ޖަރުމަން ލީގުގެ ކުޅުންތެރިންނަށް ތައުރީފު ހައްގު: އިންފަންޓީނޯ

އެމެރިކާގެ ކަޅު ނަސްލުގެ ރައްޔިތެއް ކަމަށްވާ ޖޯޖް ފްލޮއިޑަށް އިންސާފު ހޯދައިދިނުމަށް އެދި ދަނޑުމަތީގައި ޖަރުމަން ލީގުގެ ކުޅުންތެރިން ދިން މެސެޖަށް ތައުރީފް ހައްގު ކަމަށް ދުނިޔޭގެ ފުޓްބޯޅައާ ބެހޭ މައި އިދާރާ، ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެ އެވެ.

ޖޯޖް ފްލޮއިޑް ހައްޔަރު ކުރަން އުޅުމުގެ ތެރޭގައި ދޮން ނަސްލުގެ ފުލުހަކު ވަނީ ފްލޮއިޑްގެ ކަރަށް ކަކުލުން އަރައި މަރާލާފައެވެ. އެއާއެކު ގިނަ ކުޅިވަރު ތަރިން އަންނަނީ އެކަމާ ދެކޮޅަށް އަޑު އުފުލަމުންނެވެ.

އެގޮތުން ޖަރުމަނު ލީގުގައި ހޯމަ ދުވަހުގެރޭ ކުޅުނު މެޗުތަކުގެ ތެރެއިން ލަނޑު ޖެހުމަށް ފަހު އުފާފާޅުކުރިއިރު ބޮރޫޝިއާ ޑޯޓްމަންޑުގެ ޖޭޑަން ސަންޗޯ އާއި އަޝްރަފް ހަކީމީ ވަނީ "ޖަސްޓިސް ފޯ ޖޯޖް ފްލޮއިޑް" ޖަހާފައިވާ މެސެޖެއް ދައްކާލާފައެވެ. އަދި ބޮރޫޝިއާ މުންޗެންގްލަޑްބެކްގެ ފޯވާޑް މާކަސް ތުރާމް ވަނީ ލަނޑު ޖަހުމަށްފަހު ކަކޫ ޖައްސައިގެން އިށީނދެފައެވެ. އޭގެ އިތުރަށް ޝާލްކާ އަށް ކުޅެމުން އަންނަ އެމެރިކާގެ މިޑްފީލްޑަރު ވެސްޓެން މެކެނީ ވަނީ ފްލޮއިޑަށް އިންސާފު ހޯދައިދިނުމަށް އެދި ގޮވާލާ މެސެޖު ލިޔެފައިވާ ބޭންޑެއް އަތުގައި އަޅާފައެވެ.

ޑޯޓްމުންޑް ކުޅުނު މެޗުގައި ލަނޑު ޖެހުމަށް ފަހު ސަންޗޯ އޭނާގެ ޖާޒީ ބާލައި ފްލޮއިޑަށް އިންސާފު ހޯދައިދިނުމަށް ގޮވާލާ ލިޔެފައިވާ މެސެޖު ދައްކާލުމުން، ގަވާއިދުގެ ދަށުން ރެފްރީ ވަނީ އޭނާ އަށް ރީނދޫ ކާޑެއް ދައްކާފައެވެ. ފުޓްބޯޅަ ގަވާއިދު ބުނާ ގޮތުން އުފާފާޅުކުރުމަށް ޖާޒީ ބާލައިފިނަމަ، އެ ކުޅުންތެރިއަކަށް ރީނދޫ ކަޑެއް ދައްކަން ޖެހެއެވެ. ސަންޗޯ އޭނާގެ ޖާޒީ ބޭލުމަށްފަހު ހާއްސަ މެސެޖު ދައްކާލި ނަމަވެސް، އެ ކްލަބުގެ ހަކީމީ ޖާޒީ ބާލާފައެއް ނުވެއެވެ. އެހެންކަމުން ފްލޮއިޑަށް އިންސާފު ހޯދައިދިނުމަށް ގޮވާލި އަނެއް ތިން ކުޅުންތެރިންނަށް ފިޔަވަޅު އަޅާފައެއް ނުވެ އެވެ.

މިކަމާ ގުޅިގެން ފީފާގެ ރައީސް އިންފަންޓީނޯ ވިދާޅުވީ ނަސްލީ ތަފާތުކުރުން ހުއްޓާލުމަށް ފީފާ އިން ވެސް ވަރަށް ބޮޑަށް ބާރު އަޅާ ކަމަށާއި، އެކަމަށް ގޮވާލާ ކުޅުންތެރިންނަށް ފިޔަވަޅު އެޅުމުގެ ބަދަލުގައި ތައުރީފް ހައްގު ކަމަށެވެ. އެހެންކަމުން މި ދަނޑިވަޅުގައި ނަސްލީ ތަފާތުކުރުމާ ދެކޮޅަށް އަޑުއުފުލާ ކުޅުންތެރިންނަށް އަދަބު ނުދޭން އިންފަންޓީނޯ ވަނީ ގޮވާލާފައެވެ.

ޖަރުމަން ލީގުގެ އިތުރުން ޕްރިމިއާ ލީގުގެ ކްލަބުތަކުގެ ކުޅުންތެރިންވެސް އަންނަނީ ފްލޮއިންޑަށް އިންސާފު ހޯދައިދޭން ގޮވާލަމުންނެވެ. އެގޮތުން ލިވަޕޫލާއި ޗެލްސީން ފަރިތަކުރުންތައް ފެށީ ހުރިހާ ކުޅުންތެރިން ކަކޫ ޖައްސައިގެން އިށީނދެ އިނުމަށްފަހު އެވެ.

މީގެ ކުރިން އިނގިރޭސި އެފްއޭ އިން ވަނީ ޕްރިމިއާ ލީގުގައި ނަސްލީ ތަފާތުކުރުމާ ދެކޮޅަށް އަޑުއުފުލާ އެއްވެސް ކުޅުންތެރިއަކަށް ފިޔަވަޅު ނާޅާނެކަން ހާމަކޮށްފައެވެ.