މާޓިނޭޒްގެ ތައުރީފު ކޮންސެއިސާއޯ އަށް

ޕޯޗުގަލްގެ ޒުވާން ކުޅުންތެރިޔާ ފްރެންސިސްކޯ ކޮންސެއިސާއޯ އަށް އެ ޓީމުގެ ކޯޗު ރޮބާޓޯ މާޓިނޭޒް ވަރަށް ބޮޑަށް ތައުރީފު ކޮށްފި އެވެ.

ކޮންސެއިސާއޯ އަށް ތައުރީފުކޮށް މާޓިނޭޒް ވާހަކަ ދެއްކީ ޖަރުމަނުގައި މިހާރު ކުރިއަށްދާ ޔޫރޯ ފުޓުބޯޅަ މުބާރާތުގެ ގްރޫޕް ސްޓޭޖުގައި ޕޯޗުގަލް އިން ކުޅުނު ފުރަތަމަ މެޗަށްފަހު އެވެ. ޗެކް ރިޕަބްލިކާ ދެކޮޅަށް ޕޯޗުގަލް ކުޅުނު މެޗުން އެ ޓީމު މޮޅުވީ ފަހު ވަގުތު ކޮންސެއިސާއޯ ޖެހި ލަނޑުންނެވެ.

މާޓިނޭޒް ބުނީ، ކޮންސެއިސާއޯ ސާބިތު ކޮށްދިނީ އޭނާގެ ފެންވަރު ކަމަށެވެ. އަދި ޕޯޗުގަލް ޓީމުގައި އޭނާ ހިމެނެން ޖެހޭ ކުޅުންތެރިޔެއްކަން އޭނާ ސާބިތުކޮށްދިން ކަމަށާއި، ޓީމަށް އެހީތެރިވެވިދާނެކަން ވެސް ކޮންސެއިސާއޯ ސާބިތު ކޮށްދިން ކަމަށް މާޓިނޭޒް ވަނީ ބުނެފަ އެވެ.

މީގެ އިތުރުން މާޓިނޭޒް ބުނީ ކޮންސެއިސާއޯ އަކީ ވަރަށް އާދަޔާ ޚިލާފު ހުނަރެއް ލިބިގެންވާ ކުޅުންތެރިޔެއް ކަމަށާއި، އޭނާ އަކީ ނުރައްކާތެރި ކުޅުންތެރިޔެއްކަން ވެސް ދައްކައިދީފައިވާ ކަމަށެވެ. ޚާއްސަކޮށް ޗެކް ރިޕަލްބިލްގެ އޭރިޔާ ތެރޭގައި ނުރައްކާ ކުރުމަށް ކޮންސެއިސާއޯ ގިނަ މަސައްކަތްތަކެއް ކުރިކަން މާޓިނޭޒް ފާހަގަ ކުރި އެވެ.

މީގެ އިތުރުން މާޓިނޭޒް ބުނީ، ބެންޗުން ކުޅެން އެރުމަށް ފަހު ކޮންސެއިސާއޯ ދެއްކި ކުޅުމަކީ، ކޯޗެއްގެ ޙައިސިއްޔަތުން އޭނާ އަށް ވެސް ހައިރާންކަން ލިބުނު ކުޅުމެއް ކަމަށެވެ. އެހެންކަމުން ކޮންސެއިއާސޯއާ މެދު ވަރަށް ބޮޑަށް ފަޚުރުވެރިވާ ކަމަށާއި، ޕޯޗުގަލް އަށް ކުރިއަށް ދާން އިތުރު ހިތްވަރެއް ވެސް ލިބުނު ކަމަށް މާޓިނޭޒް ވަނީ ބުނެފަ އެވެ.

މުބާރާތުގެ ގްރޫޕް ސްޓޭޖުގައި ޕޯޗުގަލްގެ ދެ ވަނަ މެޗުގައި އެ ޓީމު ނިކުންނާނީ ތުރުކީއާ ދެކޮޅަށެވެ. ތުރުކީން ވަނީ އެ ޓީމު ކުޅުނު ފުރަތަމަ މެޗުން މޮޅުވެފަ އެވެ.