ބެލްޖިއަމްގެ ކޯޗު ސްޕެއިންގެ ރޮބާޓޯ މާޓިނޭޒްގެ އެއްބަސްވުން އިތުރު ދެ އަހަރަށް އާކޮށްފި އެވެ.

ބެލްޖިއަމްގެ ކޯޗަކަށް އެވަޓަންގެ ކުރީގެ ކޯޗު މާޓިނޭޒް ހަމަޖެއްސީ 2016 ވަނަ އަހަރުގެ އޮގަސްޓް މަހުގެ ތެރޭގައެވެ. އޭނާ ބެލްޖިއަމްގެ ކޯޗަކަށް ހަމަޖެއްސީ 2016 ވަނަ އަހަރުގެ ޔޫރޯ ފުޓްބޯޅަ މުބާރާތަށް ފަހު އެ ޓީމުގެ ކޯޗުކަމުން މާކް ވިލްމޮޓްސް ވަކިކުރުމަށްފަހު އެވެ.

މީގެ ކުރިން މިއަހަރުގެ ހޫނު މޫސުމުގައި ބޭއްވުމަށް ހަމަޖެހިފައި އޮތް ޔޫރޯ ފުޓްބޯޅަ މުބާރާތަށްފަހު މާޓިނޭޒްގެ އެއްބަސްވުން އޮތީ ހަމަވާ ގޮތަށެވެ. އެކަމަކު ބެލްޖިއަމުން ވަނީ މާޓިނޭޒްގެ އެއްބަސްވުން އިތުރު ދެ އަހަރަށް އާކޮށްފައެވެ. އެހެންކަމުން 2022 ވަނަ އަހަރުގެ ފީފާ ވޯލްޑް ކަޕްގައިވެސް ބެލްޖިއަމަށް އިރުޝާދު ދޭނީ މާޓިނޭޒް އެވެ.

މާޓިނޭޒްގެ އިރުޝާދުގެ ދަށުން ބެލްޖިއަމުން މިހާތަނަށް މޮޅު ކުޅުމެއް ދައްކާފައިވާއިރު، މާޓިނޭޒް ވަނީ 2018 ވަނަ އަހަރުގެ ފީފާ ވޯލްޑް ކަޕުން ބެލްޖިއަމަށް ތިންވަނަ ހޯދާދީފަ އެވެ. އެއާއެކު މިދިޔަ އަހަރުގެ ހޫނު މޫސުމުގައި ބާސެލޯނާއިން ވަނީ މާޓިނޭޒް ހޯދަން މަސައްކަތް ކޮށްފަ އެވެ.

އުމުރުން 46 އަހަރުގެ މާޓިނޭޒް ކޯޗިން ކެރިއަރު ފެށީ 2007 ވަނަ އަހަރު ސްވޯންސީ ސިޓީންނެވެ. އެއަށް ފަހު އޭނާ ވަނީ ވިގަން އެތުލެޓިކާއި އެވަޓަން އަށްވެސް ކޯޗުކޮށްދީފަ އެވެ. ބެލްޖިއަމަކީ މާޓިނޭޒް އިރުޝާދުދޭ ފުރަތަމަ ގައުމީ ޓީމެވެ.