުގެ ހަގީގަތް ހާމަކުރުމަށް ބޭއްވި ނޫސްވެރިންގެ ބައްދަލުމުގައި އެމްޑީޕީ ސަރުކާރުގެ ފިނޭންސް މިނިސްޓަރ އިބްރާހިމް އަމީރު ވިދާޅުވީ ވެރިކަން ބަދަލުވިއިރު ރާއްޖޭގެ އިގްތިސާދު ދިޔައީ ބާރަށް ކުރިއަރަމުން ކަމަށެވެ. އެގޮތުން ޓުއަރިޒަމް ޕީކް ސީޒަނަށް އެ ސިނާއަތް ދިޔައީ ތައްޔާރުވަމުން ކަމަށާއި، އެޑްވާންސް ބުކިންތައް ލިބެމުންދިޔަ ކަމަށެވެ. އަދި އެކަމުގެ ހެޔޮ އަސަރު ރާއްޖޭގެ އިގްތިސާދުން މި އަހަރުގެ ފުރަތަމަ 4 މަހުގައި ފެނުނު ކަމަށެވެ.

އަމީރު ވިދާޅުވީ ދައުލަތުގެ ފިސްކަލް ހާލަތު ދިޔައީ މެނޭންކުރަމުން ކަމަށެވެ. އެގޮތުން ކޮވިޑް-19 އާއެކު ދައުލަތުގެ މާލީ ހާލަތަށް ބޮޑު ގޮންޖެހުމެއް ކުރިމަތިވި ކަމަށާއި، ސްޓްރެޓަޖީއަކަށްވީ އަވަހަށް ކޮވިޑް-19ގެ އަޑިގަނޑުން އަރައިގަތުން ކަމަށެވެ. އަދި އޭގެ ފަހުން ފިސްކަލް ކަރެކްޓިވް މެޝަރސް (ފިސްކަލް ރިފޯމް) ތައް އެޅުނު ކަމަށެވެ.

މީގެ އިތުރުން 2021 އަދި 2022 ފެ ފިސްކަލް ސްޓްރެޓަޖީގައި 6 ބިލިއަން ރުފިޔާގެ ފިސްކަލް އެޖަސްޓްމަންޓެއް ގެނައުމަށް ހުށަހަޅައި ތަންފީޒުކުރަން ފެށުނު ކަމަށެވެ. އަދި ޖީއެސްޓީ ރޭޓުތައް 2023 ވަނަ އަހަރު ބޮޑުކުރީ މި ސްޓްރެޓަޖީގެ ދަށުން ކަމަށާއި، އެއާއެކު ދައުލަތުގެ އާމްދަނީ ދަނީ މިހާރުވެސް ބޮޑުވަމުން ކަމަށެވެ.

އަމީރު ވިދާޅުވީ ގެންޖެހުންތައް ހުރިނަމަވެސް ބަޖެޓަށް ބޭނުންވާ ފައިނޭންސިންގ ހޯދާފައިވާކަމަށް އަމީރު ވިދާޅުވިއެވެ. އެގޮތުން 2020 ވަނަ އަހަރުން ފެށިގެން ދައުލަތުގެ އާމްދަނީ ބޮޑުތަކުން ދަށްވުމާއެކު ސަރުކާރުން ދޭން ބޭނުންވާ އަސާސީ އަދި އާންމު ހިދުމަތްތައް ފޯރުކޮށްދިނުމަށާއި އިޖްތިމާއީ ރައްކާތެރިކަން ގާއިމްކުރުމަށާއި ރައްޔިތުން ބޭނުންވާ އަސާސީ އަދި އިގްތިސާދީ ތަަރައްގީގެ މަޝްރޫއުތައް ހުއްޓާނުލައި ކުރިއަށް ގެންދިއުމަށް ބަޖެޓަށް ބޭނުންވާ ފައިނޭންސިންގ ހޯދުމަށް ގިނަ ގޮންޖެހުންތަކެއް ކުރިމަތިވި ކަމަށް އަމީރު ވިދާޅިވިއެވެ.

އަމީރު ވިދާޅުވީ މި މުއްދަތުގެ ތެރޭގައި ހާރިޖީ ސިޔާސަތުގެ ތެރެއިން އަދި ދުނިޔޭގެ މާލީ ބާޒާރުގައި ހަރަކާތްތެރިވެގެން ބަޖެތަށް ބޭނުންވާ ފައިނޭންސިންގ ހޯދި ކަމަށެވެ. އަދި އޮމާންކަމާއެކު ކަންކަން ކުރިއަށް ގެންދިއުމަށް މިއީ މުހިންމު ކަމެއްގެ ގޮތުގައި އަމީރު ފާހަގަކުރެއްވިއެވެ.

އަމީރު ވިދާޅުވީ މި ސަރުކާރުން ދިޔައީ ހާލަތާ ނުބައްދަލު ފިޔަވަޅުތައް އަޅަމުން ކަމަށެވެ. އެގޮތުން ރައީސް ޑރ. މުހައްމަދު މުއިއްޒު ވެރިކަމާއި ހަވާލުވެ، ސަރުކާރުގެ މަސައްކަތްތައް ފުޅާކޮށް، ވައުދުފުއްދުމުގެ ނަމުގައި މަސައްކަތް ފެށީ ދައުލަތުގެ ފުއްދުންތެރިކަމަށް ފަރުވާލެއް ނުބަހައްޓަވާ ކަމަށެވެ. އަދި ހަފްތާ 14 ގެ ނަމުގައި އެތައް ވައުދުތަކެއްވެ އޮފީސްތަކުން، ބަޖެޓް އޮތަސް ނެތަސް ފައިސާ ހުއްޓަސް ނެތަސް އިތުރު ހަރަދުތަކަކަށް ކޮމިޓްވީ އެއ ދެމެހެއްޓޭނެ ކަމެއްތޯވެސް ނުބައްލަވާ ކަމަށެވެ.

އަމީރު ވިދާޅުވީ ރާއްޖޭގެ އިގްތިސާދީ ހާލަތު އަދިވެސް އޮތީ ރަނގަޅުކަމަށެވެ. އަދި މިހާރު އޮތީ 2019 ވަނަ އަހަރު އޮތް މިންވަރަށްވުރެވެސް ރަނގަޅު ހާލަތެއްގައި ކަމަށާއި، މައްސަލައަކީ ސަރުކާރަށް ކަންކަން ކުރަން ނޭނގުން ކަމަށެވެ.