އިޒްރޭލުގެ އަނިޔާވެރި ހަމަލާތަކުގައި ކޮންމެ ދުވަހަކު ފަލަސްތީނުގެ 10 ކުޑަ ކުއްޖެއްގެ ފައެއް ނުވަތަ ދެފައި ގެއްލޭ ކަމަށް އދ.ގެ ފަލަސްތީނުގެ ރެފިއުޖީންނާ ބެހޭ އެޖެންސީގެ ވެރިޔާ ފިލީޕް ލައްޒަރީނީ ވިދާޅުވެއްޖެއެވެ.
ލައްޒަރީނީ މިހެން ވިދާޅުވީ، އަންގާރަ ދުވަހު ޖެނީވާގައި އޮތް ނޫސް ކޮންފަރެއްސެއްގައި އިޒްރޭލުން ފަލަސްތީނުގެ ގަޒާ އަށް ހުއްޓުމެއް ނެތި ދެމުންދާ ހަމަލާތަކުގެ ސަބަބުން ފަލަސްތީނުގެ ކުޑަކުދިންނަށް ލިބެމުންދާ އަނިޔާތަކާ ބެހޭ ގޮތުން ވާހަކަ ދައްކަވަމުންނެވެ.
އިޒްރޭލުން ދޭ ހަމަލާތަކުގެ ސަބަބުން ފަލަސްތީނުގެ އެތައް ކުދިންނެއްގެ އަތްފައި ގެއްލިފައިވާ އިރު، ޔުނިސެފް އިން އެއްކޮށްފައިވާ މައުލޫމާތުގެ އަލީގައި ވާހަކަ ދައްކަވަމުން ލައްޒަރީނީ ވިދާޅުވީ، އޭނާ މި ހާމަ ކުރެއްވި ތަފާސް ހިސާބުގައި އަތެއް ނުވަތަ ދެ އަތް ގެއްލޭ ކުދިން ނުހިމެނޭ ކަމަށެވެ.
ގާޒާގައި ފާއިތުވި އަށެއްކަ މަސްދުވަހު އިޒްރޭލުން ދިން ހަމަލާތަކުގައި އެތައް ހާސް ކުޑަކުދިން މަރުވެ، އެތައް ހާސް ކުދިންނަށް އެކި ވަރުގެ ޒަޚަމްތައް ލިބުމުގެ އިތުރުން، 21،000ށް ވުރެ ގިނަ ކުދިން ވީ ނުވީ އެއް ނޭގި ގެއްލިފައިވާ ކަމަށް ސޭވް ދަ ޗިލްރެން އިން ދާދިފަހުން ވަނީ ހާމަކޮށްފައެވެ.
އެ ޖަމާއަތުން ބުނީ އެތައް ކުދިންނެއް ފުނޑުވި އިމާރާތްތަކުގެ ދަށުވެފައި ވެދާނެ ކަމަށާއި، ނުވަތަ ކާކު ކަން އެނގެން ނެތް ގޮތައް ވަޅުލެވިފައި ވެދާނެ ކަމަށާއި، ނުވަތަ އިޒްރޭލުން ހައްޔަރުކޮށްގެން ގެންދިޔަ ކަމަށް ވެދާނެ ކަމަށެވެ.
އަނެއްކޮޅުން ކާނާ އާ ބޭސްފަރުވާ ނުލިބުމުގެ ސަބަބުން އެތައް ކުޑަކުދިންގެ ސިއްހީ މައްސަލަތައް ގާޒާގައި ބޮޑުވެފައި ވާއިރު، އދ ގެ ފަލަސްތީނުގެ ރެފިއުޖީންނާ ބެހޭ އިދާރާއިން ބުނެފައިވަނީ އިންތިހާ އަށް ހޫނު ގަދަ މި ދުވަސްވަރު، ފެންފޮދެއް ހޯދަން ކިއުގައި ކުޑަކުދިން އެތައް ގަޑީއިރެއް ހޭދަ ކުރަން ޖެހޭ ކަމުގައެވެ. މީރު ފެން ލިބުން ދަތިވުމުގެ ސަބަބުން ތަޣައްޔަރު ވެފައިވާ މޫދު ލޮނު ޒަރޫރީ ކަންކަންކަމަށް ގާޒާގެ އާއިލާ ތަކުން ބޭނުން ކުރަންޖެހިފައވާ ކަމަށްވެސް އެ ޖަމާއަތުން ވަނީ ބުނެފައެވެ.
