ވިކިލީކްސްގެ ބާނީ ޖޫލިއަން އަސާންޖް އިނގިރޭސިވިލާތުގެ މެކްސިމަމް ސެކިއުރިޓީ ޖަލުން ދޫކޮށްލައިފި

މަޝްހޫރު ވިކިލީކްސްގެ ބާނީ ޖޫލިއަން އަސާންޖް އިނގިރޭސި ވިލާތުގެ މެކްސިމަމް ސެކިއުރިޓީ ޖަލުން ހޯމަ ދުވަހު ދޫކޮށްލައިފިއެވެ.

އުމުރުން 52 އަހަރުގެ އަސާންޖް އިނގިރޭސިވިލާތުގެ އެންމެ މަތީ ސެކިއުރީ ޖަލު ކަމުގައިވާ ބެލްމާރޝް ޖަލުގެ ބަންދުން ދޫކޮށްލުމާއެކު އޭނާ ވަނީ އޮސްޓްރޭލިއާގެ އަމިއްލަ ވަޒަނަށް ދިއުމަށް ވަގުތުން ދަތުރުފަށާފައެވެ.

އަސާންޖް އިނގިރޭސިވިލާތުން ދޫކޮށްލީ އޭނާގެ މައްޗަށް ކުރެވިފައިވާ އެމެރިކާގެ ޖާސޫސް ކުރުމާބެހޭ ގާނޫނާ ޚިލާފަށް ސިއްރު މައުލޫމާތު އާއްމު ކުރި ކަމަށް ކުރެވޭ ތުހުމަތައް ކޯޓުގައި އިއުތިރާފް ވާނެ ކަމަށް އެއްބަސްވުމުން ކަމަށް ޚަބަރުތައް ބުނެއެވެ.

ޚަބަރުތައް ބުނާ ގޮތުގައި، ޕެސިފިކް ސަރަހައްދުގައި އޮންނަ އެމެރިކާގެ ޓެރިޓަރީ އެއް ކަމަށްވާ ސައިޕަންގެ ކޯޓަށް ބުދަ ދުވަހު ހާޒިރުވާނެއެވެ. ކުށަށް އިއުތިރާފް ވުމާއެކު އަސާންޖް ގެ މައްޗަށް އަންނާނެ ކަމަށް ބެލެވޭ، 62 މަސް ދުވަހުގެ ޖަލު ހުކުމުގެ މުއްދަތު މިހާރުވެސް ޖަލުގައި ހޭދަކޮށް ހަމަކޮށްފައިވާތީ ހުކުމް ކުރުމުން އޭނާ އަށް އިތުރު ޖަލު ބަންދަކަށް ދާކަށް ނުޖެހޭނެއެވެ.

"އަސާންޖް މިނިވަން ވެއްޖެ" އެކްސްގައި ވިކިލީކްސް އިން "އެކްސް" ގައި އާއްމު ކުރި ބަޔާނެއްގައި ބުނެފައިވެއެވެ.

"24 ޖޫން ގައި ބެލްމާޝް މެކްސިމަމް ސެކިއުރިޓީ ޖަލުގައި 1901 ދުވަސް ހޭދަ ކުރުމަށް ފަހު އަސާންޖް ޖަލުން ނުކުމެއްޖެ. ލަންޑަންގެ ހައިކޯޓުން އަސާންޖް އަށް ކަފާލާތު ހަމަޖައްސެމުން ސްޓެންސްޓެޑް އެއަރޕޯޓް އާ ހަމައިން އޭނާ ވަނީ މިނިވަންކޮށް ދޫކޮށްލާފައި، އެތަނުން އަސާންޖް އިނގިރޭސި ވިލާތުން ފުރާނެ."

އަސާންޖް ދަތުރު ކުރުމަށް ހަމަޖެހިފައިވާ ޕްރައިވެޓް ޖެޓަށް އެރުމުގެ ކުރިން ލިޔެކިޔުންތަކެއްގައި ސޮއި ކުރާ މަންޒަރު ދައްކައިދޭ ވީޑިއޯ އެއްވެސް ވިކިލީކްސް އިން ވަނީ އާއްމު ކޮށްފައެވެ.

އަސާންޖް ދަތުރު ކުރާ ބޯޓު ބެންކޮކް އަށް ގޮސް ތެޔޮ އަޅައިގެން ދެން ދާނީ ކޯޓަށް ހާޒިރުވުމަށް އެމެރިކާގެ ޓެރިޓަރީ އަށް ކަމަށް ޚަބަރުތައް ބުނެއެވެ.

އަސާންޖް މަޝްހޫރުވީ 2006 ވަނަ އަހަރު، ވަކި މީހަކު ނޭގޭ ގޮތައް ސިއްރު މައުލޫމާތާއި ވީޑިއޯ ފޮނުވޭ ގޮތައް އޮންލައިން ވިސްލްބްލޯވަރ ޕްލެޓްފޯމެއް ވިކިލީކްސް ގެ ނަމުގައި އުފެއްދުމާ ގުޅިގެންނެވެ.

ވިކިލީކްސް ދުނިޔޭގެ ސަމާލުކަމަށް އައީ އިރާގުގައި އެމެރިކާގެ އެޕާޗޭ ހެލިކޮޕްޓަރަކުން ހަމަލާދީ އާންމުންގެ އެތައް ބަޔަކާ ދެ ނޫސްވެރިއަކު މަރާލި ވީޑިއޯ ލީކު ކޮށްލި ހިސާބުންނެވެ. އެއާއެކު 2010 ވަނަ އަހަރު އެމެރިކާ އިން އިރާގް އާއި އަފްޣާނިސްތާނުގައި ހިންގި ހަނގުރާމައިގެ ސިއްރު އެތައް ހާސް ލިޔެކިޔުންތައް ލީކު ކޮށްލުމާއެކު މުޅި ދުނިޔޭގެ މަގްބޫލުކަން ވިކިލީކްސް އަށް ލިބިގެން ދިޔައެވެ.