ރޮނާލްޑޯ އަށް ހަ ޔޫރޯ، އެންމެ މުސްކުޅި ކުޅުންތެރިއަކަށް ޕެޕޭ

ޔޫރޯ ފުޓްބޯޅަ މުބާރާތުގައި ކުޅުނު އެންމެ މުސްކުޅި ކުޅުންތެރިއަކަށް ޕޯޗުގަލްގެ ޑިފެންޑަރު ކަމުގައި ޕެޕޭ ވެއްޖެ އެވެ.

ޗެލް ރިޕަބްލިކް އަތުން 2-1އިން ޕޯޗުގަލް މޮޅުވި މެޗުގައި އޭނާ ނުކުތްއިރު އުމުރަކީ 41 އަހަރާއި 113 ދުވަހެވެ. ކުރިން މި ރެކޯޑް އޮންނަނީ ހަންގޭރީގެ ގޯލްކީޕަރު ގަބޯ ކިރާއީގެ އަތުގަ އެވެ. ޕިޖާމާއެއް ލައިގެން 2016 ވަނަ އަހަރުގެ މުބާރާތުގައި ކުޅުނު ކީޕަރު އެންމެ މުސްކުޅި ކުޅުންތެރިޔާގެ ރެކޯޑް ހެދީ 40 އަހަރާއި 86 ދުވަހު ބެލްޖިއަމްއާ ދެކޮޅަށް ކުޅެގެންނެވެ.

ވަރުހަދަ ދިފާއީ ތަނބެއްގެ ގޮތުގައި ފާހަގަ ކުރެވޭ ޕެޕޭ ޕޯޗުގަލްގެ ގައުމީ ޓީމަށް އެންމެ ކުޅުނީ އުމުރުން 24 އަހަރުގައި ބްރެޒިލްގެ ކޯޗު ލުއިސް ފިލިޕޭ ސްކޮލާރީގެ ކޯޗުކަމުގަ އެވެ. އޭނާ ވަނީ މިހާތަނަށް ގައުމީ ޓީމަށް 136 މެޗު ކުޅެދީފަ އެވެ. މި ހުރިހާ މެޗެއްގައި ގައުމީ ޓީމަށް 8 ގޯލު ޖަހައިދީ 25 ރީނދޫ ކާޑު ހޯދި އެވެ.

ރޭގެ މެޗުގައި ކެޕްޓަން ބޭންޑާއެކު ކުޅެން ނުކުތް ރޮނާލްޑޯ ވަނީ މީގެ ކުރިން ޔޫރޯގައި ފަސް ފަހަރު ކުޅެފަ އެވެ. މި ފަހަރުގެ މުބާރާތަކީ އޭނާގެ ހަ ވަނަ މުބާރާތެވެ. މިހެންވެ މިއީ ވެސް ރެކޯޑެކެވެ.

އުމުރުން 39 އަހަރުގެ ރޮނާލްޑޯ އަކީ ޕޯޗުގަލްގެ ގައުމީ ޓީމަށް އެންމެ ގިނަ ގޯލު ޖަހައި އެންމެ ގިނަ މެޗު ކުޅެދިން ކުޅުންތެރިޔާ އެވެ. އަދި އޭނާ އަކީ ދުނިޔޭގައި ގައުމީ ޓީމަކަށް އެންމެ ގިނަ ގޯލު ޖެހި ކުޅުންތެރިޔާ ވެސްމެ އެވެ. ސައޫދީ އަރަބިއާގެ އައް ނަސްރަށް ކުޅެމުން އަންނަ ފޯވަޑް މި ފަހަރުގެ މުބާރާތުގައި ގޯލެއް ޖަހައިފިނަމަ އޭނާ ވެގެންދާނީ މުބާރާތުގައި ގޯލެއް ޖަހާ އެންމެ ދޮށީ ކުޅުންތެރިޔާ އަށެވެ. އަދި ޔޫރޯގައި އެންމެ ގިނަ މެޗު ކުޅުންތެރިއަކީ ވެސް އޭނާ އެވެ. އެއީ 25 މެޗެވެ. އޭނާ ވަނީ މުބާރާތުގައި 11 ގައުމެއްގެ ކޮޅަށް ގޯލު ޖަހައިފަ އެވެ.