ފްރެންޗް ކަޕްގެ ޗެމްޕިއަންކަމާއެކު އެމްބާޕޭގެ ޕީއެސްޖީ ކެރިއަރު ނިންމާލައިފި އެވެ.
އެމްބާޕޭގެ ޕީއެސްޖީގެ ޖަރޒީގައި ކުޅުނު ވަދާއީ މެޗަކަށްވީ ރޭ ލިޔޯން ބަލިކޮށް ފްރެންޗް ކަޕްގެ ޗެމްޕިއަންކަން ހޯދި މެޗެވެ. މެޗު ޕީއެސްޖީން ކާމިޔާބުކުރީ 2-1 ނެވެ. މެޗުގެ ފުރަތަމަ ހާފްގައި ފުރަތަމަ ދެ ލަނޑު ޖަހާ ކުރި ހޯދީ ޕީއެސްޖީން ނެވެ. އެޓީމަށް ދެ ލަނޑު ކާމިޔާބުކޮށްދިނީ ޑެމްބެލޭ އާއި ފަބިއަލް ރުއިޒް އެވެ. ލިޔޯންގެ ހަމައެކަނި ލަނޑު ދެވަނަ ހާފްގެ ކުރީކޮޅު ޖެހީ ޖޭކް އޯ'ބްރިއެން އެވެ. މި ތަށްތާއެކު ޕީއެސްޖީން ސީޒަން ނިންމާލީ ދެ ތަށްޓާއެކު އެވެ. އީ ކަޕްގެ އިތުރުން ލީގެވެ.
25 އހަަރުގެ އެމްބާޕޭ ޕީއެސްޖީ ދޫކޮށްލަނީ އެކްލަބަށް އެންމެ ގިނަ ލަނޑު ޖަހައިދިން ކުޅުންތެރިޔާގެ ގޮތުގައެވެ. އޭނާ ވަނީ ޕީއެސްޖީ އަށް ކުޅުނު 308 މެޗުން 256 ލަނޑު ޖަހައިދީފައެވެ. އެމްބާޕޭ ޕީއެސްޖީއާ ގުޅުނީ 2017 ވަނަ އަހަރު މޮނާކޯ އިންނެވެ. އަށް އަހަރަށްފަހު ޕީއެސްޖީ ދޫކޮށް އޭނާ ގުޅޭނެ ކަމަށް ޔަގީން ކުރެވެނީ ސްޕެއިންގެ ރެއާލް މެޑްރިޑާއެވެ. އެކަމަކު ރެއާލް އިން ވެސް އެމްބާޕޭ ވެސް އެކަން އަދި ކަށަވަރުކޮށް ނުދެއެވެ. އެކަން އިއުލާނު ކުރާނެ ކަމަށް ރިޕޯރޓްތައް ބުނަނީ ޖޫން ދެވަނަ ދުވަހު ކުޅޭ ޗެމްޕިއަންސް ލީގު ފައިނަލަށް ފަހު އެވެ.
އެމްބާޕޭ ވަނީ ޕީއެސްޖީއާއެކު ހަ ފަހަރު ފްރެންވް ލީގު ހޯދާފައެވެ. އަދި ފްރެންޗް ކަޕް ހަތަރު ފަހަރު އަދި ލީގު ކަޕް ދެ ފަހަރު ހޯދި އެވެ. ޕީއެސްޖީއާއެކު ނުހޯދުނީ ޗެމްޕިއަންސް ލީގެވެ.
