19 ވަނަ މަޖިލީހުގައި އިދިކޮޅު މެންބަރުންނަށް ވަރަށް ބޮޑަށް ފުރުސަތު ދީފައިވޭ، މަޖިލިސް ފެށިގެންދަނީ ވެސް ''ރައީސް ޔާމީން މިނިވަން ކުރޭ''

19 ވަނަ ރައްޔިތުންގެ މަޖިލީހުގައި ސަރުކާރާ އިދިކޮޅު މެންބަރުންނަށް ވަރަށް ބޮޑަށް ފުރުސަތު ދީފައިވާ ކަމަށާއި، މަޖިލިސް ފެށިގެންދަނީ ވެސް ''ރައީސް ޔާމީން މިނިވަން ކުރޭ'' މި ގޮވާލުންތަކުން ކަމަށް ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެއެވެ.

އޭނާ މިހެން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.

މެންބަރު ޒިޔާދު ވިދާޅުވީ އެމްޑީޕީގެ ސަރުކާރުގައި މީހުން ދިރިއުޅޭ ހުރިހާ ރަށަކަށް ތަރައްގީ ގެނައުމަށް މަސައްކަތް ކޮށްފައިވާ ކަމަށެވެ. އިދިކޮޅު މެންބަރުން އިންތިޚާބުކުރި ނަމަވެސް އެދާއިރާތަކުގެ މަޝްރޫއުތަކާއި، މައްސަލަތައް ބެލުމުގެ ފުރިހަމަ އިހްތިޔާރު މެންބަރުންނަށް ދީފައިވާ ކަމަށެވެ. އެގޮތުން މިނިސްޓަރުންނާއި، އެކިއެކި މުއައްސަސާތަކުގެ ބޭފުޅުން ކޮމެޓީތަކާއި، މަޖިލީހަށް ހާޒިރުކޮށް ސުވާލުކޮށްފައިވާ ކަމަށް މެންބަރު ޒިޔާދު ވިދާޅުވިއެވެ.

19 ވަނަ މަޖިލީހުގައި ވަރަށް ބޮޑަށް އިދިކޮޅު ކެންޑިޑޭޓުންނަށް ފުރުސަތު ދީފައިވާކަން ފާހަގަކުރައްވައި މެންބަރު ޒިޔާދު ވިދާޅުވީ ބައެއް ދުވަސްތަކުގައި މަޖިލިސް ފަށާނީ ވެސް އިދިކޮޅު މެންބަރުން ކަމަށެވެ. އަދި ހެނދުނު މަޖިލިސް ފަށާއިރު އެންމެ ބާރަށް އިވޭނެ އެއް އަޑަކީ ރައީސް ޔާމީން ދޫކޮށްލާ މި ޖުމްލަ ކަމަށެވެ.

19 ވަނަ މަޖިލީހުގައި އިދިކޮޅު މެންބަރުންނަށް ވަރަށް ބޮޑަށް ފުރުސަތު ދިން ނަމަވެސް 20 ވަނަ މަޖިލީހުގައި ސަރުކާރާ އިދިކޮޅު މެންބަރުންނަށް ފުރުސަތުދޭނެ ކަމާމެދު ބައެއް މެންބަރުން ދަނީ ސުވާލު އުފައްދަމުންނެވެ.