ބެއިލް ސްކިޕް ކުރުމުން ޖޫލިއަން އަސާންޖް 50 ހަފްތާއަށް ޖަލަށްލުމަށް ހުކުމްކޮށްފި
އިކުއެޑޯއިން ހިމާޔަތް އަނބުރާ ގެންދިއުމުން އަސާންޖް ހައްޔަރުކޮށްފައިވަނީ އޭޕްރިލް މަހުގެ 11 ވަނަ ދުވަހު
ޫޖޫލިއަން އަސާންޖް އިނގެރޭސި ފުލުހުންގެ ބެލުމުގެ ދަށުގައި
މީގެ ހަތް އަހަރުކުރިން ކަފާލާތުގައި ހުރެ ކޯޓަށް ހާޒިރުނުވެ، އިކުއެޑޮގެ އެމްބަސީއިން ހިމާޔަތް ހޯދި މައްސަލައިގައި ވިކީލިކްސްގެ ބާނީ، ޖޫލިއަން އަސާންޖް 50 ހަފްތާއަށް ޖަލަށް ލުމަށް އިނގެރޭސިވިލާތުގެ ކޯޓަކުން ހުކުމް ކޮށްފިއެވެ.
މި މައްސަލައިގައި ހުކުމް ކުރެއްވި ފަނޑިޔާރު، ޑެބޯރާ ޓެއިލަރ ވިދާޅުވީ، އަސާންޖް ކުރި ކުށަށް ވުރެ ވަކި ސީރިއަސް ކުށެއް އޮތް ކަމަށް ދެކިނުލައްވާ ކަމަށެވެ. އެކަމަނާ ވިދާޅުވީ، އަސާންޖް އިކުއެޑޯ އެމްބަސީއިން ހިމާޔަތް ހޯދީ އިންސާފު ލަސް ކުރުމަށް ކަމަށާއި، އަސާންޖް ހިމާޔަތް ހޯދައިގެން ހޭދަކުރި ހަތް އަހަރު، އޭނާގެ ސަބަބުން އިނގެރޭސި ރައްޔިތުންގެ ޓެކްސް ފައިސާއިން 16 މިލިއަން ޕައުންޑް (21 މިލިއަން އެމެރިކާ ޑޮލަރު) ބޭކާރުވެގެން ގޮސްފައިވާ ކަމަށެވެ.
ޝަރީއަތުގެ މަޖިލީހުގައި އަސާންޖް މަޑުމަޑުން އިންއިރު، ހުކުމް އިއްވުމަށް ފަހު ޕްރިޒަން އޮފިސަރުން އޭނާ ގެންދަން ފެށުމުން، ކޯޓުގެ ޕަބްލިކް ގެލެރީގައި ތިބި އޭނާގެ ސަޕޯޓަރުން ވަނީ ހުކުމް އިއްވި ފަންޑިޔާރު ލަދުގަންނަން ޖެހޭނެ ކަމަށް ބުނެ ފަންޑިޔާރަށް އަމާޒުކޮށް އަޑުއުފުލާފައެވެ.
ގިނަ އަދަދެއްގެ ނޫސްވެރިންނާއި ވިލިކީކްސް ސަޕޯޓަރުން އަޑުއަހަން ވަދެ ތިބި މި ޝަރީއަތުގެ އަޑުއެހުމުގައި އަސާންޖްގެ ވަކީލު، މާކް ސަމަރޒް ވިދާޅުވީ، އިކުއެޑޯގެ އެމްބަސީއަށް ވަދެ އަސާންޖް ހިމާޔަތް ހޯދީ އޭނާ އެމެރިކާ އާއި ހަވާލުކޮށްފާނެ ކަމުގެ ބިރު އޮތުމުން ކަމަށެވެ. އެގޮތުން އިނގެރޭސި ސަރުކާރުން އޭނާ އެމެރިކާ އާއި ހަވާލުކޮށް، އެމެރިކާއިން އޭނާ އަކީ ޓެރަރިސްޓެއް ކަމަށް ލޭބަލްކޮށް، ގުއަންޓަނަމޯ ބޭ ފަދަ ލާއިންސާނީ އަމަލުތައް ހިންގާ ޖަލަކަށް ލާފާނެކަމުގެ ބިރު އޮތްކަމަށެވެ.
އޭޕްރީލް 11 ވަނަ ދުވަހު އިކުއެޑޮ އެމްބަސީގައި ހުއްޓައި އަސާންޖް ހައްޔަރު ކޮށްފައިވަނީ، އިކުއެޑޯއިން އޭނާއަށް ދީފައިވާ ހިމާޔަތް އަނބުރާ ގެންދިއުމާއި ގުޅިގެންނެވެ. އިކުއެޑޯއިން ހިމާޔަތް އަނބުރާ ގެންގޮސްފައިވަނީ އަސާންޖް އެޤައުމުގެ ޚާރިޖީ ކަންކަމާއި ބެހޭ ކަމަށް ތުހުމަތު ކުރުމަށް ފަހުއެވެ. ނަމަވެސް ގިނަ ފަރާތްތަކަކުން ތުހުމަތު ކުރާ ގޮތުގައި އިކުއެޑޯގެ ނިންމުމަކީ ވިކިލީކްސްއިން އިކުއެޑޯއާއި ގުޅޭ ލިޔެކިޔުންތަކެއް ލީކުކޮށްލުމާއި ގުޅިގެން ނިންމި ނިންމުމެކެވެ.
އަސާންޖްގެ މައްޗަށް 50 ހަފްތާގެ ހުކުމެއް އިއްވާފައިވާއިރު، އެމެރިކާއިން އަސާންޖް އެކްޓްރަޑައިޓް ކުރުމަށް އެދިފައިވާ އެދުމަކާއި ގުޅިގެން ބާއްވާ ޝަރީއަތުގެ މަޖިލީހެއް ބުރާސްފަތި ދުވަހަށް ވަނީ ތާވަލްކޮށްފައެވެ.
