"ބާރުވެރި އަންހެނުން"ގެ ނަމުގައި ޕްރޮގްރާމެއް ފަށަނީ
ފުރަތަމަ ޝެޝަން ބޭއްވުމަށް ހަމަޖެހިފައިވަނީ އޮގަސްޓް މަހުގެ 10 ވަނަ ދުވަހު
ހޯރަފުށީ އަންހެނުންގެ ކޮމެޓީ
މާލޭ ސިޓީ ކައުންސިލުގެ އަންހެނުންގެ ތަރައްޤީއަށް މަސައްކަތްކުރާ ކޮމެޓީީގެ ފަރާތުން "ބާރުވެރި އަންހެނުން"ގެ ނަމުގައި މައުލޫމާތު ދިނުމުގެ ޕްރޮގްރާމެއް ފަށަން ނިންމައިފިއެވެ.
މި ޕްރޮގްރާމް ފެށުމަށް ހަމަޖެހިފައިވަނީ އެކި ދާއިރާތަކުން މައުލޫމާތުދޭ ސިލްސިލާ ޕްރޮގްރާމެއްގެ ގޮތަށެވެ.
ޕްރޮގްރާމްގެ ފުރަތަމަ ޝެޝަން ބޭއްވުމަށް ހަމަޖެހިފައިވަނީ އޮގަސްޓް މަހުގެ 10 ވަނަ ދުވަހުގެ މެންދުރު 02:00 ޖަހާއިރު އެމެރިކަން ސެންޓަރުގައެވެ. މައުލޫމާތުދިނުމަށް ހަމަޖެހިފައިވާ ބައެއް ދާއިރާތަކަކީ ސިއްޙަތުގެ ދާއިރާ އާއި ވިޔަފާރީގެ ދާއިރާ އާއި ލައިފް ސްކިލްސް އަދި ލީޑަރޝިޕް ދާއިރާއެވެ.
މި ޕްރޮގްރާމްއަކީ އަންހެން ބޭފުޅުންނަށް އަމާޒުކޮށްގެން އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ ފަރާތުން ބޭއްވުމަށް ހަމަޖެހިފައިވާ ޕްރޮގްރާމް އެކެވެ.
އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ ރައީސާއަކީ ފާތިމަތު އަފްޝަން ލަތީފްއެވެ. އަދި ކޮމެޓީގެ ނައިބު ރައީސާއަކީ އައިޝަތު ޝިފާނާ ވަޖީހުއެވެ. މި ކޮމެޓީގައި މާލެސިޓީގެ އެކި ދާއިރާތަކުގެ 11 މެމްބަރުން ހަރަކާތްތެރިވެއެވެ.
މި ކޮމެޓީގެ މައިގަނޑު މަސައްކަތަކީ ތައުލީމީ ގޮތުން އަންހެނުން ކުރިއެރުވުމާއި ސިޔާސީ ކަންތައްތަކުގައި އަންހެނުން ބައިވެރިވާ މިންވަރު އިތުރުކުރުމާއި އަންހެނުންގެ އަސާސީ ޙައްގުތަކަށް ހޭލުންތެރިކުރުވުމާއި އަންހެންގެ ޙައްޤުތައް ހިމާޔަތްކުރުމާއި އަންހެނުން ބާރުވެރި ކުރުވުމެވެ.
