އިޒްރޭލުން ވައިގެ މަގުން ގާޒާގެ އެކި ސަރަހައްދުތަކަށް ހަމަލާތައް ދީ ފަލަސްތީނުގެ 27 މީހުން މަރާލައިފި ކަމަށް ގާޒާގެ ސިއްހީ އޮފިޝަލުން ހާމަ ކޮށްފިއެވެ.

މި ހަމަލާތަކުގައި މަރުވި މީހުންގެ ތެރޭގައި ހަމާސްގެ ވެރިޔާ އިސްމާއީލް ހަނިއްޔާގެ ދައްތަ ހިމެނޭ ކަމަށް އޮފިޝަލުން ހާމަ ކޮށްފައިވެއެވެ.

އިޒްރޭލުގެ ހަނގުރާމަތީ މަތިންދާ ބޯޓު ތަކުން އަންގާރަ ދުވަހު ޓާގެޓް ކޮށް ހަމާލާ ދިން އެއް ގެއަކީ ހަމާސްގެ ވެރިޔާ ހަނިއްޔާގެ އާއިލީ މެމްބަރުން ދިރިއުޅޭ ޝާތީ ކޭމްޕްގައި ހުރި ގެއެއް ކަމަށް ޚަބަރުތައް ބުނެއެވެ. މި ހަމަލާގައި 10 މީހުން މަރުވި އިރު އޭގެ ތެރޭގައި މުޅިންވެސް ހިމެނެނީ ހަނިއްޔާގެ އާއިލީ މެމްބަރުންނެވެ.

ފަލަސްތީނުގެ ވަފާ ނިއުސް އެޖޭންސީން ބުނެފައިވާ ގޮތުގައި، ގާޒާގެ މެދުތެރޭން އަލް-މަޣާޒީ ރެފިއުޖީ ކޭމްޕުގައި މީހުން ދިރިއުޅޭ ތަނަކަށް ހޯމަ ދުވަހު ދިން ހަމަލާއެއްގައި އާއްމުންގެ 5 މީހުން މަރުވި އިރު އޭގެ ތެރޭގައި 3 ކުޑަކުދިން ހިމެނެއެވެ.

މީގެ އިތުރުން ދެކުނު ގާޒާގެ ޚާން ޔޫނިސްގެ އިރުން އޮންނަ ބަނީ ސުހެއިލާ ސަރަހައްދަށް އިޒްރޭލުން ބޮން އެޅުމުގެ ސަބަބުން 10 މީހުން މަރުވެފައިވެއެވެ.

ގާޒާގެ ރަފަހް ސިޓީ އަށް ވައިގެ މަގުން ދިން ހަމަލާތަކުގައި 2 މީހުން ވަނީ މަރުވެ، އެތައް ބަޔަކު ވަނީ ޒަޚަމްވެފައެވެ.

ހޯމަ ދުވަހު ޝެއިޚް އިޖްލިން އާއި ބައިތު ލާހިއާ ވެސް އިޒްރޭލުގެ ހަނގުރާމަ މަތީ މަތިންދާ ބޯޓުތަކުން ހަމާލާ ދިން ކަމަށް ރިޕޯޓް ތައް ބުނެއެވެ.

އަނެއްކޮޅުން އެއްގަމު މަގުން ރަފަހްގެ ދެކުނުގެ ސަރަހައްދުތަކަށް އިޒްރޭލުގެ ޓޭންކުތަކުން ވަދެގަނެ އެ ސަރަހައްދުގައި އާއްމުން އުޅޭ އެތައް ގެއެއްގައި އިޒްރޭލް ސިފައިންވަނީ ހުޅު ޖަހާ އަންދާލާފައެވެ.

އިޒްރޭލުން ގާޒާގައި ހިންގަމުންދާ އަނިޔާވެރި ހަނގުރާމައިގައި މިހާތަނަށް ފަލަސްތީނުން 37،626 މީހުން ވަނީ މަރުވެފައެވެ. އަދި 86،098 މީހުން ވަނީ ޒަޚަމްވެފައެވެ. މަރުވި މީހުންނާ ޒަޚަމްވި މީހުންގެ ތެރޭގައި ގިނަ އަދަދެއްގެ ކުޑަކުދިންނާ އަންހެނުން ހިމެނެއެވެ.