އިންޓަ މިލާނަށް ކުޅެމުން އަންނަ އާޖެންޓީނާގެ ފޯވާޑް ލަޓާރޯ މާޓިނޭޒްގެ އޭޖެންޓް ރެއާލް މެޑްރިޑާއި އެތުލެޓިކޯ މެޑްރިޑާއެކު ބައްދަލުވުންތަކެއް ބޭއްވި ކަމަށް ސްޕެއިނުގެ މީޑިއާތަކުން ރިޕޯޓުކޮށްފިއެވެ.

އުމުރުން 23 އަހަރުގެ މަޓިނޭޒަކީ މީގެ ކުރިން ބާސެލޯނާއިން ހޯދަން މަސައްކަތްކުރި ކުޅުންތެރިއެކެވެ. ދާދި ފަހުން ދިން އިންޓަވިއުއެއްގައި މަޓިނޭޒް ބުނީ އާޖެންޓީނަގެ ތަރި ލިއޮނެލް މެސީގެ އެދުމަކަށް ބާސާއަށް ދާން މީގެ ކުރިން މަސައްކަތްކުރި ކަމަށާއި، އެކަމަކު މި ވަގުތު އިންޓަގައި ހުރީ ހިތްހަމަޖެހިގެން ކަމަށެވެ.

އެކަމަކު ސްޕެއިނުގެ މީޑިއާ ރިޕޯޓުތައް ބުނާ ގޮތުން ދާދި ފަހުން މާޓިނޭޒްގެ އޭޖެންޓް ވަނީ މެޑްރިޑުގެ ދެ ކުލަބު ކަމަށްވާ ރެއާލާއި އެތުލެޓިކޯއާއެކު މަޝްވަރާ ބައްދަލުވުންތަކެއް ބާއްވާފައެވެ. އަދި މި ބައްދަލުވުންތަކަކީ ކުރިއަށް އޮތް ހޫނު މޫސުމުގެ ޓްރާންސްފާގައި މާޓިނޭޒް ކުލަބު ބަދަލުކުރުމާ ގުޅޭ ގޮތުން ބޭއްވި ބައްދަލުވުންތަކެއް ކަމަށްވެސް ވަނީ ރިޕޯޓުކޮށްފައެވެ.

މިދިޔަ އަހަރުގެ ހޫނު މޫސުމުގެ ޓްރާންސްފާގައި މާޓިނޭޒްގެ ޓްރާންސްފައާ ގުޅޭ ވާހަކަތައް ގަދަވިއިރު، އެ ފަހަރުވެސް މާޓިނޭޒް ހޯދަން ރެއާލުން މަސައްކަތްކުރި ކަމަށް ރިޕޯޓުތައް ބުނެއެވެ. އެކަމަކު ފަހުން އެ ކުލަބުން ވަނީ މާޓިނޭޒްގެ ސޮއި ހޯދަން މަސައްކަތް ކޮށްފައިނުވާ ކަމަށް ބުނެފައެވެ.

ޔޫރަޕުގައި ފާހަގަކޮށްލެވޭ ފޯވާޑުންގެ ތެރޭގައި މާޓިނޭޒް ހިމެނޭއިރު، އޭނާ އިންޓައަށް ބަދަލުވީ 2018 ވަނަ އަހަރު ފަސް އަހަރުގެ އެއްބަސްވުމެއް ދަށުންނެވެ. އާޖެންޓީނާގެ ރޭސިން ކުލަބުން 22 މިލިޔަން ޔޫރޯއަށް އިންޓައަށް ބަދަލުވި މާޓިނޭޒް އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ. އެގޮތުން މާޓިނޭޒް ވަނީ މިހާތަނަށް އިންޓަރއަށް ކުޅެދިން 131 މެޗުގައި 48 ލަނޑު ޖަހާފައެވެ. އަދި ވަނީ އިންޓައާއެކު މި ސީޒަނުގެ އިޓާލިއަން ލީގު ކާމިޔާބުކޮށްފައެވެ.