ޔޫރޯ ފުޓުބޯޅަ މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި ސާބިއާއާ ދެކޮޅަށް އިންގްލެންޑުން ދެއްކި ކުޅުމާމެދު ހިތްހަމަ ޖެހޭ ކަމަށް، އެ ޓީމުގެ ކޯޗު ގަރެތު ސައުތުގޭޓް ބުނެފި އެވެ.

މީގެ ތިން އަހަރެއް ކުރިން އަމިއްލަ ގައުމުގައި އޮތް ޔޫރޯ މުބާރާތުގެ ފައިނަލްގައި ވެސް ކުޅުނު އިންގްލެންޑަކީ، މިއަހަރު ޖަރުމަނުގައި ކުރިއަށްދާ ޔޫރޯގައި ފޭވަރިޓުންގެ ގޮތުގައި ގިނަ ބަޔަކު ދެކެމުން އަންނަ ޓީމެކެވެ. ހާއްސަކޮށް މިހާރު އިންގްލެންޑުގައި އޮތް ސްކޮޑަށް ބަލާއިރު، އެ ޓީމަށް މިއަހަރުގެ މުބާރާތް ކާމިޔާބު ކުރެވެން ޖެހޭނެ ކަމަށް ވެސް ގިނަ ބަޔަކު ގަބޫލު ކުރެއެވެ.

އާދިއްތަ ދުވަހުގެ ރޭ ސާބިއާއާ ދެކޮޅަށް ކުޅުނު މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ސައުތުގޭޓް ބުނީ، ފުރަތަމަ ހާފުގައި އިންގްލެންޑުން ބޯޅަ ހިފަހައްޓައިގެން ރަނގަޅަށް ކުޅެ، މެޗުގެ ކޮންޓްރޯލް އެމީހުންގެ އަތް މައްޗަށް ނެގި ކަމަށެވެ. ފުރަތަމަ ހާފުގައި ޖެހި ލަނޑުގެ އިތުރުން، ދެވަނަ ލަނޑެއް ވެސް އިންގްލެންޑަށް ޖެހުނީސް ކަމަށް ސައުތުގޭޓް ވަނީ ބުނެފަ އެވެ.

އޭނާ ބުނީ، ފުރަތަމަ ހާފުގައި އިންގްލެންޑުން ވަރަށް ހިތްވަރާއި، ޖޯޝާއެކު ކުޅުނު ކަމަށާއި، އުއްމީދުކޮށްގެން ހުރީ ދެވަނަ ހާފުގައި ވެސް އެކަން ތަކުރާރު ވާނެ ކަމަށެވެ. އެހެންނަމަވެސް، ސާބިއާ އިން ވެސް ލަނޑެއް ޖަހަން މަޖުބޫރުވެފައި އޮތްއިރު، ދެވަނަ ހާފުގައި އިންގްލެންޑުގެ ކުޅުން ކޮންމެވެސް ވަރަކަށް ދަށްވި ކަމަށް ވެސް ސައުތުގޭޓް ބުންޏެވެ.

އެހެންނަމަވެސް، މެޗުގައި އިންގްލެންޑުގެ ކުޅުންތެރިން ޖުމްލަ ގޮތެއްގައި ދެއްކި ކުޅުމާއި، ކުރި މަސައްކަތާ މެދު ހިތްހަމަ ޖެހޭ ކަމުގައި ސައުތުގޭޓް ވަނީ ބުނެފަ އެވެ. އިތުރަށް އޭނާ ބުނީ މުބާރާތުގެ ފުރަތަމަ މެޗުން ބޭނުންވި ތިން ޕޮއިންޓު ލިބުމުން، ދެން މަސައްކަތް ކުރަންވީ ކުރިއަށް އޮތް ދެ ވަނަ މެޗަށް ކަމަށެވެ. ހާއްސަކޮށް ފުރަތަމަ މެޗުން ލިބުނު މޮޅާއެކު، ޓީމަށް އިތުރު ހިތްވަރެއް ލިބުނު ކަމަށް ވެސް އޭނާ ވަނީ ބުނެފަ އެވެ.

މުބާރާތުގެ ގްރޫޕް ސްޓޭޖުގެ ދެވަނަ މެޗުގައި މި މަހުގެ 20 ވަނަ ދުވަހު އިންގްލެންޑު ނިކުންނާނީ ޑެންމާކާ ދެކޮޅަށެވެ. ޑެންމާކު ކުޅުނު ފުރަތަމަ މެޗުން އެ ޓީމު ވަނީ އެއްވަރުވެފަ އެވެ.