ވިކީލީކްސްގެ ކޯ ފައުންޑަރ ޖޫލިއަން އާސާންޖް އެމެރިކާއާ ހަވާލުކުރަން އިނގިރޭސިވިލާތުގެ ހޯމް ސެކްރެޓަރީ ޕްރިޓީ ޕަޓޭލް ނިންމަވައިފިއެވެ.
ޖޫލިއަން އާސާންޖް އެމެރިކާއާ ހަވާލުކުރަމް އިނގިރޭސިވިލާތުން ނިންމައި މިކަމުގެ އަމުރުގައި ޕަޓޭލް ސޮއިކޮށްފައިވާއިރު، މި ނިންމާއެކު ފާރަލައިގެން މައުލޫމާތު ހޯދާފައިވާތީ އެމެރިކާއިން އޭނާއާއި ދެކޮޅަށްފިޔަވަޅުތަކެއް އަޅާނެއެވެ. އެގައުމުގެ ސުޕްރީމް ކޯޓުން މި ކޭސް ހޯމް ސެކްރެޓަރީއަށް ފޮނުވާފައިވަނީ މިދިޔަ މަހުއެވެ.
ޕަޓޭލްގެ މި ނިންމުމާއެކު ވިކީ ލީކްސްއިން ވަނީ ވަގުތުން ސްޓޭޓްމަންޓްއެއް ނެރެފައެވެ. އަދި މި ނިންމުން ބަދަލުކުރަން ހުށަހަޅާނެ ކަމަށް ވަނީ ބުނެފައެވެ. މިއީ ފެށުމެއް ކަމަށާއި، ގާނޫނީ ގޮތުން ކުރެވެން ހުރި ހުރިހާ ކަމެއް ކުރާނެ ކަމުގައި ވިކީ ލީކްސްއިން ވަނީ ބުނެފައެވެ.
ޖޫލިއަން އާސާންޖް އަކީ ކުށްވެރިއެއް ނޫން ކަމަށާއި، އޭނާ ކުށެއް ކޮށްފައިވެސް ނުވާކަމަށް ވިކީ ލީކްސްއިން ބުނެފައިވެއެވެ. އޭނާއަކީ ނޫސްވެރިއެއް ކަމަށާއި، އޭނާއަށް އަދަބު ދެވިގެން އެދަނީ ވަޒީފާގެ ސަބަބުން ކަމަށް ވިކީ ލީކްސްއިން ބުނެފައިވެއެވެ.
މިކަމުގައި ރަނގަޅު ގޮތް ނިންމުމުގެ ބާރު ޕްރިޓީ ޕަޓޭލްގެ އަތްމަތީގައި އޮތްއިރު އޭނާ މި ނިންމި ނިންމުމުގެ ސަބަބުން، އެމެރިކާއިން އިންވެސްޓިގޭޓިވް ޖަރނަލިޒަމްއަކީ ކުށަކަށް ހެދުމަށް ކުރާ މަސައްކަތަށް އެހީވެދޭ މީހަކަށް އޭނާ ވެގެންދާނެ ކަމަށް ވިކީލީކްސްއިން ވަނީ ބުނެފައެވެ.
އޮސްޓްރޭލިއާއަށް ނިސްބަތްވާ ޖޫލިއަން މިވަގުތު ހުރީ ލަންޑަންގައި ހުންނަ ބެލްމަރޝް ޖަލުގައެވެ. ވިކީ ލީކްސްއިން ގެންދަނީ ގައުމުތަކުގެ އެތެރޭގެ ސިއްރުތައް ހޯދައި، މުޅި ދުނިޔެއަށް ހާމަކުރަމުންނެވެ.
