މާލެ ގެެއެއްގެ މަތިން ޒުވާން އަންހެނެއް ވެއްޓުނު މައްސަލަ ތަހުގީގު ކުރުމަށް ކުރީގެ ރައީސް ޔާމީން ގޮވާލައްވައިފި
މ. ހަސޯވާގެ އިމާރާތުން ވެއްޓިފައިވަނީ 25 އަހަރުގެ އަންހެނެއް
ކުރީގެ ރައީސް އަބްދުﷲ ޔާމީން ޕީއެންއެފްގެ ޖަލްސާގެ އޯޑިއަންސްގައި އިންނަވައިގެން ވާހަކަފުޅު ދައްކަވަނީ
މާލެ ގެެއެއްގެ މަތިން ޒުވާން އަންހެނެއް ވެއްޓުނު މައްސަލަ ތަހުގީގު ކުރުމަށް ކުރީގެ ރައީސް އަބްދުﷲ ޔާމީން ގޮވާލައްވައިފިއެވެ.
14 އޯގަސްޓް 2024 ވީ ބުދަ ދުވަހުގެ އިރުއޮއްސު ވަގުތު އެމްޕީއެލް ސަރަހައްދުގައި ހުންނަ މ. ހަސޯވާގެ އިމާރާތުން 25 އަހަރުގެ ޒުވާން އަންހެނެއް ވަނީ ވެއްޓިފައެވެ. އޭނާ ވެއްޓިފައިވަނީ 8 ވަނަ ފަންގިފިލާއިން ކަމަށާއި، ވެއްޓި ޖެހިފައިވަނީ އެސަރަހައްދުގައި ޕާކު ކޮށްފައި އޮތް ވެހިކަލެއްގެ ތެރެއަށެވެ. އަދި ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް މައުލޫމާތު ލިބެއެވެ.
މިހާދިސާއާ ގުޅޭގޮތުން ބުރާސްފަތި ދުވަހުގެ ރޭ ޕީއެންއެފްއިން ކުރިއަށް ގެންދިޔަ ޖަލްސާގައި އޯޑިއަންސްގައި އިންނަވައި ޔާމީން ވިދާޅުވީ ރައްޔިތުންނަށް އެނގޭ ގޮތަށް، ހާމަކަން ބޮޑު ގޮތެއްގައި މިހާދިސާ ތަހުގީގު ކުރަންޖެހޭ ކަމަށާއި، ބޭރުގެ އެހީ ވެސް ހޯދަންޖެހޭ ކަމަށެވެ. މިފަދަ މައްސަލަތަކުގައި އަޅާނުލާ ދޫކޮށްލައިގެން ނުވާނެ ކަމަށާއި، މިފަދަ އިތުރު ހާދިސާތައް ހިނގައިދިނުމަކީ ދުރު ކަމެއް ނޫން ކަމަށް ޔާމީން ވިދާޅުވިއެވެ. އަދި ވިދާޅުވީ ޒުވާން އަންހެނަކު ހަމަހުރެފައި އުސް އިމާރާތެއްގެ މަތިން ފުންމާނުލާނެ ކަމަށާއި، ނުވެސް ވެއްޓޭނެ ކަމަށެވެ.
މީގެ އިތުރުން ޔާމީން ވިދާޅުވީ މިއީ ކަންބޮޑުވާ މައްސަލައެއް ކަމަށެވެ.
ސީރިއަސް މައްސަލައެއް ގޮތުގައި ތަހުގީގު ކުރުމަށް ޔާމީން ގޮވާލެއްވިއިރު، އެ ޒުވާނާ ވެއްޓުނު ދުވަހު ފުލުހުން ބުނެފައިވަނީ މިހާދިސާ ތަހުގީގު ކުރަމުންދާ ކަމަށެވެ. ނަމަވެސް މިއަދާ ހަމައަށްއައިރު މިހާދިސާ އާ ގުޅޭ އިތުރު މައުލޫމާތެއް ފުލުހުން ހާމަކޮށްފައިނުވެއެވެ.
ޕާކު ކޮށްފައި އޮތް ޕިކަޕަކަށް އެޒުވާނާ ވެއްޓިފައިވާތީ އެކަމާ ގުޅޭގޮތުން ވެސް ބައެއް މީހުން ސޯޝަލް މީޑިއާގައި ސުވާލު އުފައްދާފައިވެއެވެ.
