ސްޕެއިންގެ ޗެމްޕިއަން ރެއާލް މެޑްރިޑުން އިންޓަ މިލާނަށް ކުޅެމުން އަންނަ އާޖެންޓީނާގެ ފޯވާޑް ލަޓާރޯ މާޓިނޭޒްގެ ސޮއި ހޯދަން ނޫޅޭ ކަމަށް އެ ކުލަބުން ބުނެފިއެވެ.

މީގެ ކުރިން ސްޕެއިންގެ ބައެއް މީޑިއާތަކުން ވަނީއުމުރުން 23 އަހަރުގެ ފޯވާޑުގެ ސޮއި ހޯދުމަށް ރެއާލުން ބިޑް ކުރުމަށް ތައްޔާރުވެފައިވާ ކަމަށް ރިޕޯޓުކޮށްފައެވެ.

އެކަމަކު ރެއާލްގެ އޮފިޝަލަކު ދާދި ފަހުން ބުނީ އެ ކުލަބުން މި ޓްރާންސްފާ ބާޒާރުގައި ބޮޑު ޚަރަދެއް ކުރުމުގެ ވިސްނުމެއް ނުގެންގުޅޭ ކަމަށެވެ. އަދި އޭނާ ބުނީ މާޓިނޭޒް އަކީ މޮޅު ކުޅުންތެރިއެއް ކަމަށާއި، އަދި ޔޫރަޕްގެ ގިނަ ކުލަބުތަކުން އޭނާއަށް ފާރަލަމުން އައި ނަމަވެސް، ރެއާލުން މާޓިނޭޒް ހޯދުމަށް މަސައްކަތް ނުކުރާ ކަމަށެބެ. އަދި އެޓީމުގެ ކޯޗު ޒިނެދިން ޒިދާންގެ އިތުބާރު މިހާރުގެ ސްކޮޑަށް އެބައޮތް ކަމަށްވެސް ވަނީ ބުނެފައެވެ.

އޭނާ އިތުރަށް ބުނީ ރެއާލްގެ މެނޭޖުމަންޓްގެ ފުރިހަމަ އިތުބާރު ޒިދާނަށް އޮންނަ ކަމަށާއި، ޒިދާނާއިއެކު ރެއާލުން މި ސީޒަނުގައިވެސް ކާމިޔާބު ހޯދާނެ ކަމުގެ ޔަގީންކަން އެބައޮތް ކަމަށެވެ.

މާޓިނޭޒް ހޯދަން ރެއާލުން މަސައްކަތް ކުރަމުން އަންނަ ކަމަށް ސްޕެއިންފގެ މީޑިއާތަކުން ރިޕޯޓުކުރިއިރު، މީގެ ކުރިން މާޓިނޭޒް ހޯދުމަށް މަސައްކަތް ކޮށްފައިވަނީ ވާދަަވެރި ބާސެލޯނާއިންނެވެ. މާޓިނޭޒް އިންޓައާއެކު ހަދާފައިވާ އެއްބަސްވުން އުވާލަން 111 މިލިޔަން ޔޫރޯ ދައްކަން ޖެހެއެވެ. އެކަމަކު ބާސާގެ ރައީސް ޖޯސެފް މާރިއާ ބާޓޮމެއޫ ވަނީ މާޓިނޭޒްގެ ހޯދަން ކުރިން ބިޑް ކުރަން ވިސްނި ނަމަވެސް، އެ ވިސްނުން މިހާރު ނެތް ކަމަށާއި، އެވަރު ބޮޑު ޓްރާންސްފާއެއް ކޮވިޑް-19 ގެ މި ހާލަތުގައި ކުރެވެން ނެތް ކަމަށް ވިދާޅުވެފައެވެ.

ޔޫރަޕްގެ ބޮޑެތި ކުލަބުތަކުން ފާރަލަމުން އަންނަ މާޓިނޭޒް އިންޓައާ ގުޅުނީ 2018 ވަނަ އަހަރު ފަސް އަހަރުގެ އެއްބަސްވުމެއް ދަށުންނެވެ. އާޖެންޓީނާގެ ރޭސިން ކްލަބުން 22 މިލިޔަން ޔޫރޯއަށް އިންޓައަށް ބަދަލުވި މާޓިނޭޒް އަންނަނީ އެޓީމުގައި މޮޅު ކުޅުމެއް ދައްކަމުންނެވެ. އެގޮތުން މާޓިނޭޒް ވަނީ މިހާތަނަށް އިންޓަ އަށް ކުޅެދިން 84 މެޗުގައި 30 ލަނޑު ޖަހާފައެވެ. އަދި އޭނާ ވަނީ އާޖެންޓީނާ ގައުމީ ޓީމަށް މިހާތަނަށް ކުޅެދިން 17 މެޗުގައި ނުވަ ލަނޑު ކާމިޔާބުކޮށްފައެވެ.