މުލިއާގެއިން ރައީސާއި ނައިބުރައީސްގެ ކަންކަން ނުނިންމި ނަމަ މަޖިލީހުގެ ރައީސްއަކަށް އަބްދުއްރަހީމް ނީންނަވާނެ - ނާޒިލް

މުލިއާގެއިން އައި އެންގުން ނޭންގިނަމަ މަޖިލީހުގެ ރައީސްއަކަށް އަބްދުއްރަހީމް އަބްދުﷲ ނީންނަވާނެ ކަމަށާއި، ފެނިގެންދާނީ އެހެން މަންޒަރެއް ކަމަށް އެމްޑީޕީ ޕާލަމެންޓްރީ ގްރޫޕުގެ ލީޑަރު އިބްރާހިމް ނާޒިލް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ނާޒިލް ވިދާޅުވީ މީގެ ކުރިން އިންތިހާބުވެފައި ތިބި މެންބަރުންގެ ނިންމުމަކާއި ނުލާ އެހެން ފަރާތަކުން ވަކި ގޮތްތަކެއް ނިންމާ އެބޭފުޅުންނަށް ވޯޓު ދިނުމަށް އަންގާފައިވާކަން މީގެ ކުރިން އެނގިފައި ނެތްކަމަށެވެ. އަދި މަޖިލީހުގެ ރައީސް އާއި ނައިބްރައީސް އިންތިހާބުކުރުމުގެ ކަންކަން ނިމިގެން އައީ މުލީއާގެއިން ކަމަށް މީޑިއާތަކުން އެނގިވަޑައިގެންނެވި ކަމަށެވެ.

ނާޒިލް ވިދާޅުވީ މުލީއާގެއިން އެންގި ގޮތް ނޫން އެހެން ގޮތަކަށް ވޯޓަށް އެހިނަމަ އެހެން މަންޒަރެއް ފެނުމަކީ އެކަށީގެންވާ ކަމެއް ކަމަށެވެ. މީގެ އިތުރުން ކޮމިޓީތަކުގެ މުގައްރިރުންނާއި ކޮމިޓީތަކަށް މެންބަރުން އައްޔަންކުރުމުގެ ކަންކަން ނިމިފަިއވާ ކަމުގެ މައުލޫމާތުވެސް ލިބިވަޑައިގެންފައިވާ ކަމަށާއި، އެކަމާއި ގުޅިގެން މެންބަރުންގެ ތެރޭގައި ވެސް ހިތްހަމަނުޖެހުންތަކެއް އެބަހުރި ކަމަށެވެ.

ނާޒިލް ވިދާޅުވީ 75 މެންބަރުންގެ ސުޕަރ މެޖޯރިޓީއަކާއެކު މަސައްކަތްކުރާނަމަ މެންބަރުންނާއި ނުގުޅޭ ބަޔަކު މެންބަރުންގެ މައްޗަށް ބަސްބުނުމަކީ މެންބަރުން ބޭނުންވާނެ ކަމެއް ނޫން ކަމަށެވެ. އަދި ވަރަށް އަވަސް މުސްތަގުބަލެއްގައި އެކަންކަން ފެނިގެންދާނެ ކަމަށް ވެސް ނާޒިލް ވިދާޅުވިއެވެ.