ނަޕޯލީގެ ކޯޗަކަށް ކޮންޓޭ ހަމަޖައްސަނީ

އިޓާލިއަން ލީގުގެ ނަޕޯލީގެ ކޯޗަކަށް އިޓަލީގެ އެންޓޯނިއޯ ކޮންޓޭ ހަމަޖައްސަން ނިންމައިފި އެވެ.

ނަޕޯލީގެ ކޯޗަކަށް އެންމެ ފަހުން ހުރީ ވޯލްޓާ މަޒާރީ އެވެ. ނަމަވެސް ނަޕޯލީން ވަނީ ކުލަބުގެ ނަތީޖާތައް ދަށްވުމުގެ ސަބަބުން މިއަހަރުގެ ފެބްރުވަރީ މަހުގެ ތެރޭގައި އޭނާ މަގާމުން ވަކިކޮށްފަ އެވެ. އެއަށްފަހު ނަޕޯލީގެ ވަގުތީ ކޯޗަކަށް ހަމަޖެއްސީ ފްރެންޗެސްކޯ ކަލްޒޯނާ އެވެ. އެ މަގާމަށް އޭނާ ހަމަޖެއްސީ ސީޒަންގެ ބާކީ ގޮތް މުއްދަތަށެވެ. ނަޕޯލީގެ ވަގުތީ ކޯޗުކަން އުމުރުން 55 އަހަރުގެ ކަލްޒާނޯއާ ހަވާލުކުރިއިރު، އޭނާ ހުރީ ސްލޮވޭކިއާ ޤައުމީ ފުޓުބޯޅަ ޓީމުގެ ކޯޗުގެ މަގާމުގަ އެވެ.

ނަޕޯލީން ވަނީ ކުރިއަށް އޮތް އައު ސީޒަނަށް ކޯޗެއް ހޯދުމުގެ މަސައްކަތް ފަށައިގެން، ކޮންޓޭ އާއެކު އެއްބަސްވުމަކަށް އައިސްފަ އެވެ. އިޓަލީގެ މީޑިއާ ތަކުގައި ބުނެފައިވާ ގޮތުން، ނަޕޯލީގެ ފަރާތުން ކޮންޓޭ އަށް ހުށަހަޅާފައިވާ ހުށަހެޅުން، އޭނާ ވަނީ ޤަބޫލު ކޮށްފަ އެވެ. ނަޕޯލީން ކޮންޓޭ އަށް ހުށަހަޅާފައި ވަނީ ތިން އަހަރު ދުވަހުގެ އެއްބަސްވުމެކެވެ. އެހެންކަމުން، 2027 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބަށް އިރުޝާދު ދޭނެ އެވެ.

ކޮންޓޭ އާއެކު ނަޕޯލީން އެއްބަސްވުމަކަށް އައިސްފައިވާއިރު، މުސާރަ އާއި އެހެނިހެން އިނާޔަތްތައް އަދި ކޯޗިން ސްޓާފުންގެ މާއްދާތައްް ވެސް އެކުލަވާލީ ދެ ފަރާތް މަޝްވަރާކޮށް، އެއްބަސްވެފައިވާ ގޮތުގެ މަތީންނެވެ. އެހެންކަމުން، ނަޕޯލީގެ އެއްބަސްވުމުގައި ކޮންޓޭ ވަރަށް އަވަހަށް ސޮއި ކުރާނެ ކަމަށް ރިޕޯޓުތައް ބުނެ އެވެ.

ކޮންޓޭ އެންމެ ފަހުން ހުރީ އިނގިރޭސި ޕްރިމިއާ ލީގުގެ ޓޮޓެންހަމްގެ ކޯޗުގެ މަގާމުގަ އެވެ. އެ މަގާމާ އޭނާ ހަވާލުވީ 2021 ވަނަ އަހަރު އެވެ. ނަމަވެސް އޭގެ ދެ އަހަރު ފަހުން، މިދިޔަ އަހަރު ކޮންޓޭ ވަނީ ޓޮޓެންހަމްގެ ކޯޗުކަން ދޫކޮށްލައިފަ އެވެ. އޭގެ ފަހުން ކޮންޓޭ އަށް ބައެއް ކުލަބުތަކުގެ ހުށަހެޅުން ލިބުނު ނަމަވެސް، އޭނާ ހުރީ އެއްވެސް ވަޒީފާއެއްގައެއް ނޫނެވެ.

ސިއެނާގެ އެސިސްޓެންޓު ކޯޗެއްގެ ގޮތުގައި 2005 ވަނަ އަހަރު ކޯޗިން ކެރިއަރު ފެށި ކޮންޓޭ ވަނީ، އެޓަލަންޓާ، ޔުވެންޓަސް، ޗެލްސީ، އިންޓަ މިލާން އަދި ޓޮޓެންހަމް ފަދަ ކުލަބުތަކަށް އިރުޝާދު ދީފަ އެވެ. މީގެ އިތުރުން އޭނާ ވަނީ އިޓަލީގެ ޤައުމީ ފުޓުބޯޅަ ޓީމަށް ވެސް އިރުޝާދު ދީފަ އެވެ.