ކުވޭތުގެ އަމީރު ޝެއިޚް މިޝާލް އަލް އަހްމަދު އަލް-ޖާބިރު އެ ގައުމުގެ އައު ވަލީ އަހުދު ކަމަށް ޝެއިޚް ސޮބާހް ޚާލިދް އަލް-ސޮބާހް ހަމަ ޖައްސަވައިފި ކަމަށް ކުވޭތުގެ ރަސްމީ ނިއުސް އޭޖެންސީ ކޫނާ އިން ހާމަކޮށްފިއެވެ.

އައު ވަލީ އަހުދުގެ ގޮތުގައި ބޭފުޅަކު ރަސްގެފާނު މި ހަމަޖެއްސެވީ ރަސްކަމަށް އިސްވެ ވަޑައިގެންނެވިތާ 6 މަސް ދުވަސް ފަހުންނެވެ.

އުމުރުފުޅުން 71 އަހަރުގެ އައު ވަލީ އަހުދު ޝެއިޚް ސޮބާހް އަކީ ކުރިން ކުވޭތުގެ ބޮޑު ވަޒީރު ކަމާއި ޚާރިޖީ ވަޒީރުކަން ކުރައްވާފައިވާ ބޭފުޅެކެވެ.

އައު ވަލީ އަހުދު އައްޔަން ކުރެވުނު މި ދަނޑިވަޅަކީ ކުވޭތުގެ ސިޔާސީ މަސްރަހް ހަލަބޮލިވެފައިވާ ދަނޑިވަޅެއްކަން ފާހަގަ ކުރެވެއެވެ. ސިޔާސީ މަސްރަހް ގޯސްވުމުގެ ސަބަބުން އަމީރު ޝެއިޚް މިޝާލް ވަނީ ދާދި ފަހުން ކުވޭތުގެ ގާނޫނު ހަދާ މަޖިލިސް އުވާލައްވާފައެވެ.

ކުވޭތު ސިޔާސީ މަސްރަހް ނުތަނަވަސްވެ ގައުމުގެ ކަންކަން ހިންގުމުގައި ގޮންޖެހުންތައް ކުރިމަތިވެފައިވާ ސަބަބުތަކުގެ ތެރޭގައި ވެލްވެފެއަރ ނިޒާމަށް ގެނެވުނު ބަދަލުތަކުގެ ސަބަބުން ސަރުކާރު ހިންގުމުގައި ދަރަނި އިތުރުވެގެން ދިއުން ހިމެނޭ ކަމަށް ޚަބަރުތައް ބުނެއެވެ.

ތެލުގެ އާމްދަނީ އިންތިހާ އަށް ލިބޭ ކުވޭތުގެ ސިޔާސީ މަސްރަހް ނުތަނަވަސް ވެފައި ވުމާއެކު ސަރުކާރު މުވައްޒަފުންގެ މުސާރަ ބަޖެޓުން ހަމަ ޖެއްސުމަށްވެސް ބޮޑެތި ދަތިތައް ކުރިމަތިވެފައިވާ ކަމަށްވެއެވެ.

އާބާދީގައި 4.2 މިލިއަން މީހުން ހިމެނޭ ކުވޭތަކީ ދުނިޔޭގެ 6 ވަނަ އަށް އެންމެ ބޮޑު ތެލުގެ ރިޒާވް ލިބިފައިވާ ގައުމެވެ.

ކުވޭތަކީ 1991 ވަނަ އަހަރު ސައްދާމް ހުސެއިންގެ ސިފައިން އެގައުމުން ބޭލުމަށް ކުރެވުނު ގަލްފް ހަނގުރާމައިގެ ފަހުން އެމެރިކާ އާ ގާތް ގުޅުމެއް އަންނަ ގައުމެކެވެ. ކުވޭތުގައި އެމެރިކާގެ 13،500 ސިފައިން ގާއިމްވެ މިހާރުވެސް އެބަތިއްބެވެ. އޭގެ އިތުރުން އެމެރިކާ ސިފައިންގެ މެދުއިރުމަތީގެ ހެޑްކުއަރޓާ ވެސް ހުންނަނީ ކުވޭތުގައެވެ.