އެމެރިކާގެ މަޝްހޫރު ލަވަކިއުންތެރިޔާ ޓެއިލާ ސްވިފްޓްގެ ކޮންސެޓްގެ ސަބަބުން ރުޅި އައިސްފައިތިބި ރެއާލް މެޑްރިޑްގެ ސަޕޯޓަރުންގެ ފިނިވެއްޖެ އެވެ.

ރެއާލް މެޑްރިޑްގެ ސަޕޯޓަރުން ރުޅި ގަދަވެފައި ތިބީ އިއްޔެ އާއި އޭގެ ކުރީ ދުވަހު ރެއާލްގެ ސްޓޭޑިއަމުގައި ޓެއިލާ ސްވިފްޓްގެ ހާއްސަ ކޮންސެޓެއް ބާއްވާތީ އެވެ. މި ކޮންސެޓްގެ ސަބަބުން އުފެދުނު ސުވާލަކީ މިރޭ ކުޅޭ ޗެމްޕިއަންސް ލީގު ފުޓްބޯޅަ މުބާރާތުގެ ފައިނަލް މެޗު ރެއާލްގެ ދަނޑުގައި ބެލޭނެ އިންތިޒާމް ހަމަޖެއްސޭނެތޯ އެވެ. ރަށުން ބޭރުގައި ރެއާލް މެޑްރިޑް ކުޅޭ މުހިންމު މެޗުތައް ސަޕޯޓަރުންނަށް ދެއްކުމަށް ރެއާލްގެ ސަޕޯޓަރުންނަށް ދަނޑުގައި ބޮޑު ސްކްރީނުން މެޗުތައް ބެލޭނެ އިންތިޒާމް ހަމަޖައްސަ އެވެ. މިކަން ކުރަނީ ކުޑަ އަގެއްގައި ޓިކެޓް ވެސް ވިއްކައިގެންނެވެ. މިހެންވެ މިއީ ރެއާލް މެޑްރިޑަށް އާމްދަނީ ވެސް ލިބޭ ކަމެކެވެ. ނަމަވެސް ފައިނަލް މެޗު ބެލުމަށް ހުރަސް އެޅިދާނެތީވެ ކޮންސެޓް ކެންސަލް ކުރަން ވެސް ރެއާލް މެޑްރިޑުން ފުރަތަމަ ވިސްނި އެވެ.

ރެއާލް މެޑްރިޑުން އެންމެ ބޭނުންވާ މުބާރާތަކީ ޗެމްޕިއަންސް ލީގެވެ. އެމީހުންނަކީ މުބާރާތުގެ އެންމެ ކާމިޔާބު ޓީމު ވެސްމެ އެވެ. ޖަރުމަނުގެ ބޮރޫޝިޔާ ޑޯޓްމުންޑާ ދެކޮޅަށް ލަންޑަނުގެ ވެމްބެލީ އަށް މިރޭ ރެއާލް ނުކުންނާނީ 15 ވަނަ ފަހަރަށް މި މުބާރާތް ކާމިޔާބުކުރުމަށް އަޒުމް ކަނޑައަޅައިގެންނެވެ.

ކުރިން ބެލެވިފައި އޮތީ ޓެއިލާ ސްވިފްޓްގެ ކޮންސެޓް ރޭ ނިމުމާއެކު ދަނޑު ތައްޔާރުކުރުމަށް އެކަށީގެންވާ ވަގުތު ނުލިބޭނެ ކަމަށެވެ. ނަމަވެސް މިކަމަށް މަގު ފަހިވީ ކޮންސެޓް ނިމުމާއެކު އެންމެ ސިކުންތެއްވެސް ބޭކާރުނުކޮށް ރެއާލް މެޑްރިޑްގެ ސަޕޯޓް ސްޓާފުން ކުރި މަސައްކަތުންނެވެ. ދަނޑުގައި ތައްޔާރުކޮށްފައިވާ ސްޓޭޖާއި ކޮންސެޓްގެ ސާމާނުތައް ނަގައި މިރޭގެ 12 ޖަހާއިރު ކުޅޭ މެޗަށް ސަޕޯޓަރުންނަށް މެޗު ބެލޭނެ އިންތިޒާމް މިހާރު ވަނީ އެންމެ ފުރިހަމަކޮށްފަ އެވެ.

ރެއާލް މެޑްރިޑްގެ ސެންތިއާގޯ ބާނަބައު ސްޓޭޑިއަކީ ދުނިޔޭގެ އެންމެ ފެންވަރު ރަނގަޅު އެއް ސްޓޭޑިއަމެވެ. ފުޓްބޯޅައިގެ އިތުރުން ކޮންސެޓްތަކާއި ހަފުތާތައް ވެސް ބޭއްވޭ ގޮތަށް ފަރުމާކޮށްފައިވާ ސްޓޭޑިއަމުގައި ޓެއިލާ ސްވިފްޓް ފާފޯމް ކުރުމުން ކުލަބަށް ވެސް ވަނީ ބޮޑު ފައިދާއެއްވެފަ އެވެ. ސްޕޭނުގެ މީޑިއާތަކުން ބުނާ ގޮތުގައި މި ކޮންސެޓުން ލިބުނު ފައިސާގެ އަދަދަކީ ގާތްގަނޑަކަށް 13 މިލިއަން ޑޮލަރެވެ. ކޮންސެޓްގެ އެގްރީމަންޓްގައިވާ ގޮތުން ރެއާލް މެޑްރިޑަށް 70 ޕަސެންޓް ފައިސޭ ލިބޭނެ އެވެ. އެއީ ގާތްގަނޑަކަށް 9 މިލިއަން ޑޮލަރެވެ.

ޗެމްޕިއަންސް ލީގު ފައިނަލަށް ސްޓޭޑިއަމް ތައްޔާރުނުކެވިދާނެ ކަމުގެ ބިރު ހީވިޔަސް ކުލަބުގެ ރައީސް ފްލޮރެންޓީނޯ ޕެރޭޒް މި ކޮންސެޓް ނުބާއްވައި ދޫކޮށްނުލި ސަބަބަކީ ވެސް މިހާބޮޑު ފައިދާއެއް ލިބޭތީ އެވެ.